އޮކްޓޫބަރު ހަތް ވަނަ ދުވަހުން ފެށިގެން ޔަހޫދީންނާއި ފަލަސްޠީނުގެ ޢައްޒާގައި ވެރިކަން ކުރާ ޙަމާސް ޖަމާޢަތާ ދެމެދު ކުރަމުންދިޔަ ހަނގުރާމައިގައި ޙަމަލާ ބަދަލުކުރުން މެދުކަނޑާލަން ވެފައިވާ އެއްބަސްވުން ނިމުމަކަށް ގެނައީ ޔަހޫދީންކަމަށް ޙަމާސްގެ އިސްވެރިއެއް ކަމަށްވާ ޚަލީލް އަލް ޙަޔާ ވިދާޅުވެއްޖެއެވެ. އެއްބަސްވުން އައުކޮށް އިތުރު އަސީރުން މިނިވަން ކުރުމަށް މަޝްވަރާތަކަށް ތައްޔާރަށް އޮތް ކަމަށްވެސް ޙަމާސުން ވަނީ ބުނެފައެވެ.
ހަމާސްގެ ސިޔާސީ ގޮފީގެ އިސްވެރިއެއްކަމަށްވާ ޚަލީލް އެ މޭރުމުން ވާހަކަފުޅު ދައްކަވާފައި ވަނީ ހަފުތާއެއްގެ މެދުކެނޑުމަކަށްފަހު އަނެއްކާވެސް ޔަހޫދީން ފަލަސްޠީނަށް ހަމަލާދޭން ފެށިތާ ކުޑައިރުކޮޅެއް ފަހުންނެވެ.
ޙަމާސްގެ ބެލުމުގެ ދަށަށް ގެންގޮސްފައިވާ ޔަހޫދީ ސިފައިން މިނިވަންކުރުމާ ގުޅޭ މަޝްވަރާތައް ކުރިއަށް ގެންދެވޭނީ ޙަމަލާތައް މެދުކަނޑާލުމުގެ ބަދަލުގައި ހަނގުރާމަ އެއްކޮށް ހުއްޓާލުމުން ކަމަށް ޙަލީލް ވިދާޅުވިއެވެ.
އިތުރު އަސީރުން މިނިވަން ކުރުމަށް ހަމާސުން ހުށަހެޅި ހުރިހާ ހުށަހެޅުމަކަށް ޔަހޫދީން ދެކޮޅު ހަދާފައިވާ ކަމަށް މީގެ ކުރިން އެ ޖަމާޢަތުން ނެރުނު ބަޔާނެއްގައި ބުނެފައިވެއެވެ.
ޙަމާސުން ހުށަހެޅި ހުށަހެޅުންތައް ބަލައިގަތުމަށް ޔަހޫދީން ދެކޮޅު ހެދީ ޖިނާއީ އަނިޔާވެރިކަން އަލުން ފެށުމުގެ ވިސްނުން އޮތުމުން ކަމަށާއި ޙަމަލާތައް ދޭން އަލުން ފަށައި 100އަށްވުރެ ގިނަ މީހުން ޝަހީދުކޮށްލާފައިވަނީ އެމެރިކާގެ ތާއީދާއެކު ކަމަށް ޙަމާސުން ބުނެއެވެ.
މީގެ އިތުރުން ފަލަސްޠިނާއި ސަރަހައްދުގެ އެހެން ހަނގުރާމަވެރިންނާއެކު އަސްކަރީ ޙަރަކާތްތައް އަލުން ފަށާނެ ކަމަށާއި ޔަހޫދީން ބަލިކުރާނެ ކަމަށް ޙަމާސުން ވަނީ ބުނެފައެވެ.
އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީން ފެށި ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު 15,000އާ ގާތްކުރެއެވެ. އަދި، އިތުރު 6,000 އެއްހާ މީހުންގެ ހަށިތައް ސުންނާފަތި ކޮށްލާފައިވާ ޢިމާރާތްތަކުގެ ދަށުގައި އަދިވެސް ތާށިވެފައިވާ ކަމަށް ބެލެވެއެވެ. ޝަހީދު ކޮށްލާފައިވާ މީހުންގެ ތެރޭގައި 6,150 ކުޑަކުދިންނާއި 4,000 އަންހެނުން ހިމެނެއެވެ. ޒަޚަމު ކޮށްލާފައިވާ މީހުންގެ ޢަދަދު 36,000އަށްވުރެ ގިނައެވެ.