ޒަޔަނިސްޓު އިސްރާޢީލުގެ އަސްކަރިއްޔާއިން މިނިވަން ކުރި ފަލަސްޠީނުގެ 39 މީހުންނަށް ވަރަށް ހޫނު މަރުޙަބާއެއް ކިޔައިފިއެވެ. ހުޅަނގު އައްސޭރީގެ ރާމަاللهއަށް އެ މީހުން ގެންދިޔުމުން، އެތަކެއް ސަތޭކަ ބަޔަކު ވަނީ އެ ރަށުގެ މަގުތަކަށް ނިކުމެ އެ މީހުން މަރުޙަބާ ކިޔައި، އުފާ ފާޅުކޮށްފައެވެ. އެ މީހުން މިނިވަން ކޮށްފައި މި ވަނީ، ޙަމާސް ޖަމާޢަތާއި ޔަހޫދީންނާ ދެމެދު ހަދާފައިވާ އެއްބަސްވުމުގެ ދަށުންނެވެ.
ޣައްޒާގެ މުސްލިމުންނާ ދެކޮޅަށް ހިންގަމުން ދިޔަ ލާއިންސާނީ އުދުވާންތައް ޔަހޫދީން ވަނީ ފަލަސްޠީނުގެ މުޖާހިދުންނާއި ދެމެދު ހަދާފައިވާ އެއްބަސްވުމުގެ ދަށުން ހަތަރު ދުވަހުގެ މުއްދަތަކަށް މެދުކަނޑައިލާފައެވެ. އަދި، ޙަމާސް ޖަމާޢަތުން ރަހީނު ކޮށްފައިވާ އަސީރުން މިނިވަން ކުރުމުގެ ބަދަލުގައި، ޔަހޫދީން ހައްޔަރުކޮށް ޖަލަށްލާފައިވާ ފަލަސްޠީނުގެ ރައްޔިތުން މިނިވަން ކުރަން ފަށާފައެވެ.
އެންމެ ފަހުން ދޫކޮށްލާފައިވާ ފަލަސްޠީނުގެ ރައްޔިތުންގެ ތެރޭގައި ގިނައީ ޒުވާނުންނެވެ. އެ މީހުން މިނިވަން ކޮށްފައި ވަނީ، ޙަމާސްއިން ރަހީނު ކޮށްފައިވާ އިސްރާޢީލުގެ 17 އަސީރުން މިނިވަން ކުރުމާ އެކުގައެވެ. ދެ ފަރާތުގެ މެދުގައި ހަދާފައިވާ އެއްބަސްވުމުގެ މުއްދަތު ނޮވެންބަރު 27 ވަނަ ދުވަހު ހަމަވާނެއެވެ. އަދި، އެއާ އެކު ޣައްޒާއަށް އަލުން ބޮން އަޅަން ފަށާނެ ކަމަށާއި، ފަލަސްޠީނުގެ މުސްލިމުން ގަތުލު ކުރުމުގެ ކެމްޕޭން އަލުން ފަށާނެ ކަމަށް ޔަހޫދީން ވަނީ ބުނެފައެވެ.
ފަލަސްޠީނުގެ މުޖާހިދުންނާއި ޔަހޫދީންނާ ދެމެދު ހަދާފައިވާ އެއްބަސްވުމުގެ ދަށުން ފަލަސްޠީނުގެ 117 މީހަކު މިހާތަނަށް ވަނީ މިނިވަން ކޮށްފައެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. އަދި، ޙަމާސް ޖަމާޢަތުން ވެސް ވަނީ 58 އަސީރުން މިނިވަން ކޮށްފައެވެ. ޙަމާސްއިން މިއަދު އިތުރު 11 އަސީރުން މިނިވަން ކުރާނެ ކަމަށް ބެލެވެއެވެ.
ޣައްޒާގައި ޔަހޫދީން ހިންގަމުން ދިޔަ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު 14,800 އަށް އަރައެވެ. އޭގެ ތެރޭގައި 6,150 ކުޑަކުދިންނާއި 4,000 އަންހެނުން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 36,000 އަށް އަރައެވެ.