ޔަހޫދީ ފައުޖުން ޣައްޒާއަށް ދެމުންދާ ހަމަލަތަކާ ގުޅިގެން އެ ސަހަރުގައި ހުންނަ އަލް-ނަޞްރު ކުޑަކުދިންގެ ހޮސްޕިޓަލް ބަންދު ކުރަން ޖެހިއްޖެއެވެ. އެ ހޮސްޕިޓަލަކީ ތުއްތު ކުދިންނާއި ކުޑަކުދިންގެ ބަލިތަކަށް ފަރުވާ ދިނުމަށް ޚާއްޞަކޮށްފައިވާ ޣައްޒާގެ ހަމައެކަނި ހޮސްޕިޓަލެވެ.
ޔަހޫދީ ފައުޖުން އެމެރިކާގެ އެހީތެރިކަމާ އެކު ޣައްޒާގައި ހިންގަމުންދާ ގަތުލުއާންމުގައި އަލް-ނަޞްރު ހޮސްޕިޓަލަށް ވަރުގަދަ ހަމަލަތަކެއް ދީފައިވެއެވެ. މި ހަމަލަތަކުގައި ހޮސްޕިޓަލުގެ ޢިމާރާތަށް ބޮޑެތި ގެއްލުންތަކެއް ލިބިފައިވާއިރު، ޣައްޒާގެ ފުރަބަންދާ އެކު އެ ތަނަށް ކަރަންޓުގެ ޚިދުމަތް ދިނުމަށް ބޭނުންވާ ތެޔޮ ވަނީ ހުސްވެފައެވެ. އަދި، ކަރަންޓުގެ ޚިދުމަތް މުޅިން ކެނޑި ދާނެ ކަމަށާއި، ހޮސްޕިޓަލް ބަންދު ކުރަން ޖެހިފައިވާ ކަމުގައި އެ ހޮސްޕިޓަލުގެ އޮފިޝަލުން ވިދާޅުވެއެވެ.
އަލް-ނަޞްރު ހޮސްޕިޓަލުގެ ޑިރެކްތަރު މުޞްޠަފާ ކަޙްލޫތު ވިދާޅުވީ ފާއިތުވި 24 ވަރަކަށް ގަޑިއިރުގެ ތެރޭގައި ޔަހޫދީ ފައުޖުން ދެ ފަހަރެއްގެ މަތިން އެ ހޮސްޕިޓަލަށް ބޮން އަޅާފައިވާ ކަމުގައެވެ. އަދި، ހޮސްޕިޓަލުގެ ޢިމާރާތަށް ބޮޑެތި ގެއްލުންތަކެއް ދީފައިވާ ކަމުގައެވެ.
"ފުރަތަމަ ހަމަލަ އަމާޒު ކޮށްފައި ވަނީ ހޮސްޕިޓަލުގެ މައި ދޮރާއްޓަށް. ދެވަނަ ހަމަލަ ދީފައި ވަނީ ކުޑަކުދިންނަށް ފަރުވާ ދިނުމަށް ބޭނުން ކުރާ ވޯޑަކަށް. އައި.ސީ.ޔޫ އަދި ތުއްތު ކުދިންނަށް ފަރުވާ ދިނުމަށް ބޭނުން ކުރާ އިންކިޔުބޭޓަރުތަކަށް އޮކްސިޖަން ފޯރުކޮށްދެވޭނެ ގޮތެއް ނެތް. ކަރަންޓު ކެނޑިއްޖެއްޔާ ގިނަ ޢަދަދެއްގެ ބަލި މީހުންގެ ފުރާނަ ގެއްލޭނެ،" ކަޙްލޫތު ވިދާޅުވިއެވެ.
މީގެ ކުރިން ވެސް ޔަހޫދީ ފައުޖުން އަލް-ނަޞްރު ހޮސްޕިޓަލަށް ވަރުގަދަ ހަމަލަތަކެއް ދީފައިވެއެވެ. އެ ހަމަލަތަކާ ގުޅިގެން އެތަކެއް ފަހަރަކު ހޮސްޕިޓަލުން ކަރަންޓުގެ ޚިދުމަތް ކެނޑި، އެ ތަނުގައި ފަރުވާ ދެމުންދިޔަ ބައެއް ބަލި މީހުން ޝަހީދުވި ކަމުގައި ކަޙްލޫތު ވިދާޅުވިއެވެ.
