ރާއްޖޭގެ ޓެނިހުގެ އައު ޖީލެއް ބިނާކުރުމަށް ކުރަމުން އަންނަ މަސައްކަތުގެ ތެރެއިން ބޭރުގެ ހަތަރު ގައުމެއްގެ ބައިވެރިވުމާއެކު މާލޭގައި އިންވިޓޭޝަނަލް މުބާރާތެއް ފަށައިފިއެވެ.
ދިރާގު އިންވިޓޭޝަނަލް ޓެނިސް ޗެމްޕިއަންޝިޕް 2023 ގެ ނަމުގައި މި މުބާރާތް ކުރިއަށްދާނީ މި މަހުގެ 21 އިން 25 ގެ ނިޔަލަށެވެ. ރާއްޖޭގެ އިތުރުން މި މުބާރާތުގައި ވާދަކުރާ ގައުމުތަކަކީ ބަންގްލަދޭޝް އާއި، ސްރީ ލަންކާ އަދި ތައިލެންޑެވެ.
އޭޝިއާގެ ބައެއް ގައުމުތަކަށް ދައުވަތު ދީގެން ޓެނިސް އެސޯސިއޭޝަނުން އިންތިޒާމުކޮށްގެން ކުރިއަށްގެންދާ މި މުބާރާތުގައި ޖުމްލަ 48 ކުޅުންތެރިން ބައިވެރިވާއިރު ރާއްޖެއިން ބޭރުގެ 22 ކުޅުންތެރިން ހިމެނެއެވެ.
ރައުންޑް ރޮބިން އުސޫލުން ކުރިއަށްދާ މި މުބާރާތުގެ ފޯމެޓު ރޭވުމުގައި ބޮޑަށް ބަލާފައިވަނީ ދިވެހި ކުޅުންތެރިންނަށް ވީހާވެސް ގިނަ މެޗުތަކެއް ކުޅުމުގެ ފުރުސަތު ތަނަވަސްކޮށްދިނުން ކަމަށް ޓެނިސް އެސޯސިއޭޝަން އޮފް މޯލްޑިވްސްއިން މައުލޫމާތުދެއެވެ. މުބާރާތުގައި ވާދަކުރާ ގައުމުތަކުގެ އެތުލީޓުންގެ ހުރިހާ ހަރަދެއް ބަލަހައްޓަނީ ޓެނިސް އެސޯސިއޭޝަން އޮފް މޯލްޑިވްސްގެ ފަރާތުންނެވެ.
މި މުބާރާތުގައި މިހާތަނަށް ގިނަ މެޗުތަކެއް ކުޅެފައިވީ ނަމަވެސް، ވިއްސާރައިގެ ސަބަބުން ބައެއް މެޗުތައް ވަނީ ފަސްކޮށްފައެވެ.
ޓެނިސް އެސޯސިއޭޝަނުން ވަނީ މި ކުޅިވަރު ފުޅާކުރުމަށް ބާއްވާ ހަރަކާތްތަކުގެ ތެރެއިން ޅ. ނައިފަރުގައި ޒަމާނީ ފެންވަރުގެ ޓެނިސް ކޯޓެއް އަޅާފައެވެ. އަދި ޤައުމީ ފެންވަރުގެ އެތްލީޓުން ބިނާކުރުމަށް ސްކޫލް ޕްރޮގްރާމެއްވެސް ވަނީ ފަށާފައެވެ.
މިއީ ޓެނިސް އެސޯސިއޭޝަން އޮފް މޯލްޑިވްސް އިން ބާއްވާ ބައިނަލްއަޤްވާމީ ދެވަނަ މުބާރާތެވެ. މިދިޔަ އަހަރުވެސް ވަނީ ކާމިޔާބުކަމާއެކު ބައިނަލްއަޤްވާމީ މުބާރާތެއް ބާއްވާފައެވެ.