އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ފެށި ލާއިންސާނީ އުދުވާނުގެ ދަށުން ހައްޔަރުކޮށް، ޖަލަށް ލާފައިވާ ފަލަސްޠީނުގެ 39 އަންހެނުންނާއި ކުޑަކުދިން މިނިވަން ކޮށްފިއެވެ. އެ މީހުން މިނިވަން ކޮށްފައި މި ވަނީ، ޣައްޒާގައި ވެރިކަންކުރާ ޙަމާސް ޖަމާޢަތާއި ޒަޔަނިސްޓު އިސްރާޢީލާ ދެމެދު ހަދާފައިވާ އަސީރުން ބަދަލު ކުރުމުގެ އެއްބަސްވުމުގެ ދަށުންނެވެ.
މި އެއްބަސްވުމަށް އަމަލު ކުރަން ފަށާފައި ވަނީ ނޮވެންބަރު 24 ވަނަ ދުވަހު ޣައްޒާ ގަޑިން ހެނދުނު 7 ޖެހިއިރުއެވެ. އެއްބަސްވުމުގެ ދަށުން ޔަހޫދީން ވަނީ ޣައްޒާގެ މުސްލިމުންނާ ދެކޮޅަށް ހިންގަމުން ދިޔަ ގަތުލުއާންމު ވަގުތީ ގޮތުން މެދުކަނޑައިލާފައެވެ. މި އެއްބަސްވުމުގެ މުއްދަތަކީ ހަތަރު ދުވަހެވެ.
މި އެއްބަސްވުމުގެ ދަށުން ޙަމާސް ޖަމާޢަތުން ވެސް ވަނީ އެ ޖަމާޢަތުން ރަހީނު ކޮށްފައިވާ އަސީރުންގެ ތެރެއިން 24 މީހުން މިނިވަން ކޮށްފައެވެ. ނޮވެންބަރު 24 ވީ ހުކުރު ދުވަހު މިނިވަން ކޮށްފައިވާ މީހުންގެ ތެރޭގައި ޒަޔަނިސްޓު އިސްރާޢީލުގެ 13 ރައްޔިތުންނާއި، ތައިލެންޑުގެ 10 މީހުންނާއި ފިލިޕީންސްގެ ރައްޔިތަކު ހިމެނެއެވެ. އެ އެންމެން މިނިވަންކޮށް ރެޑް ކްރޮސްއާ ހަވާލު ކޮށްފައިވާ ކަމުގައި، މި އެއްބަސްވުން އެކުލަވައިލުމުގައި މެދުވެރިއެއްގެ ދައުރު އަދާކޮށްފައިވާ ޤަޠަރުގެ ޚާރިޖީ ވުޒާރާގެ ތަރުޖަމާނު މާޖިދު އަލް-އަންސާރީ ވިދާޅުވިއެވެ.
ޔަހޫދީން މިނިވަން ކޮށްފައިވާ ފަލަސްޠީނުގެ 39 މީހުންގެ ތެރެއިން 28 މީހުންނަކީ ހުޅަނގު އައްސޭރިން ހައްޔަރު ކޮށްފައިވާ މީހުންނެވެ. އެ މީހުން ހުޅަނގު އައްސޭރިއަށް ދަތުރު ކޮށްފައިވާއިރު، ބާކީ ތިބި 11 މީހުން ވަނީ އިރުމަތީ ބައިތުލްމަޤްދިސަށް ގެންގޮސްފައެވެ.
ޙަމާސް ޖަމާޢަތުން މިނިވަން ކުރި އަސީރުން ވެސް މިހާރު ވަނީ އިސްރާޢީލާ ހަވާލުކޮށްފައެވެ. ޒަޔަނިސްޓު އިސްރާޢީލުގެ އަސްކަރިއްޔާއިން ބުނީ، އެ މީހުންގެ ޞިއްޙީ ހާލަތު ވަޒަން ކުރުމަށް ޓެސްޓުތައް ހަދަމުންދާ ކަމުގައެވެ. ޙަމާސްއިން މިނިވަން ކޮށްފައިވާ މީހުންގެ ތެރޭގައި ހަތަރު ކުޑަކުދިންނާއި އުމުރުން ދުވަސްވީ ފަސް އަންހެނުން ހިމެނެއެވެ.
އޮކްޓޫބަރު 7 ވަނަ ދުވަހު ޙަމާސް ޖަމާޢަތުގެ މުޖާހިދުން އިސްރާޢީލުގެ ރަށްތަކަށް އަރައި ހިންގި އޮޕަރޭޝަނުގައި 240 އެއްހާ މީހުން ރަހީނު ކުރިއެވެ. އޭގެ ތެރޭގައި ތައިލެންޑުގެ 25 ރައްޔިތުން ހިމެނޭއިރު އޭގެ ތެރެއިން 10 މީހުން މިނިވަން ކޮށްފައި ވަނީ ޙަމާސް ޖަމާޢަތާއި މިޞްރާއި ޤަޠަރާ ދެމެދު ވަކިން ހަދާފައިވާ އެއްބަސްވުމެއްގެ ދަށުންނެވެ. އެ އޮޕަރޭޝަނުގައި އިސްރާޢީލުގެ 1,200 އެއްހާ މީހުން ވަނީ މަރައިލާފައެވެ.
ޙަމާސްގެ އޮޕަރޭޝަނުގެ ބަދަލު ހިފުމުގެ ގޮތުން ޔަހޫދީ ފައުޖުން ފެށި ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 14,800 އަށް އުފުލިފައެވެ. އޭގެ ތެރޭގައި 6,150 ކުޑަކުދިންނާއި 4,000 އަންހެނުން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 36,000 އަށް އަރާފައެވެ.