އިންޑިއާގައި މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި އިއްޔެ ކުޅުނު މެޗުން ޕާކިސްތާން ބަލިވުމާއެކު، ސެމީ ފައިނަލުގެ ފަހު ޖާގަ ނިއު ޒީލަންޑަށް ލިބިއްޖެއެވެ.
ކޮލްކަތާގައި ހުންނަ އެޑެން ގާޑެންސް ސްޓޭޑިއަމުގައި ކުޅުނު މެޗުން ޕާކިސްތާން ބަލިވީ އެންމެ ފަހުގެ ޗެމްޕިއަން އިންގްލަންޑާ ވާދަކޮށް 93 ލަނޑުންނެވެ.
މި މެޗުގެ ގުރު ދިމާވުމުން އިންގްލަންޑް އެންމެ ފުރަތަމަ ކުޅެން އަރައި 50 އޯވަރު ހަމަވިއިރު ނުވަ ކުޅުންތެރިން ނުބައިވެގެން ވަނީ 337 ލަނޑު ހަދާފައެވެ. އެ ޓީމުން އެންމެ ރަނގަޅަށް ކުޅުނީ 76 ބޯޅައިން 84 ލަނޑު ހެދި ބެން ސްޓޯކްސް އާއި 72 ބޯޅައިން 60 ލަނޑު އެއްކުރި ޖޯ ރޫޓެވެ. މި އިނިންގްސްގައި ޕާކިސްތާނުގެ ހާރިސް ރައުފް ވަނީ 10 އޯވަރުގައި 64 ލަނޑަށް ތިން ވިކެޓް ނަގާފައެވެ.
ޖަވާބުގައި ޕާކިސްތާން ކުޅެން އަރައި 43.3 ވަނަ އޯވަރުގައި ހުރިހާ ކުޅުންތެރިން ނުބައިވެގެން ހެދުނީ 244 ލަނޑެވެ. އެ ޓީމުން އެންމެ ރަނގަޅަށް ކުޅުނީ 45 ބޯޅައިން 51 ލަނޑު ހެދި ސަލްމާން އަލީ އާއި 45 ބޯޅައިން 38 ލަނޑު އެއްކުރި ޓީމ8ުގެ ކެޕްޓަން ބާބަރު އާޒަމެވެ. މި އިނިންގްސްގައި އންގްލަންޑުގެ ޑޭވިޑް ވިލޭ ވަނީ 10 އޯވަރުގައި 56 ލަނޑަށް ތިން ވިކެޓް ނަގާފައެވެ.
މި ނަތީޖާއާއެކު 10 ޤައުމު ވާދަކުރާ މި މުބާރާތުގެ ސެމީގެ ޖާގައެއް ޕާކިސްތާނަށް ގެއްލުނުއިރު، އެ ޓީމު އޮތީ ތާވަލުގެ ފަސްވަނައިގައި ކުޅުނު ނުވަ މެޗުން ލިބުނު އަށް ޕޮއިންޓާއެކުއެވެ. ތާވަލުގެ ހަތަރުވަނަ ހޯދައި ސެމީގެ ފަހު ޖާގަ ހޯދި ނިއު ޒީލަންޑަށް ވަނީ ނުވަ މެޗުން 10 ޕޮއިންޓް ލިބިފައެވެ.
މި މުބާރާތުގައި އިއްޔެ ކުޅުނު އަނެއް މެޗުގައި ސެމީގެ ޖާގައެއް ހޯދާފައިވާ އޮސްޓްރޭލިއާއިން ވަނީ ބަންގްލަދޭޝް އަތުން އަށް ވިކެޓުން މޮޅުވެފައެވެ. އެއާއެކު ތާވަލުގެ ތިންވަނައިގައި އޮސްޓްރޭލިއާ އޮތީ ނުވަ މެޗުން 14 ޕޮއިންޓާއެކުއެވެ. މި މުބާރާތުގެ ސެމީގެ ޖާގަތައް މިހާރު ކަށަވަރުވެފައިވާއިރު، ސެމީގައި ނިއު ޒީލަންޑް ނުކުންނާނީ އިންޑިއާއާ ދެކޮޅަށެވެ. އަދި އޮސްޓްރޭލިއާ ވާދަކުރަން ޖެހޭނީ ދެކުނު އެފްރިކާއާއެވެ.