ރާއްޖޭގެ ކުޅިވަރު އެތުލީޓުންނާ ގުޅުން ހުރި ކަންކަން ހިއްސާކުރުމަށް މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ޚާއްސަ ފޯރަމެއް ބާއްވައިފިއެވެ.
ހުކުރު ދުވަހާއި ހޮނިހިރު ދުވަހު ބޭއްވި މި ފޯރަމަކީ އެމްއޯސީގެ އެތުލީޓްސް ކޮމިޝަނުން އިންތިޒާމުކޮށްގެން ބޭއްވި ހަރަކާތެކެވެ. މި ފޯރަމްގައި އެމްއޯސީގައި ރަޖިސްޓްރީކޮށްފައިވާ 17 ކުޅިވަރު އެސޯސިއޭޝަނުގެ އެތުލީޓުން ވަނީ ބައިވެރިވެފައެވެ.
އެތުލީޓްސް ފޯރަމް ފެށުމުގެ ގޮތުން ހުކުރު ދުވަހުގެ ހެނދުނު ކުރިއަށްދިޔަ ސެޝަންގައި ކުޅިވަރާ ބެހޭ ވަޒީރު ޢަބްދުﷲ ރާފިޢު އާއި ކޮމިޝަނަރ އޮފް ސްޕޯޓްސް މުޙައްމަދު ޠަލާލް ބައިވެރިވެ ވަޑައިގެންނެވިއިރު، އެ ސެޝަންގައި ވަނީ ވަޒީރާ ސުވާލުކޮށް ކަންކަން އޮޅުންފިލުވުމުގެ ފުރުސަތު އެތުލީޓުންނަށް ދީފައެވެ.
އެތުލީޓުންނަށް ދިމާވާ އެކިއެކި ކަންކަން ހިއްސާކޮށް މަޝްވަރާކުރުމާއި، އެތުލީޓުންނާ ގުޅުންހުރި އެކި އެކި ކަންކަމުގެ މައުލޫމާތުތައް މި ފޯރަމުގައި ހިއްސާކުރިއިރު، ކުޅުމުން ރިޓަޔާކުރުމަށްފަހު އެތުލީޓުންގެ ކެރިއަރު ބިނާކުރުމާ ގުޅޭގޮތުންނާއި ކުޅުންތެރިންގެ ނަފްސާނީ ދުޅަހެޔޮކަން އިތުރުކުރުމާއި، ނަފްސާނީ ދުޅަހެޔޮކަމުގެ މުހިންމުކަން ހިއްސާކުރުމަށްވެސް ވަނީ ސެޝަންތައް ކުރިއަށް ގެންގޮސްފައެވެ.
މީގެ އިތުރުން އޮލިމްޕިކް ކައުންސިލް އޮފް އޭޝިއާ (އޯސީއޭ) ގެ ފަރާތުން ވަނީ ރިޝްވަތު ނެގުމާއި، މެޗު ފިކްސިން ފަދަ ކަންކަމުން ކުޅިވަރަށް އަންނަ އަސަރު ކިޔައިދީ، އެކަންކަން ހުއްޓުވުމަށް އެތުލީޓުންނަށް ކުރެވޭނެ ކަންކަން ހިއްސާކޮށްފައެވެ. އަދި މި ފޯރަމުގައި ރާއްޖޭގެ ކުޅިވަރުގެ އެކި ތަޖުރިބާކާރުން ބައިވެރިވެ ވަނީ އެ ބޭފުޅުންގެ ތަޖުރިބާ ހިއްސާކޮށްފައެވެ.
އެމްއޯސީގެ އެތުލީޓްސް ކޮމިޝަނުން އިސްނަގައިގެން އެތުލީޓުންނަށް ޚާއްސަ ފޯރަމެއް ބޭއްވިއިރު، މިހާރު އޮތް އެތުލީޓްސް ކޮމިޝަން ވުޖޫދުވެގެން އައީ 2021 ވަނަ އަހަރުގެ ޑިސެމްބަރު މަހުގައެވެ. އެ ކޮމިޝަނުގެ ޗެއާމަނަކީ ގައުމީ ބާސްކެޓްބޯޅަ ޓީމުގެ ކެޕްޓަން އަޙްމަދު ޒަބީރެވެ.
އެތުލީޓްސް ކޮމިޝަނަކީ 2009 ވަަނަ އަހަރު އެމްއޯސީއައަށް މެންބަރުން އިންތިޚާބުކުރަން ފެށުނުއިރުން ފެށިގެން ހިމެނޭ ބައެކެވެ. އެކަމަކު، މީގެ ކުރިން އެ ކޮމިޝަން އެކްޓިވް ބައެއްގެ ގޮތުގައި ފާހަގަވެފައި ނެތްއިރު، އެތުލީޓްސް ކޮމިޝަނަށް ބާރުތައް ދޭގޮތަށް ފާސްކޮށްފައިވަނީ 2019 ވަނަ އަހަރު ބޭއްވި އެމްއޯސީގެ އަހަރީ އާންމު ޖަލްސާގައެވެ.