އައު ސަރުކާރާއެކު ޗައިނާއިން ދިނީ ދިވެހި ކުޅިވަރަށް އެހީވުމުގައި ދެމިހުންނާނެކަމުގެ ޔަގީންކަން
ނިމިދާ ސަރުކާރުން ކުޅިވަރު އެތްލީޓުން ތަމްރީނުކޮށްދިނުމަށް ޗައިނާއިން ވެދިން އެހީތެރިކަމާއެކު އަންނަން އޮތް ސަރުކާރުގައި ވެސް ދިވެހި އެތްލީޓުންނަށް ފުރުސަތުތައް ފަހިކޮށްދޭނެކަމުގެ ޔަގީންކަން ޗައިނާއިން ދީފިއެވެ.
ޗައިނާގެ ފަރާތުން މި ޔަގީންކަން ދިނީ އިންތިޚާބީ ރައީސް ޑރ. މުޙައްމަދު މުޢިއްޒު ހުވާކުރައްވާ ރަސްމިއްޔާތުގައި ޗައިނާގެ ރައީސްގެ ޚާއްސަ މަންދޫބެއްގެ ހައިސިއްޔަތުން ބައިވެރިވެވަޑައިގަންނަވާ ސްޓޭޓް ކައުންސިލަރު ޝީއެން ވައި އައިޖިން ދިވެހި ކުޅިވަރު އާއިލާއާއި ބައްދަލުކުރައްވާ ވާހަކަފުޅުދައްކަވަމުންނެވެ.
މި ބައްދަލުވުމުގައި ބެޑްމިންޓަން އާއި ޓޭބަލް ޓެނިސްގެ އިތުރުން ސްޕެޝަލް އޮލިމްޕިކްސް އާއި ބެޑްމިންޓަންގެ ބައެއް އެތްލީޓުންނާއި އެސޯސިއޭޝަނުގެ އިސްވެރިން ބައިވެރިވެ ވަޑައިގެންނެވި އެވެ. މީގެ އިތުރުން ކުޅިވަރާ ބެހޭ ވަޒީރު އަހްމަދު މަހްލޫފާއި އަންނަން އޮތް ސަރުކާރުގެ ކުޅިވަރު ވަޒީރުކަމާއި ހަވާލުވާ އަބްދުﷲ ރާފިއުގެ އިތުރުން ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަން ލީޝިން ބައިވެރިވެވަޑައިގެންނެވި އެވެ.
މި ރަސްމިއްޔާތުގެ ކުރިން ޓޭބަލް ޓެނިސް ކުޅުންތެރިންނާއި ޝީއެން ވައި ވަނީ ބައްދަލުކުރައްވާފައެވެ. އަދި ޓޭބަލް ޓެނިސް ރަމްޒީ މެޗެއް ވަނީ ކުޅެފައެވެ. އެއަށްފަހު ނިމިދިޔަ އަހަރުތަކުގައި ޗައިނާގެ އެހީގައިި އެ ޤައުމުގައި ތަމްރީނުވި ދިވެހި ކުޅިވަރުތަކުގެ އިސްވެރިން ވަނީ ވާހަކަދައްކަވާފައެވެ.
ދިވެހި ކުޅިވަރު އާއިލާގެ އިސް ފަރާތްތަކުން ވަނީ ކުރިއަށްއޮތް ތަނުގައި އިތުރު އެހީތެރިކަން ބޭނުންވާކަން ހާމަކޮށްފައެވެ. އެގޮތުން ތަމްރީނުގެ ފުރުސަތުތަކާއި ވަސީލަތްތައް ޤާއިމުކޮށްދިނުމަށް އެ ކުޅިވަރުތަކުން ވަނީ ޗައިނާގެ ކިބައިން އެދިފައެވެ.
އެ ވާހަކަތަކަށް ރައްދުދެއްވަމުން ޗައިނާގެ ރައީސްގެ ޚާއްސަ މަންދޫބު ޝީއެން ވައި އައިޖިން ވިދާޅުވީ ކުރިއަށްއޮތް ތަނުގައިވެސް ރާއްޖެއަށް ކޯޗުން ފޮނުވާނެ ކަމަށާއި ޗައިނާއިން ދިވެހި އެތްލީޓުން ތަމްރީނުކުރުމުގެ ފުރުސަތު ފަހިކޮށްދެއްވާނެ ކަމަށެވެ.
ރާއްޖޭގެ ބާސްކެޓް ޓީމު ވަނީ 2019 ވަނަ އަހަރު ޗައިނާގައި ތަމްރީނު ފުރިހަމަކޮށްފައެވެ. އެ ތަމްރީނުތަކާއެކު އެ އަހަރު އޮތް ސައުތު އޭޝިއަން ގޭމްސްގައި ރާއްޖޭގެ އަންހެން ޓީމު ވަނީ ފުރަތަމަ ފަހަރަށް ބްރޮންޒް މެޑަލް ހޯދާފައެވެ. އަދި ނިމިދިޔަ އިންޑިއަން އޯޝަން އައިލެންޑް ގޭމްސްގައި ތާރީހީ ކާމިޔާބީތަކެއް ހޯދި ޓޭބަލްޓެނިސް ޓީމުންވެސް ވަނީ ޗައިނާއިން ތަމްރީނުވެފައެވެ. އަދި ބެޑްމިންޓަން ޓީމުވެސް ހިމެނެއެވެ.