ފުޓްބޯޅަ ކުލަބުތަކަށް ފައިސާ ދިނުމުގައި ކުޅިވަރާ ބެހޭ ވުޒާރާއިން ތަފާތުކުރުން ގެންގުޅޭ ކަމަށް ކުލަބު ވެލެންސިއާއިން ބުނެފިއެވެ.
ވެލެންސިއާއިން ވަނީ އެމްޑަބްލިއުއެސްސީ ދިވެހި ޕްރިމިއާ ލީގުގެ ބާކީ އޮތް ބައިގައި ވާދަނުކުރަން ނިންމައި، ލީގުން ވަކިވެފައެވެ. އެގޮތަށް ނިންމާފައިވަނީ މާލީ މައްސަލަތާ ހުރެ އެ ޓީމަށް ކުރިއަށް ދެވޭނެ ހާލަތެއް ނެތުމުންނެވެ. އެކަން ހާމަކޮށް މިއަދު ނެރުނު ނޫސް ބަޔާނެއްގައި ވެލެންސިއާއިން ވަނީ ކުޅިވަރާ ބެހޭ ވުޒާރާއަށް ބޮޑެތި ތުހުމަތުތަކެއް ކޮށްފައެވެ.
ވެލެންސިއާއިން ބުނީ ޕްރެޒިޑެންޓްސް ކަޕް ފުޓްބޯޅަ މުބާރާތް ކާމިޔާބުކުރުމުން ފައިސާގެ އިނާމު އެ ކުލަބަށް ނުދީ، މާޒިޔާ ސްޕޯޓްސް އެންޑް ރެކްރިއޭޝަނުން މުބާރާތުގެ ޗެމްޕިއަންކަން ހޯދުމުން ސަރުކާރުން އެ ކުލަބަށް އިނާމު ފައިސާ ދީފައިވާ ކަމަށެވެ.
ވޭތުދިޔަ ފަސް އަހަރުގެ ތެރޭގައި ރައީސުލްޖުމްހޫރިއްޔާގެ ވާދައިގެ ތައްޓަށް ކުޅެވޭ ފުޓްބޯޅަ މުބާރާތް ބޭއްވީ އެންމެ ދެ ފަހަރެވެ. އޭގެ ތެރެއިން މިދިޔަ އަހަރު ރ. އަލިފުށީގައި ބޭއްވި ފައިނަލް މެޗުގައި ވާދަކޮށް ވެލެންސިއާއިން ތަށި ކާމިޔާބުކުރީ މާޒިޔާ ބަލިކުރުމަށްފަހުއެވެ.
ވެލެންސިއާއިން ބުނީ މިދިޔަ އަހަރުގެ ޕްރެޒިޑެންޓްސް ކަޕް ކާމިޔާބުކުރުމުން އިނާމު ފައިސާ އެ ކުލަބަށް ނުދީ، މި އަހަރުގެ ޕްރެޒިޑެންޓްސް ކަޕް މާޒިޔާއިން ހޯދުމުން އެ ޓީމަށް ފައިސާގެ އިނާމު ސަރުކާރުން ދީފައިވާ ކަމަށެވެ. ޕްރެޒިޑެންޓްސް ކަޕުގެ ޗެމްޕިއަންކަން ހޯދާ ޓީމަށް ސަރުކާރުން ފަސް ލައްކަ ރުފިޔާގެ ފައިސާގެ އިނާމެއް މީގެ ކުރިން އަންނަނީ ދެމުންނެވެ.
މީގެ އިތުރުން ފުރަތަމަ ޑިވިޝަނުގެ ކޮންމެ ކުލަބަކަށް އެއް މިލިޔަން ރުފިޔާ ދިނުމަށް ރައީސުލްޖުމްހުރިއްޔާ އިބްރާހީމް މުޙައްމަދު ޞާލިޙް ވީ ވައުދު ފުއްދުމުގައިވެސް ކުޅިވަރާ ބެހޭ ވުޒާރާއިން ކުލަބުތަކުގެ މެދުގައި ތަފާތުކޮށްފައިވާ ކަމަށް ވެލެންސިއާގެ ބަޔާނުގައި ވަނީ ބުނެފައެވެ.
