އިންޑިއާގައި މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި އިއްޔެ ކުޅުނު މެޗުގައި އަފްޣާނިސްތާން ބަލިކޮށް، ސެމީ ފައިނަލުން ފުރުސަތު ހޯދާފައިވާ ދެކުނު އެފްރިކާއިން މޮޅަކާއެކު ލީގު ބުރު ނިންމާލައިފިއެވެ.
އެހެމްދަބާދުގައި ހުންނަ ނަރެންދުރަ މޯދީ ސްޓޭޑިއަމުގައި ކުޅުނު މި މެޗުން ދެކުނު އެފްރިކާ މޮޅުވީ ބާކީ 15 ބޯޅަ އޮއްވައި ފަސް ވިކެޓުންނެވެ.
މި މެޗުގެ ގުރު ދިމާވުމުން އަފްޣާނިސްތާން އެންމެ ފުރަތަމަ ކުޅެން އަރައި 50 އޯވަރަށް ހެދުނީ 244 ލަނޑެވެ. އެ ޓީމުން އެންމެ ރަނގަޅަށް ކުޅުނީ ނުބައިނުވެ 107 ބޯޅައިން 97 ލަނޑު ހެދި އަޒްމަތުﷲ އޮމަރްޒައިއެވެ. މި އިނިންގްސްގައި ދެކުނު އެފްރިކާގެ ޖެރަލްޑް ކޯޓްޒީ ވަނީ 10 އޯވަރުގައި 44 ލަނޑަށް ހަތަރު ވިކެޓް ނަގާފައެވެ.
ޖަވާބުގައި ދެކުނު އެފްރިކާ ކުޅެން އަރައި އެ ޓީމުން ވަނީ 47.3 ވަނަ އޯވަރުގައި ފަސް ކުޅުންތެރިން ނުބައިވެގެން 247 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅުނީ ނުބައިނުވެ 95 ބޯޅައިން 76 ލަނޑު ހެދި ރަސީ ވެން ޑާ ޑަސަންއެވެ.
މި މޮޅާއެކު 10 ޤައުމު ވާދަކުރާ މި މުބާރާތުގެ ލީގު ބުރުގެ ކުޅުން ދެކުނު އެފްރިކާއިން ނިންމާލިއިރު، އެ ޓީމު އޮތީ ތާވަލުގެ ދެވަނައިގައި ކުޅުނު ނުވަ މެޗުން ލިބުނު 14 ޕޮއިންޓާއެކުއެވެ. ދެކުނު އެފްރިކާއިން މީގެ ކުރިންވެސް ސެމީގެ ޖާގައެއް ޔަގީންކޮށްފައިވާއިރު، ސެމީއަށް ދެން ދަތުރުކޮށްފައިވަނީ ތާވަލުގެ އެއްވަނައިގައި އޮތް އިންޑިއާ އާއި ތިންވަނައިގައި އޮތް އޮސްޓްރޭލިއާއެވެ.