ޒަޔަނިސްޓު އިސްރާޢީލާ އެކު ޙަމާސް ޖަމާޢަތުން ހަދާފައިވާ އެއްބަސްވުމަށް ފުރިހަމައަށް އިޙުތިރާމު ކުރާނެ ކަމަށާއި، އެއްބަސްވުމަށް އަމަލު ކުރުމުގައި ދެމި ހުންނާނެ ކަމުގައި އެ ޖަމާޢަތުގެ އިސްވެރިޔާ އިސްމާޢީލް ހަނިއްޔާ ވިދާޅުވެއްޖެއެވެ. ޣައްޒާގައި ވެރިކަން ކުރާ ޙަމާސް ޖަމާޢަތާއި ޒަޔަނިސްޓު އިސްރާޢީލުގެ އިސްތިޢުމާރީ ފައުޖާ ދެމެދު ހަދާފައިވާ އެއްބަސްވުމަށް އަމަލު ކުރަން ފަށާފައި ވަނީ ނޮވެންބަރު 24 ވަނަ ދުވަހުގެ ހެނދުނެވެ.
މި އެއްބަސްވުމާ އެކު ޔަހޫދީ ފައުޖުން ވަނީ ޣައްޒާގެ މުސްލިމުންނާ ދެކޮޅަށް ހިންގަމުންދިޔަ ލާއިންސާނީ އުދުވާން ހަތަރު ދުވަހުގެ މުއްދަތަކަށް މެދުކަނޑައިލާފައެވެ. އަދި، ޣައްޒާއަށް އިންސާނީ އެހީގެ ސާމާނު އެތެރެ ކުރުމުގެ ފުރުޞަތު ދީފައެވެ. ޙަމާސް ޖަމާޢަތުން ވެސް ވަނީ ހަމަލަތައް ހުއްޓައިލާ، ރަހީނު ކޮށްފައިވާ އިސްރާޢީލުގެ އަސީރުން މިނިވަން ކުރަން ފަށާފައެވެ. ޔަހޫދީން ވެސް ވަނީ އެ މީހުން ހައްޔަރު ކޮށްފައިވާ ފަލަސްޠީނުގެ އަންހެނުންނާއި ކުޑަކުދިން މިނިވަން ކުރަން ފަށާފައެވެ.
މި އެއްބަސްވުމާ ގުޅޭ ގޮތުން ވާހަކަފުޅު ދައްކަވަމުން ޙަމާސްގެ އިސްވެރިޔާ އިސްމާޢީލް ހަނިއްޔާ ވިދާޅުވީ އެއްބަސްވުން ދަމަހެއްޓުމުގައި ޙަމާސް ޖަމާޢަތުން ދެމި އޮންނާނެ ކަމުގައެވެ. އަދި، ޔަހޫދީންނަށް ހަމަލަ ދިނުން ހުއްޓައިލާފައިވާނެ ކަމަށާއި، އެއްބަސްވުމާ އެއްގޮތަށް އަސީރުން މިނިވަން ކުރަމުން ދާނެ ކަމުގައެވެ.
ދުނިޔޭގެ ޞިއްޙަތު ޖަމުޢިއްޔާ [ވޯލްޑް ހެލްތް އޮގަނައިޒޭޝަން (ޑަބްލިޔު.އެޗް.އޯ)]ން ބުނީ ހަމަލަ ބަދަލު ކުރުން މެދުކަނޑައިލާފައިވާ މި ދަނޑިވަޅުގައި ޣައްޒާގެ އުތުރުގެ ސަރަޙައްދުތަކުގައިވާ ހޮސްޕިޓަލްތަކުގައި ތިބި ބަލިމީހުން އެހެން ސަރަޙައްދުތަކަށް ބަދަލު ކުރުމަށް މަސައްކަތް ފަށާފައިވާ ކަމުގައެވެ. ޣައްޒާގެ އެންމެ ބޮޑު ހޮސްޕިޓަލް ކަމުގައިވާ އަލް-ޝިފާ ހޮސްޕިޓަލުގައި ތިބި ބަލިމީހުންގެ ހާލާ މެދު ކަންބޮޑުވާ ކަމުގައެވެ.
"އަލް-ޝިފާ ހޮސްޕިޓަލުގައި މިހާރު ވެސް 100 އެއްހާ ބަލިމީހުން އެބަތިބި. އަދި، ޞިއްޙީ ޚިދުމަތްތެރިން ވެސް އެބަތިބި. އެ މީހުންގެ ހާލާ މެދު ކަންބޮޑުވޭ،" ޑަބްލިޔު.އެޗް.އޯގެ ތަރުޖަމާނު ކްރިސްޓިޔަން ލިންޑްމަޔަރ ވިދާޅުވިއެވެ.
އަލް-ޝިފާ ހޮސްޕިޓަލުގެ އިތުރުން އަލް-އަހްލީ ހޮސްޕިޓަލުގައި ތިބި ބަލިމީހުން ރައްކާތެރި ހިސާބުތަކަށް ބަދަލު ކުރަން ރެޑް ކްރޮސްއިން ވެސް ދަނީ މަސައްކަތް ކުރަމުންނެވެ. އިންޓަރނޭޝަނަލް ފެޑެރޭޝަން އޮފް ރެޑް ކްރޮސް އެންޑް ރެޑް ކްރެސެންޓް (އައި.ސީ.އާރް.ސީ)ން ބުނީ، އަލް-އަހްލީ ހޮސްޕިޓަލުގައި ތިބި ބަލިމީހުން ބަލައި އެމްބިޔުލާންސްތަކެއް ފޮނުވާފައިވާ ކަމުގައެވެ.
ޣައްޒާގައި ޔަހޫދީން ހިންގަމުން ދިޔަ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު 14,800 އަށް އަރައެވެ. އޭގެ ތެރޭގައި 6,150 ކުޑަކުދިންނާއި 4,000 އަންހެނުން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 36,000 އަށް އަރައެވެ.