ޣައްޒާގައި ހިންގަމުންދާ ލާއިންސާނީ އުދުވާން ވަގުތީ ގޮތުން މެދުކަނޑައިލުމަށް ފަހު ހޮނިހިރު ދުވަހު ފަލަސްޠީނުގެ 42 މީހުން މިނިވަން ކުރާނެ ކަން ޒަޔަނިސްޓު އިސްރާޢީލުން ހާމަކޮށްފިއެވެ. ޔަހޫދީންގެ ގަތުލުއާންމު ވަގުތީ ގޮތުން މެދުކަނޑައިލުމަށް ހެދި އެއްބަސްވުމަށް އަމަލު ކުރަން ފަށާފައި ވަނީ ނޮވެންބަރު 24 ވީ ހުކުރު ދުވަހުއެވެ.
ޔަހޫދީ ފައުޖުން ބުނީ ޙަމާސް ޖަމާޢަތުން ރަހީނު ކޮށްފައިވާ މީހުންގެ ތެރެއިން 14 އަސީރުން މި އެއްބަސްވުމުގެ ދެވަނަ ދުވަހު މިނިވަން ކުރާނެ ކަމުގައެވެ. ޔަހޫދީ ފައުޖުން ހައްޔަރުކޮށް ޖަލަށް ލާފައިވާ ފަލަސްޠީނުގެ 42 މީހުން ހޮނިހިރު ދުވަހު މިނިވަން ކުރާނެ ކަން ފަލަސްޠީނުގެ އިދާރާތަކުން ވެސް ވަނީ ކަށަވަރު ކޮށްދީފައެވެ. އޭގެ ތެރޭގައި އަންހެނުންނާއި ފިރިހެނުން ވެސް ހިމެނެއެވެ. އެއްބަސްވުމުގައި އޮތީ، ޙަމާސްއިން މިނިވަން ކުރާ ކޮންމެ އަސީރަކަށް، ޔަހޫދީންގެ ޖަލުތަކުގައި ތިބި ފަލަސްޠީނުގެ ތިން މީހަކު މިނިވަން ކުރަން ޖެހޭނެ ކަމުގައެވެ.
އެއްބަސްވުމުގެ ފުރަތަމަ ދުވަހު ވެސް ޔަހޫދީން ވަނީ ފަލަސްޠީނުގެ 39 އަންހެނުންނާއި ކުޑަކުދިން މިނިވަން ކޮށްފައެވެ. ހުޅަނގު އައްސޭރިއާއި އިރުމަތީ ބައިތުލްމަޤްދިސަށް އެ މީހުން ދިޔުމުން، ފަލަސްޠީނުގެ ރައްޔިތުން ވަނީ އެ މީހުންނަށް ވަރަށް ހޫނު މަރުޙަބާއެއް ކިޔާފައެވެ. އަދި، އެތަކެއް ސަތޭކަ ބަޔަކު ދަނީ އުފާ ފާޅު ކުރަމުންނެވެ.
މިނިވަން ކޮށްފައިވާ މީހުންގެ ތެރޭގައި ފަލަސްޠީނުގެ 15 ޒުވާނުން ވެސް ހިމެނެއެވެ. އެ މީހުންނަށް މަރުޙަބާ ކިޔުމަށް ގިނަ ޢަދަދެއްގެ ބަޔަކު ވަނީ ހުޅަނގު އައްސޭރިއާއި އިރުމަތީ ބައިތުލްމަޤްދިސްގެ މަގުތަކަށް ނިކުމެފައެވެ. "ހިތަށް މި ކުރެވޭ އިހުސާސްތައް ބަޔާން ކޮށްދޭން ގޮތެއް ނޭނގޭ. މާތް الله އަށް ޙަމްދު ކުރަން،" މިނިވަން ކޮށްފައިވާ ފަލަސްޠީނުގެ 17 އަހަރުގެ ޒުވާނެއް ކަމުގައިވާ ޖަމާލް ބްރަޙްމާ ބުންޏެވެ.
ޔަހޫދީންނާއި ފަލަސްޠީނުގެ މުޖާހިދުންނާ ދެމެދު ހަދާފައިވާ އެއްބަސްވުމުގެ ދަށުން ޙަމާސް ޖަމާޢަތުން ރަހީނު ކޮށްފައިވާ 50 އަސީރުން މިނިވަން ކުރާނެއެވެ. އަދި، ޔަހޫދީން ހައްޔަރުކޮށް ޖަލަށް ލާފައިވާ ފަލަސްޠީނުގެ 150 މީހުން ދޫކޮށްލާނެއެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންގެ އިތުރުން ޒުވާން އުމުރުފުރައިގެ ކުދިންނެވެ.
ޔަހޫދީންގެ ވަކިތަކުގެ ދަށުވެ ހައްޔަރު ކޮށްފައިވާ ފަލަސްޠީނުގެ ރައްޔިތުން މިނިވަން ކުރަން ފަށާފައިވީ ނަމަވެސް، ޣައްޒާގެ ރައްޔިތުންނަށް އުފާވެރިކަމެއް ނެތެވެ. އޮކްޓޫބަރު 7 ވަނަ ދުވަހު ޔަހޫދީން ފެށި ލާއިންސާނީ އުދުވާނުގައި މުޅި ޣައްޒާ އޮތީ ސުންނާފަތި ކޮށްލާފައެވެ. ގެދޮރާއި ހޮސްޕިޓަލްތަކަށް ބޮން އަޅައި، އެ ތަންތަން ވަނީ ބިމާ ހަމަކޮށްލާފައެވެ. ޣައްޒާގައި ގެދޮރު ނެތިފައިވާ މީހުންގެ ޢަދަދު އެތަކެއް ސަތޭކަ ހާހަށް އަރާއިރު، އެ މީހުން ވަންނާނެ ގެދޮރެއް މިއަދު ނެތެވެ.
ޣައްޒާގައި ޔަހޫދީން ހިންގަމުން ދިޔަ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު 14,800 އަށް އަރައެވެ. އޭގެ ތެރޭގައި 6,150 ކުޑަކުދިންނާއި 4,000 އަންހެނުން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 36,000 އަށް އަރައެވެ. އުދުވާންތައް ވަގުތީ ގޮތުން މެދުކަނޑައިލާފައިވީ ނަމަވެސް، އެއްބަސްވުމުގެ މުއްދަތު ހަމަވުމާ އެކު ގަތުލުއާންމު އަލުން ފެށުމަށް ޔަހޫދީ ފައުޖުން މިހާރު ދަނީ ތައްޔާރުވަމުންނެވެ.