ސްޕޯޓްސް ކޮމިޝަނަރުގެ މަގާމާއި ހަވާލުވެވަޑައިގަތުމަށް އެތުލެޓިކްސް އެސޯސިއޭޝަން އޮފް މޯލްޑިވްސްގެ ރައީސްގެ މަގާމުން މުޙައްމަދު ޠަލާލް އިސްތިއުފާދެއްވުމުން، އެ އެސޯސިއޭޝަނުގެ ހިންގުން ނައިބު ރައީސް އަޙްމަދު އަޒީލާ ހަވާލުކުރައްވައިފިއެވެ.
ސްޕޯޓްސް ކޮމިޝަނަރަކަށް ޠަލާލް އައްޔަންކުރެއްވުމާއެކު އޭނާ ވަނީ އެސޯސިއޭޝަން ރައީސްގެ މަގާމުން އިސްތިއުފާ ދެއްވާފައެވެ. އޭގެފަހުން އެ މަގާމު ހުސްކޮށް އޮތްއިރު، އަޒީލް މަގާމާއި ހަވާލުވީ އެ ޖަމުއިއްޔާގެ އަސާސީ ގަވާއިދު ބުނާގޮތުން އަންނަ އަހަރުގެ މާޗް މަސް ނިމުމުގެ ކުރިން، އެސޯސިއޭޝަންގެ އައު ހިންގާ ބޯޑެއް ހޮވުމުގެ ގޮތުން ބާއްވާ އިންތިޚާބާ ހަމަޔަށެވެ.
އިންތިޚާބަށް ބާކީ އޮތް ފަސް މަސް ދުވަހުގެ ތެރޭގައި ރައީސަކު ހޮވަން އިންތިޚާބެއް ނުބާއްވައި، ނައިބު ރައީސްއާއެކު ކުރިއަށްދިއުމަށް އަސާސީ ގަވާއިދު ތަންދެއެވެ. އެހެންކަމުން އެސޯސިއޭޝަނުގެ އިސް ބޭފުޅެއްގެ ގޮތުގައި މަސައްކަތްކުރާނީ ނައިބު ރައީސް އަަޒީލެވެ. މިދިޔަ ދެ ދައުރުގައިވެސް އަޒީލް ވަނީ އެސޯސިއޭޝަނުގެ ނައިބު ރައީސްކަމުގެ ޒިންމާ އުފުއްލަވާފައެވެ.
އަދި މިހާތަނަށް އެސޯސިއޭޝަނުން ބޭއްވި ގިނަ ހަރަކާތްތަކުގައި އަޒީލް ވަނީ ބައިވެރިވެވަޑައިގެންފައެވެ. އެގޮތުން މުބާރާތްތަކާއި އެސޯސިއޭޝަނުގެ އިސް ހަރަކާތްތަކުގައިވެސް އަޒީލް ވަނީ އަމަލީގޮތުން ބައިވެރިވެވަޑައިގެންފައެވެ.