އިންޑިއާގައި މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި އިއްޔެ ކުޅުނު ސެމީ ފައިނަލް ދެވަނަ މެޗުގައި ދެކުނު އެފްރިކާ ބަލިކޮށް، ފައިނަލުގެ ފަހު ޖާގަ އޮސްޓްރޭލިއާއިން ހޯދައިފިއެވެ.
ކޮލްކަތާގައި ހުންނަ އެޑެން ގާޑެންސް ސްޓޭޑިއަމުގައި ކުޅުނު މި މެޗުން އޮސްޓްރޭލިއާ މޮޅުވީ ބާކީ 16 ބޯޅަ އޮއްވައި ތިން ވިކެޓުންނެވެ.
މި މެޗުގެ ގުރު ދިމާވުމުން ދެކުނު އެފްރިކާ އެންމެ ފުރަތަމަ ކުޅެން އަރައި ބާކީ ދެ ބޯޅަ އޮއްވައި ހުރިހާ ކުޅުންތެރިން ނުބައިވެގެން ހެދުނީ 212 ލަނޑެވެ. އެ ޓީމުން އެންމެ ރަނގަޅަށް ކުޅުނީ 116 ބޯޅައިން 101 ލަނޑު ހެދި ޑޭވިޑް މިލާއެވެ. މި އިނިންގްސްގައި އޮސްޓްރޭލިއާގެ މިޗެލް ސްޓާކް އާއި ޕެޓް ކަމިންސް ވަނީ ކޮންމެ އުކުންތެރިއަކު ތިން ވިކެޓް ނަގާފައެވެ.
ޖަވާބުގައި އޮސްޓްރޭލިއާ ކުޅެން އަރައި އެ ޓީމުން ވަނީ 47.2 ވަނަ އޯވަރުގައި ހަތް ކުޅުންތެރިން ނުބައިވެގެން 215 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅުނީ 48 ބޯޅައިން 62 ލަނޑު ހެދި ޓްރޭވިސް ހެޑްއެވެ. މި އިނިންގްސްގައި ދެކުނު އެފްރިކާގެ ތަބްރައިޒް ޝާމްސީ އާއި ޖެރަލްޑް ކޮއެޓްޒީ ވަނީ ކޮންމެ އުކުންތެރިއަކު ދެ ވިކެޓް ނަގާފައެވެ.
މި މޮޅާއެކު މުބާރާތުގެ ފައިނަލަށް އޮސްޓްރޭިއާ ދަތުުރުކުރިއިރު، އަންނަ އާދިއްތަ ދުވަހު ކުޅޭ ފައިނަލް މެޗުގައި އެ ޓީމު ނުކުންނާނީ މުބާރާތް ބާއްވާ ގައުމު ކަމަށްވާ އިންޑިއާއާ ދެކޮޅަށެވެ. މި ފަހަރުގެ ފައިނަލަށް އިންޑިއާ ދަތުރުކޮށްފައިވަނީ ސައްތައިން ސައްތަ ރިކޯޑަކާއެކުއެވެ.