ޣައްޒާގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުން ދިޔަ ލާއިންސާނީ އުދުވާން ވަގުތީ ގޮތުން މެދުކަނޑައިލުމަށް ހަދާފައިވާ އެއްބަސްވުމުގެ މުއްދަތު އިތުރު ކުރުމާ ގުޅޭގޮތުން މަޝްވަރާ ކުރަމުންދާ ކަމުގައި މިޞްރުން ބުނެފިއެވެ. ޣައްޒާގައި ވެރިކަން ކުރާ ޙަމާސް ޖަމާޢަތާއި ޔަހޫދީ އިސްރާޢީލާ ދެމެދު މަޝްވަރާ ކުރަމުން ދަނީ މިޞްރާއި، ޤަޠަރާއި އެމެރިކާއިން ގުޅިގެންނެވެ.
މި މަޝްވަރާތަކާ މެދު މިޞްރުން ބުނީ، މަޝްވަރާތަކުގެ ނަތީޖާ ރަނގަޅުވާނެ ކަމަށް ބެލެވޭ ކަމަށާއި، އެއްބަސްވުމުގެ މުއްދަތު އިތުރު ކުރުމަށް ދެ ފަރާތުން ވެސް އެއްބަސްވާނެ ކަމަށް ބެލެވޭ ކަމުގައެވެ. ހަތަރު ދުވަހުގެ މުއްދަތަކަށް ހަދާފައިވާ އެއްބަސްވުމުގެ މުއްދަތު ނޮވެންބަރު 27 ވާ ހޯމަ ދުވަހު ހަމަވާނެއެވެ.
މި އެއްބަސްވުމުގެ މުއްދަތު އިތުރު ހަތަރު ދުވަހުގެ މުއްދަތަކަށް އިތުރު ކުރަން ޙަމާސް ޖަމާޢަތުން ވަނީ ހުށަހަޅާފައެވެ. އެއީ، ޔަހޫދީން ހައްޔަރު ކޮށްފައިވާ ފަލަސްޠީނުގެ އިތުރު މުސްލިމުން މިނިވަން ކުރުވާށެވެ. ނަމަވެސް، ޔަހޫދީން ބޭނުން ވަނީ އެންމެ ދުވަހަކަށް އެއްބަސްވުމުގެ މުއްދަތު އިތުރުކުރުމަށެވެ. އަދި، އިތުރު ދުވަހަކަށް މުއްދަތު އިތުރު ކުރުމާ މެދު އަލުން މަޝްވަރާ ކުރާށެވެ.
ޔަހޫދީ އޮފިޝަލަކު ބުނީ، އިތުރު ދުވަހަކަށް އެއްބަސްވުމުގެ މުއްދަތު އިތުރު ކުރާނީ، ޙަމާސް ޖަމާޢަތުން ރަހީނު ކޮށްފައިވާ އަސީރުންގެ ތެރެއިން އިތުރު 10 މީހުން މިނިވަން ކުރަން އެ ޖަމާޢަތުން އެއްބަސްވުމުންނެވެ. އަދި، މިނިވަން ކުރާ ކޮންމެ އަސީރެއްގެ ބަދަލުގައި ޔަހޫދީން ހައްޔަރުކޮށް ޖަލަށްލާފައިވާ ފަލަސްޠީނުގެ ތިން މީހުން މިނިވަން ކުރަން ޔަހޫދީން އެއްބަސްވާނެ ކަމުގައެވެ. އަދި، ފަސް ދުވަހަށް ވުރެ އިތުރު ނޫން މުއްދަތަކަށް އެއްބަސްވުމުގެ މުއްދަތު އިތުރު ކުރުމަށް ޔަހޫދީން އެއްބަސްވެދާނެ ކަމުގައި ވެސް އެ އޮފިޝަލު ބުންޏެވެ.
އެއްބަސްވުމުގެ މުއްދަތު އިތުރު ކުރުމަށް ނިންމާފައި ނުވި ނަމަވެސް، މަޝްވަރާތައް ވަރަށް ކާމިޔާބު ކަމުގައި ފަލަސްޠީނުގެ އޮފިޝަލަކު ވެސް ވަނީ ވިދާޅުވެފައެވެ. އިސްރާޢީލުން ބުނީ ޙަމާސް ޖަމާޢަތުގެ ބެލުމުގެ ދަށުގައި އަދިވެސް 184 އަސީރުން ތިބި ކަމުގައެވެ. އަދި، އޭގެ ތެރޭގައި އިސްރާޢީލުގެ 80 މީހުންނާއި ބޭރު ޤައުމުތަކުގެ 14 މީހުން ހިމެނޭ ކަމުގައެވެ. އެއީ ދެ ޤައުމުގެ ރަށްވެރިހަން އޮންނަ ޔަހޫދީންނެވެ.
ފަލަސްޠީނުގެ މުޖާހިދުންނާއި ޔަހޫދީންނާ ދެމެދު ހަދާފައިވާ އެއްބަސްވުމުގެ ދަށުން ފަލަސްޠީނުގެ 117 މީހަކު މިހާތަނަށް ވަނީ މިނިވަން ކޮށްފައެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. އަދި، ޙަމާސް ޖަމާޢަތުން ވެސް ވަނީ 58 އަސީރުން މިނިވަން ކޮށްފައެވެ. ޙަމާސްއިން މިއަދު އިތުރު 11 އަސީރުން މިނިވަން ކުރާނެ ކަމަށް ބެލެވެއެވެ.
ޣައްޒާގައި ޔަހޫދީން ހިންގަމުން ދިޔަ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު 14,800 އަށް އަރައެވެ. އޭގެ ތެރޭގައި 6,150 ކުޑަކުދިންނާއި 4,000 އަންހެނުން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 36,000 އަށް އަރައެވެ.