ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޖެނެރަލް ސެކްރެޓަރީގެ މަގާމުން ހުސެއިން ޖަވާޒް (ޖަވާ) އިސްތިއުފާދެއްވައިފިއެެވެ.
މަގާމުން އިސްތިއުފާދެއްވިކަން ހާމަކުރައްވައި އެފްއޭއެމުގެ މީޑިއާ ގްރޫޕުގައި ހިއްސާކުރި މެސެޖެއްގައި ޖަވާ ވަނީ 24 އަަހަރާއި ތިން މަސް ދުވަސް ފަހުން އެފްއޭއެމުން ވަކިވާން ނިންމާފައިވާކަން އިއުލާންކުރައްވާފައެވެ. އަދި މިއީ ފަސޭހަ ނިންމުމެއް ނޫން ކަމަށާއި، މި މުއްދަތުގައި އެހީތެރިކަން ފޯރުކޮށްދިން ފަރާތްތަކަށް ޝުކުރުއަދާކުރާ ކަމަށްވެސް ވިދާޅުވިއެވެ.
އޭޝިއާގެ މައި ފުޓްބޯޅަ އިދާރާ، އޭއެފްސީގެ ޑިވެލޮޕްމަންޓް ކޮމިޓީގެ މެންބަރުކަންވެސް ފުރުއްވަމުން އަންނަ ޖަވާ ވަނީ 2014 ވަނަ އަހަރުވެސް އެފްއޭއެމުގެ ޖެނެރަލް ސެކްރެޓަރީގެ މަގާމު ފުރުއްވާފައެވެ. އޭގެވ ފަހުން އެފްއޭއެމުގެ ރައީސްގެ މަގާމަށް 2016 ވަނަ އަހަރު ބައްސާމް އަދީލް ޖަލީލް އިންތިޚާބުވެވަޑައިގަތުމާ ހަމައިން މިއަދާ ހަމައަށްވެސް އެ އެސޯސިއޭޝަނުގެ ޖެނެރަލް ސެކްރެޓަރީގެ ފުރުއްވީ ޖަވާއެވެ. އަދި މީގެ ކުރިން ފުޓްބޯޅަ ކުޅުއްވި ޖަވާ ވަނީ 1999 ވަނަ އަހަރުން ފެށިގެން އެފްއޭއެމުގައި ގިނަ މަސައްކަތްތަކެއް ކުރައްވާފައެވެ.
އެފްއޭއެމުގެ ޖެނެރަލް ސެކްރެޓަރީގެ މަގާމުން ޖަވާ އިސްތިއުފާދެއްވިއިރު، މީގެ ކުރިން އެ އިދާރާގެ ހިންގާ ކޮމިޓީގެ ދެ މެންބަރަކުވެސް ވަނީ އިސްތިއުފާ ދެއްވާފައެވެ. އެއީ ނައިބު ރައީސްގެ މަގާމުގައި ހުންނެވި މާޒިޔާ ސްޕޯޓްސް އެންޑް ރެކްރިއޭޝަނުގެ ސީއީއޯ ހުސައިން ޝާފިއު (ކޮކީ) އާއި ހިންގާ ކޮމިޓީގެ މެންބަރުކަން ކުރެއްވި ކުލަބު ގްރީން ސްޓްރީޓްސްގެ ރައީސް މުއާވިޔަތު ޚަލީލެވެ.
އެފްއޭއެމުގެ ހިންގުން ބޮއްސުންލާފައިވާ ދަނޑިވަޅެއްގައި، އެ އިދާރާއާ ގުޅުންހުރި ކްރޮޕްޝަނާއި ޚިޔާނާތާ ގުޅުންހުރި ޖިނާއީ ތަހުގީގެއް ފުލުހުންގެ އިދާރާއިން ވަނީ ފަށާފައެވެ. އަދި އެ އެސޯސިއޭޝަންގެ ރައީސް ބައްސާމުގެ އިސްތިއުފާއަށްވެސް ގިނަ ބަޔަކު އަންނަނީ އަޑުއުފުލަމުންނެވެ.