އެމްޑަބްލިއުއެސްސީ ދިވެހި ޕްރިމިއާ ލީގުގައި ޓީސީ ސްޕޯޓްސް ކުލަބު ބަލިކޮށް، ކުލަބު އީގަލްސްއިން ތާވަލުގެ ކުރީގައި ލީޑު ދަމަހައްޓައިފިއެވެ.
ގައުމީ ފުޓްބޯޅަ ދަނޑުގައި އިއްޔެ ހަވީރު ކުޅުނު މެޗުން އީގަލްސް މޮޅުވީ 2-1 ގެ ނަތީޖާއަކުންނެވެ.
މި މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، މި ހާފުގައި އީގަލްސްއިން ވަނީ ލީޑު ނަގާފައެވެ. މެޗުގެ 39 ވަނަ މިނެޓުގައި ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ފޯވާޑް އިބްރާހީމް މަހުދީ ހުސައިން (ފޭދޫ އިއްބެ) އެވެ.
އެކަމަކު ދެވަނަ ހާފު ފަށައިގެން ނުވަވަނަ މިނެޓުގައި ޓީސީން ވަނީ ނަތީޖާ އެއްވަރުކޮށްފައެވެ. ހަމްދޫން އަބްދުއްލަތީފް އޭރިއާ ތެރެއަށް ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ޒަޔާން ނަސީރެވެ. ނަމަވެސް މެޗުގެ 67 ވަނަ މިނެޓުގައި އީގަލްސްއިން ވަނީ އަލުން މި މެޗުގައި ލީޑު ނަގާފައެވެ. އިސްމާއިލް އީސަ (މެސީ) ނަގައިދިން ހުރަހަކުން މި ލަނޑު ޖަހައިދިނީ ކެޕްޓަން އަޙްމަދު ރިޒުވާން (ރިޒޭ) އެވެ.
މި މޮޅާއެކު ތާވަލުގެ އެއްވަނައިގައި އީގަލްސް އޮތީ ކުޅުނު 11 މެޗުގެ ތެރެއިން ނުވަ މެޗުން މޮޅުވެ 29 ޕޮއިންޓާއެކުއެވެ. އީގަލްސް އަށްވުރެ ދެ މެޗު މަދުން ކުޅެފައިވާ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން ދެވަނައިގައި އޮތީ 25 ޕޮއިންޓާއެކުއެވެ. އަދި އީގަލްސް އަތުން ބަލިވި ޓީސީ އޮތީ ތާވަލުގެ ހަތަރުވަނައިގައި 11 މެޗުން ލިބުނު 19 ޕޮއިންޓާއެކުއެވެ.