ހަންގޭރީގައި ކުރިއަށްދިޔަ އެ ގައުމުގެ ގައުމީ ޝޯޓްކޯސް ޗެމްޕިއަންޝިޕްސްގައި ވާދަކޮށް ރާއްޖޭގެ ހަމްނާ އަޙްމަދު، ފެތުމުގެ ގައުމީ ދެ ރިކޯޑެއް މުގުރާލައިފިއެވެ.
އެގޮތުން ހަމްނާ ވަނީ އަންހެނުންގެ ޝޯޓްކޯސް 200 މީޓަރު އިންޑިވިޖުއަލް މެޑްލޭ އާއި 50 މީޓަރު ބްރެސްޓްސްޓްރޯކް އިވެންޓުގެ ގައުމީ ރިކޯޑު މުގުރާލާފައެވެ.
200 މީޓަރު އިންޑިވިޖުއަލް މެޑްލޭގެ ރިކޯޑު ހަމްނާ މުގުރާލީ ދެ މިނެޓު 55.12 ސިކުންތުން ރޭސް ނިންމައިގެންނެވެ. މި ރިކޯޑު މީގެ ކުރިން އޮތީ އައިޝަތު ސައުސަންގެ އަތުގައެވެ. އެއީ 2016 ވަނަ އަހަރު ބޭއްވި 13 ވަނަ ފީނާ ވޯލްޑް ސްވިމިން ޗެމްޕިއަންޝިޕްސްގައި ވާދަކޮށް ދެ މިނެޓު 57.23 ސިކުންތުން ރޭސް ނިންމައިގެންނެވެ.
މީގެ އިތުރުން ހަންގޭރީ މުބާރާތުގައި ވާދަކޮށް 50 މީޓަރު ބްރެސްޓްސްޓްރޯކް އިވެންޓުގެ ގައުމީ ރިކޯޑު ހަމްނާ މުގުރާލީ 37.88 ސިކުންތުން ރޭސް ނިންމައިގެންނެވެ. މި އިވެންޓުގެ ގައުމީ ރިކޯޑު މީގެ ކުރިން އޮތީ އާއިޝަތު ސާޖިނާގެ އަތުގައެވެ. އެއީ 2019 ވަނަ އަހަރު ބޭއްވި 13 ވަނަ ސައުތު އޭޝިއަން ގޭމްސްގައި ވާދަކޮށް 38.53 ސިކުންތުން ރޭސް ނިންމައިގެންނެވެ.
ހަންގޭރީގައި ކުރިއަށްދިޔަ މުބާރާތުގައި 200 މީޓަރު އިންޑިވިޖުއަލް މެޑްލޭ އާއި 50 މީޓަރު ބްރެސްޓްސްޓްރޯކް އިވެންޓުގެ އިތުރުން ތިން އިވެންޓެއްގައި ހަމްނާ ވަނީ ފަތާފައެވެ. އެއީ 50 މީޓަރު ފްރީސްޓައިލާއި، ބެކްސްޓްރޯކް އަދި ބަޓަފްލައި އިވެންޓުގައެވެ.