ދެކުނު ކޮރެއާގައި މިހާރު ކުރިޔަށްދާ 14 ވަނަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕުން ރާއްޖޭގެ އަޒްނީން ރަޝާދު އަނެއްކާވެސް ރަން މެޑަލް ހޯދައިފިއެވެ.
މި މަހުގެ 6 އިން 12 އަށް ދެކުނު ކޮރެއާގެ އޯކް ވެލީ ރިޒޯޓުގައި ކުރިޔަށްދާ މި މުބާރާތުން އަޒްނީން ރަން މެޑަލް ހޯދާފައިވަނީ ސްޕޯޓްސް ފިޒީކް 170 ސެންޓިމީޓަރ ކެޓަގަރީންނެވެ.
އެންމެ ފަހުން މިދިޔަ އަހަރު ތައިލޭންޑުގައި ބޭއްވި ވޯލްޑް ޗެމްޕިއަންޝިޕުންވެސް އަޒްނީން ވަނީ މި ކެޓަގަރީން ރަން މެޑަލް ހާސިލުކޮށްފައެވެ. މިދިޔަ އަހަރު އަޒްނީން މި ވަނަ ހޯދީ 44 ޤައުމަކާއި ވާދަކޮށްގެންނެވެ. މިއަހަރު އޭނާ ރަން މެޑަލް ހޯދީ 48 ޤައުމަކާއި ވާދަކޮށްގެންނެވެ.
މީގެ ދެމަސް ކުރިން ނޭޕާލްގެ ކަތްމަންޑޫގައި ބޭއްވި އޭޝިއާ މުބާރާތުން އަޒްނީން ރަޝާދު ވަނީ އޭނާ ވާދަކުރި ސްޕޯޓްސް ފިޒީކް ބައިގެ 170 ސެންޓިމީޓަރު ކެޓަގަރީން ރަން މެޑަލް ހޯދާފައެވެ.
މިއީ ރާއްޖޭގެ އެތްލީޓަކު ވޯލްޑް ޗެމްޕިއަންޝިޕަކުން ރަން މެޑަލް ޖެހިޖެހިގެން ހޯދި ދެވަނަ ފަހަރެވެ. އަދި މިއީ ރާއްޖޭގެ ކުޅިވަރު ތާރީހުގައި ކުޅިވަރަކުން ދިވެހި އެތްލީޓަކު ހޯދި އެންމެ ބޮޑު ކާމިޔާބީއެވެ.
މީގެއިތުރުން މި މުބާރާތުގައި ވާދަކުރާ ދިވެހި އެތްލީޓުންގެ ތެރެއިން އަބްދުﷲ އަހުސަން ވަނީ އޭނާ ވާދަކުރި މެންސް އެތްލެޓިކް ފިޒީކް 167 ސެންޓިމީޓަރ ކެޓަގަރީން ބްރޮންޒް މެޑަލް ހޯދާފައެވެ.
މިއަހަރުގެ ވޯލްޑް ޗެމްޕިއަންޝިޕުގައި ދުނިޔޭގެ އެކި ކަންކޮޅުތަކުން 400 އެއްހާ އެތްލީޓުން ވާދަކުރެއެވެ. އަންނަ އަހަރުގެ ވޯލްޑް ޗެމްޕިއަންޝިޕް ބޭއްވުމަށް ތާވަލުކޮށްފައިވަނީ ރާއްޖޭގައެވެ.