"ހޮސްޕިޓަލަށް ފަރުވާ ހޯދަން އަންނަ ކޮންމެ މީހަކަށް އަމާޒުކޮށް ޔަހޫދީ ފައުޖުން ދަނީ ހަމަލަ ދެމުން. އެމްބިޔުލާންސްތަކަށް ވަދެނިކުމެ ހެދޭނެ ގޮތެއް ނެތް. މި ތަނަށް ވަންނަން އަންނަ އެމްބިޔުލާންސްތަކަށް ވެސް ޔަހޫދީން ދަނީ ބޮން އަޅަމުން. އަހަރުމެން މި ތިބީ މި ތަނުގެ ތެރޭގައި ތާށިވެފައި. މި ތަނުގައި ތިބި ބަލި މީހުން ސަލާމަތް ކޮށްދޭން ރެޑް ކްރޮސްއާއި ރެޑް ކްރެސެންޓާއި ބައިނަލްއަޤުވާމީ ޖަމުޢިއްޔާތަކަށް ގޮވައިލަން،" ކަޙްލޫތު ވިދާޅުވިއެވެ.
އަލް-ނަޞްރު ހޮސްޕިޓަލުގެ އިތުރުން ޣައްޒާގައި އޮންނަ އެހެން ހޮސްޕިޓަލްތަކަށް ވެސް ޔަހޫދީންގެ ހަމަލަތައް އަމާޒު ކުރަމުންދާ ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ބުނެއެވެ. މި ގޮތުން އިންޑޮނީޝިޔާ ހޮސްޕިޓަލަށް ވަރުގަދަ ހަމަލަތަކެއްދީ ގިނަ ޢަދަދެއްގެ ބަޔަކު ޒަޚަމު ކޮށްލާފައިވާ ކަމުގައި އެ ވުޒާރާއިން ބުނެއެވެ. އެ ތަނަކީ، ގެދޮރު ނެތިފައިވާ އެތަކެއް ހާސް ބަޔަކު ދިރިއުޅެމުންދާ ހޮސްޕިޓަލެކެވެ.
ފާއިތުވި 24 ގަޑިއިރުގެ ތެރޭގައި އަލް-ޝިފާ ހޮސްޕިޓަލަށް ވެސް ޔަހޫދީން ވަނީ އަސްކަރީ ޓޭންކާއި މަތިންދާބޯޓުތައް ބޭނުންކޮށްގެން ހަމަލަ ދީފައެވެ. މި ހަމަލަތަކުގައި ހަ މީހުން ޝަހީދު ކޮށްލާފައިވާ ކަމަށާއި، ގިނަ ޢަދަދެއްގެ ބަޔަކު ޒަޚަމު ކޮށްލާފައިވާ ކަމުގައި އޮފިޝަލުން ވިދާޅުވިއެވެ. އަލް-ރަންތީސީ ހޮސްޕިޓަލަށް ވެސް ޔަހޫދީން ހަމަލަދީފައިވެއެވެ.
ޔަހޫދީ ފައުޖުން މިހާރު މަސައްކަތް ކުރަމުން ދަނީ ޣައްޒާގެ އިރުމަތީގައި އޮންނަ ބެއިތު ޙާނޫނާއި ބެއިތު ލާހިޔާއަށް އަރާށެވެ. އަދި، އަލް-ޝަޠައު ރެފިއުޖީ ކޭމްޕަށް ވަދެ، ގަތުލުއާންމު ވަރުގަދަ ކުރާށެވެ. އެއްގަމު މަގުން ޚާނީ ޔޫނުސާއި ރަފަޙަށް އަރަން ވެސް ޔަހޫދީ ފައުޖުން ދަނީ މަސައްކަތް ކުރަމުންނެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުން ޣައްޒާގައި ހިންގަމުންދާ ލާއިންސާނީ ޖާރީމާތަކުގައި ޝަހީދު ކޮށްލާފައިވާ މީހުންގެ ޢަދަދު ވަނީ 10,812 އަށް އަރާފައެވެ. އޭގެ ތެރޭގައި 4,300 އަށްވުރެ ގިނަ ޢަދަދެއްގެ ކުޑަކުދިން ހިމެނޭއިރު، ޒަޚަމު ކޮށްލާފައިވާ މީހުންގެ ޢަދަދު މިހާރު ވަނީ 24,000 އަށް އުފުލިފައެވެ.