ތިންވަނަ އިންލައިން ސްޕީޑް ސްކޭޓް ޗެމްޕިއަންޝިޕް ކާމިޔާބުކަމާއެކު ނިންމާލައިފި

ޖުމްލަ 10 ކެޓަގަރީއަކަށް ބަހާލައިގެން ބޭއްވި ތިންވަނަ ދިރާގު އިންލައިން ސްޕީޑް ސްކޭޓިން ޗެމްޕިއަންޝިޕް ނިންމާލައިފިއެވެ.

މި މުބާރާތުގެ ފައިނަލް ބައިގެ ޝަރަފްވެރި މެހެމާނަކަށް ވަޑަައިގެންނެވީ ދިރާގުގެ ސީއެފްއޯ ރޮބިން ވޯލް އެވެ. އުމުރުފުރާތަކަކީ ފަސް އަހަރުންދަށް، 5 އަހަރާއި ހަތް އަހަރާއި ދެމެދުގެ އުމުރުފުރާ، ހަތް އަހަރާއި ނުވަ އަހަރާއި ދެމެދުގެ އުމުރުފުރާ، 9 އަހަރާއި 11 އަހަރާއި ދެމެދުގެ އުމުރުފުރާގެ އިތުރުން އެގާރަ އަހަރާއި ތޭރަ އަހަރާއި ދެމެދުގެ އަންހެން، 13 އަހަރާއި 15 އަހަރާއި ދެމެދުގެ އަންހެން، 30 އަހަރުން މަތީގެ އުމުރުފުރާ އެވެ.

ޖުމްލަ 79 ބައިވެރިން މި މުބާރާތުގައި ވަނީ ބައިވެރިވެފައެވެ. އަދި ޖުމްލަ 54 ރަން މެޑަލް، ރިހި މެޑަލް އަދި ލޯ މެޑަލް ވަނީ ފެނިގެންގޮސްފައެވެ. ކޮންމެ ބައިވެރިއަކަށް ވަނީ ސެޓްފިކެޓެއްވެސް ދީފައެވެ. އަދި ކޮންމެ އުމުރުފުރާއަކުން ވެސް ޗެމްޕިއަން ވަނީ ހޮވާފައެވެ.

މުބާރާތުގެ 10 އުމުރުފުރާގެ ތެރެއިން ހަތް އުމުރުފުރާގެ އޭޖް ގްރޫޕުގެ ޗެމްޕިއަންކަން ހޯދީ ސްކޭޓް މޯލްޑިވްސް އެވެ.

މުބާރާތުގެ 11-13 އަހަރުގެ ކެޓަގަރީން އެއްވަނަ ހޯދާފައިވަނނީ އައިޝަތު އާނާ މުހައްމަދެވެ. 7-9 އަހަރުގެ ފިރިހެން ކެޓަގަރީގެ ޗެމްޕިއަންކަން ކައިލް ހަސަން މައުރޫފް ހޯދިއިރު ފަސް އަހަރުން ދަށުގެ ކެޓަގަރީން އެއްވަނަ ހޯދީ އައިނީ އަލީ މަފާޒެވެ. އަދި ޖޫނިއާ ކެޓަގަރީގެ އެންމެ އަވަސް ސްކޭޓަރަކަށް ހޮވުނީ މުބާރާތުގެ 9-11 ކެޓަގަރީގެވެސް އެއްވަނަ ހޯދި އަހުމަދު ރާހިފް ޝަފީއުއެވެ. އޭނާގެ ޓައިމިން އަކީ 13.26 އެވެ.

މީގެއިތުރުން 9-11 އުމުރުފުރާގެ ކެޓަގަރީން އެއްވަނަ ހޯދީ ފަލަކް ބިންތް ފަޔާޒެވެ. އޭނާއަކީ ޖޫނިއާ ކެޓަގަރީގެ އެންމެ ރަނގަޅު ޓައިމިންގައި ނިންމި ސްކޭޓަރެވެ. ޓައިމިން އަކީ 13.79 އެވެ.

މިއީ ރާއްޖޭގައި ސްކޭޓިން ފުޅާކުރުމުގެ ގޮތުން ބާއްވާ މުބާރާތްތަކުގެ ތެރެއިން އެންމެ ބޮޑު މުބާރާތެވެ. ސްކޭޓް މޯލްޑިވްސް އިން އަންނަނީ މި ކުޅިވަރު ރާއްޖޭގައި ފުޅާކުރުމުގެ ގޮތުން ގިނަ ހަރަކާތްތަކެއް ރާވަމުންނެވެ.