ޣައްޒާގައި ހުންނަ އެންމެ ބޮޑު ހޮސްޕިޓަލް ކަމުގައިވާ އަލް-ޝިފާ ހޮސްޕިޓަލަށް ބޮންއަޅައި، އެ ތަނުގައި ހުންނަ ހިތުގެ ބަލިތަކަށް ފަރުވާދޭ ވޯޑު ސުންނާފަތި ކޮށްލައިފިއެވެ. އަލް-ޝިފާ ހޮސްޕިޓަލުގައި ވަކިން ހުންނަ ދެ ފަންގިފިލާއަށް ނަގާފައިވާ ޢިމާރާތަށް ޔަހޫދީން ހަމަލާ ދީފައި ވަނީ، ޣައްޒާގައި މިހާރު ހިންގަމުންދާ ލާއިންސާނީ ގަތުލުއާންމުގެ ތެރެއިންނެވެ. މިއީ، ޔަހޫދީން އަލް-ޝިފާ ހޮސްޕިޓަލަށް ހަމަލާދިން ފުރަތަމަ ފަހަރެއް ނޫނެވެ.
ޣައްޒާގެ ހޮސްޕިޓަލްތަކަށް އަމާޒުކޮށް ޔަހޫދީން ދެމުންދާ މިފަދަ ހަމަލާތައް ފަހަކަށް އައިސް ވަނީ އިތުރު ކޮށްފައެވެ. އަލް-ޝިފާ ހޮސްޕިޓަލުގެ އިތުރުން އަލް-އަހްލީ ހޮސްޕިޓަލާއި، އަލް-ޤުދުސް ހޮސްޕިޓަލާއި، އަލް-ނަޞްރު ކުޑަކުދިންގެ ހޮސްޕިޓަލާއި، އިންޑޮނީޝިޔާ ހޮސްޕިޓަލަށް ވެސް ޔަހޫދީން ދަނީ ހަމަލަތައް އަމާޒު ކުރަމުންނެވެ. އަދި، އެ ހޮސްޕިޓަލްތަކުގެ އެމްބިޔުލާންސްތަކަށް ވެސް ބޮން އަޅަމުންނެވެ.
"އަލް-ޝިފާ ހޮސްޕިޓަލުގެ ހިތުގެ ބަލިތަކަށް ފަރުވާދޭ ވޯޑު ހުންނަނީ ދެ ފަންގިފިލައަށް ނަގާފައިވާ ޢިމާރާތެއްގައި. ޔަހޫދީން ވަނީ އެ ޢިމާރާތަށް ބޮން އަޅައި އެ ތަން ސުންނާފަތި ކޮށްލާފައި،" ޣައްޒާގެ ޞިއްޙަތާ ބެހޭ ވަޒީރުގެ ނައިބު ޔޫސުފް އަބޫ ރީޝް ވިދާޅުވިއެވެ. މި ހަމަލާގައި ޝަހީދު ކޮށްލާފައިވާ މީހުންގެ ޢަދަދު ސާފެއް ނޫނެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 11,100 އަށް އުފުލިފައެވެ. އޭގެ ތެރޭގައި 4,500 އަށްވުރެ ގިނަ ޢަދަދެއްގެ ކުޑަކުދިން ހިމެނޭއިރު، ޒަޚަމު ކޮށްލާފައިވާ މީހުންގެ ޢަދަދު 24,000 އަށް އަރައެވެ. ޔަހޫދީންގެ ގަތުލުއާންމު ހިންގަމުން ދަނީ އެމެރިކާގެ ރުހުމާއި، އެއްބާރުލުމާއި އެހީތެރިކަމާ އެކުގައެވެ.
އަލް-ޝިފާ ހޮސްޕިޓަލަށް ޔަހޫދީން ދިން ރަޙުމު ކުޑަ ހަމަލަތަކާ ގުޅިގެން ޙަމާސް ޖަމާޢަތުން ވަނީ އެ ޖަމާޢަތުން ރަހީނު ކޮށްފައިވާ އަސީރުން މިނިވަން ކުރުމާ ގުޅޭ ގޮތުން ކުރަމުންދިޔަ މަޝްވަރާތައް މެދުކަނޑައިލަން ނިންމާފައެވެ. އަސީރުން މިނިވަން ކުރުމާ ގުޅޭ މަޝްވަރާތަކުގައި މެދުވެރިއެއްގެ ދައުރު އަދާ ކުރަމުން ދަނީ ޤަޠަރުންނެވެ.
މަޝްވަރާތައް މެދުކަނޑައިލަން ޙަމާސް ޖަމާޢަތުން ނިންމާފައިވީ ނަމަވެސް، އަސީރުން މިނިވަން ކުރުމާ ގުޅޭ އެއްބަސްވުމެއް އެކުލަވައިލުމުގެ މަސައްކަތް ހަލުވިކަމާ އެކު ކުރިއަށްދާ ކަމުގައި ޒަޔަނިސްޓު އިސްރާޢީލުގެ ޖައްބާރު ބޮޑުވަޒީރު ބެންޖަމިން ނަތަންޔާހޫ ބުންޏެވެ. އަދި، ކުރިއަށް އޮތް މަދު ދުވަސްކޮޅެއްގެ ތެރޭގައި އެއްބަސްވުމެއް އެކުލަވައިލެވޭނެ ކަމުގައި ވެސް އޭނާ ބުންޏެވެ.