ޔަހޫދީ ފައުޖުން ޣައްޒާގެ އަލް-ޝިފާ ހޮސްޕިޓަލުގެ ތެރެއަށް ވަދެ، އެ ތަނުގެ ތެރޭގައި ލާއިންސާނީ ޖަރީމާތަކެއް ހިންގައިފިއެވެ. މި ކަމާ މެދު މުޅި ދުނިޔެއިން ކަންބޮޑުވުން ފާޅު ކުރަމުންދާ މި ދަނޑިވަޅުގައި، ޔަހޫދީ ސިފައިން ވަނީ ޣައްޒާގެ އެންމެ ބޮޑު ހޮސްޕިޓަލުގެ ވޯޑުތަކާއި، އޮޕަރޭޝަން ތިއޭޓަރުތަކަށް ވަދެފައެވެ. އެ މީހުން އެ ތަނަށް ވަދެ އުދުވާން ހިންގާފައި ވަނީ ޙަމާސް ޖަމާޢަތުގެ މުޖާހިދުން ހޯދުމުގެ ނަމުގައެވެ.
ޔަހޫދީ ފައުޖުން އޮކްޓޫބަރު 7 ވަނަ ދުވަހުން ޣައްޒާއަށް ބޮން އަޅަން ފެށުމަށް ފަހު، ބަރު ހަތިޔާރާ އެކު އެއްގަމު މަގުން ވެސް ވަނީ ޣައްޒާއަށް ވަދެފައެވެ. އެ މީހުން އެންމެ ފުރަތަމަ ވެސް އަމާޒު ހިފާފައި ވަނީ އަލް-ޝިފާ ހޮސްޕިޓަލާ ދިމާލަށެވެ. އަދި، އެ ތަކެއް ފަހަރެއް މަތިން އެ ހޮސްޕިޓަލަށް ވައިގެ މަގުން ހަމަލަތައް ދީފައިވާއިރު، އަސްކަރީ ޓޭންކުފަހަރާ އެކު ވަނީ އެ ހޮސްޕިޓަލް ވަށައިލާފައެވެ. ބައެއް ޓޭންކުތައް ހޮސްޕިޓަލްގެ ގޭޓުން އެތެރެއަށް ވެސް ވަދެފައިވާ ކަމުގައި މަންޒަރު ފެނުނު މީހުން ބުންޏެވެ.
އެމެރިކާގެ އެހީތެރިކަމާ އެކު ޣައްޒާގައި ލާއިންސާނީ ޖަރީމާތައް ހިންގަމުންދާ ޔަހޫދީ ފައުޖުން ބުނީ އަލް-ޝިފާ ހޮސްޕިޓަލަކީ ޙަމާސް ޖަމާޢަތުން ހަތިޔާރު ގުދަނެއްގެ ގޮތުގައި ބޭނުން ކުރަމުންދާ ތަނެއް ކަމުގައެވެ. އަދި، އެ ތަނުން ގިނަ ޢަދަދެއްގެ ހަތިޔާރު ފެނިފައިވާ ކަމުގައި ވެސް ޔަހޫދީ ފައުޖުން ތުހުމަތު ކުރިއެވެ. ނަމަވެސް، ޙަމާސް ޖަމާޢަތުން ވަނީ މި ތުހުމަތުތައް ދޮގުކޮށްފައެވެ.
ޔަހޫދީ ފައުޖުން އަލް-ޝިފާ ހޮސްޕިޓަލަށް ވަދެ ގަތުލުއާންމު ހިންގާފައި ވަނީ، އެ ތަނުގައި ފަރުވާ ހޯދަމުން ދިޔަ އެތަކެއް ސަތޭކަ ބަލި މީހުންނަށް ބެލުމެއް ނެތިއެވެ. އެއްވެސް ފަރުވާލެއް ނެތިއެވެ. އެ ތަނުން ކަރަންޓުގެ ޚިދުމަތް ވެސް އޮތީ ކެނޑިފައެވެ. މި ކަމާ މެދު ބައިނަލްއަޤުވާމީ މުޖުތަމަޢުން ދަނީ ކަންބޮޑުވުން ފާޅު ކުރަމުންނެވެ. ޔަހޫދީން އެންމެ ފަހުން އެ ތަނަށް ދިން ހަމަލަތަކުގައި ވެސް ތުއްތު ތިން ކުއްޖަކު ޝަހީދު ކޮށްލާފައިވާ ކަމުގައި އެ ހޮސްޕިޓަލުގެ އޮފިޝަލުން ވިދާޅުވިއެވެ.
އަލް-ޝިފާ ހޮސްޕިޓަލަށް ވަދެ އުދުވާންތައް ހިންގުމާ ގުޅިގެން މުޅި ދުނިޔޭގެ ކަންބޮޑުވުން މި ކަމާ ކުރިމަތިވެފައިވާ ވަގުތެއްގައި ދުނިޔޭގެ ޞިއްޙަތު ޖަމުޢިއްޔާގެ ޑިރެކްޓަރ ޖެނެރަލް ޓެޑްރޯސް އަދަނޮމް ގެބްރިއެސޮސް ވަނީ މިއީ އެއްވެސް ހާލެއްގައި ބަލައިގަނެވޭނެ އުދުވާނެއް ނޫން ކަމުގައި ވިދާޅުވެފައެވެ. ހޮސްޕިޓަލްތަކަކީ ހަނގުރާމައިގެ މައިދާނަކަށް ހަދައިލުމުގެ ފުރުޞަތު ޔަހޫދީންނަށް ދީގެން ނުވާނެ ކަމުގައި ވެސް އޭނާ ވިދާޅުވިއެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާގައި ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 11,300 އަށް އަރާފައެވެ. މީގެ ތެރޭގައި 4,500 އެއްހާ ކުޑަކުދިން ވެސް ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 29,000 އަށްވުރެ އިތުރުވެފައެވެ.