އެގޮތުން މާޒިޔާ އާއި، ކުލަބު އީގަލްސް އާއި، ސުޕަ ޔުނައިޓެޑް ސްޕޯޓްސް (ސަސް) އަދި ބުރު ސްޕޯޓްސް ކުލަބަށް އެއް މިލިޔަން ރުފިޔާ ދީފައިވީ ނަމަވެސް، ވެލެންސިއާ އާއި، ޓީސީ ސްޕޯޓްސް ކުލަބާއި، ކުލަބު ގްރީން ސްޓްރީޓްސް އަދި ޔުނައިޓެޑް ވިކްޓަރީ (ޔޫވީ) އަށް ވުޒާރާއިން ދިނީ ކޮންމެ ކުލަބަކަށް ދެ ލައްކަ ފަންސާސް ހާސް ރުފިޔާއެވެ.
މީގެ އިތުރުން ވެލެންސިއާގެ ބަޔާނުގައި ވަނީ މިދިޔަ އަހަރުގެ އޭއެފްސީ ކަޕް ފުޓްބޯޅަ މުބާރާތް ކުޅުމަށް އެ ކުލަބަށް އެހީތެރިވެދިނުމުގައިވެސް ކުޅިވަރާ ބެހޭ ވުޒާރާއިން އަމަލުކޮށްފައިވަނީ ވަރަށް ފަރުވާކުޑަ އުސޫލަކުން ކަމަށް ބުނެފައެވެ.
އެގޮތުން އެ އަހަރުގެ މުބާރާތުގެ ދެކުނު އޭޝިއާ ޕްރިލިމިނަރީ ދެވަނަ ބުރުގައި ބަންގްލަދޭޝްގެ ޑާކާ އަބަހާނީއާ ދެކޮޅަށް ކުޅޭ މެޗަށް އެ ގައުމަށް ދިޔުމަސް ވެލެންސިއާއިން ކުރި މަސައްކަތް ނާކާމިޔާބުވީ މާލީ ދަތިކަމާއެކުއެވެ. އެ ފަހަރު ވުޒާރާއިން ބުނީ އަބަހާނީއާ ދެކޮޅަށް ކުޅެން އޮތް މެޗަށް ދަތުރު ޓިކެޓު ވެލެންސިއާއަށް ދީފައިވާނެ ކަމަށާއި، އެކަމަކު އެހެނިހެން ޚަރަދު ފައިސާ ނުދެވުނީ އެ ކުލަބުގެ އެކައުންޓެއް ނެތުމުން ކަމަށެވެ.
ވެލެންސިއާއަށް މާލީ ދަތިތަކެއް ކުރިމަތިވެފައިވާއިރު، އެ ކުލަބަށް މިދިޔަ އަހަރާއި މި އަހަރު ލިބެންޖެހޭ ގިނަ ފައިސާތަކެއް ނުލިބި ހުރުމުން ކުޅުންތެރިންނަށް މުސާރަ ދިނުމާއި ކުލަބުގެ ޚަރަދުތައް ހަމަޖައްސަން ދަތިތަކެއް ދިމާވެފައިވާކަން ވަނީ ފާހަގަކޮށްފައެވެ.
ދިވެހި ޕްރިމިއާ ލީގުގެ ބާކީ އޮތް ބައިގައި ވާދަނުކުރަން ވެލެންސިއާއިން ނިންމާފައިވާއިރު، މިހާރު ކުރިއަށްދަނީ ލީގުގެ ދެވަނަ ބުރުގެ ކުޅުމެވެ. ލީގުގައި މިހާތަނަށް ކުޅުނު ނުވަ މެޗުންވެސް ވެލެންސިއާއަށް މޮޅެއް ހޯދިފައި ނުވާއިރު، އެ ޓީމު އޮތީ ތާވަލުގެ ފުލުގައި އެންމެ ދެ ޕޮއިންޓާއެކުއެވެ.