ޣައްޒާގެ މުސްލިމުންނާ ދެކޮޅަށް ނިއުކްލިޔަރ ހަތިޔާރު ބޭނުން ކުރަން ޒަޔަނިސްޓު އިސްރާޢީލުގެ ހެރިޓޭޖާ ބެހޭ ވަޒީރު އަނިޚާއި އެލިޔާހޫ ހިތްވަރުދިން މައްސަލަ އެޓޮމިކް ހަކަތައާ ބެހޭ ބައިނަލްއަޤުވާމީ އިދާރާ – އިންޓަރނޭޝަނަލް އެޓޮމިކް އެނަރޖީ އޭޖެންސީ (އައި.އޭ.އީ.އޭ)އަށް ހުށަހަޅައިފިއެވެ. ފަލަސްޠީނުގެ ޚާރިޖީ ވަޒީރު ރިޔާޟް އަލް-މާލިކީ ވިދާޅުވީ، އެ މައްސަލައާ ގުޅޭ ޝަކުވާ އައި.އޭ.އީ.އޭއަށް ރަސްމީކޮށް ހުށަހަޅާފައިވާނެ ކަމުގައެވެ.
ފަލަސްޠީނުގެ ނޫސް އޭޖެންސީ ވަފާއިން ބުނީ، މި ކަމުގެ ޝަކުވާކޮށް، އައި.އޭ.އީ.އޭގެ ޑިރެކްޓަރ ޖެނެރަލް ރަފަޔަލް މަރިއާނޯ ގްރޮސީއަށް އަލް-މާލިކީ ސިޓީއެއް ފޮނުއްވާފައިވާ ކަމުގައެވެ. އެ ސިޓީގައި، އެލިޔާހޫގެ އިންޒާރުގެ މައްސަލަ ބަލައިދިނުމަށް އެދިފައިވާ ކަމުގައި ވެސް އެ ނޫހުން ރިޕޯޓު ކުރެއެވެ.
އެލިޔާހޫގެ ބަސްތަކާ އެކު ޒަޔަނިސްޓު އިސްރާޢީލުން ފަލަސްޠީނުގެ މުސްލިމުންނާ މެދު ދެކޭ ގޮތް ހާމަވެގެން ގޮސްފައިވާ ކަމަށާއި، މިއީ އިސްރާޢީލުން ނިއުކްލިޔަރ ހަތިޔާރު ގެންގުޅޭ ކަމަށް ރަސްމީކޮށް އެއްބަސްވުމުގެ ގޮތުގައި ދެކޭ ކަމުގައި ވެސް އަލް-މާލިކީ ވިދާޅުވިއެވެ. ނިއުކްލިޔަރ ހަތިޔާރު ހުރި ކަމަށް ޒަޔަނިސްޓު އިސްރާޢީލުން ރަސްމީކޮށް ދުވަހަކު ވެސް އެއްބަސްވެފައެއް ނުވެއެވެ. ނަމަވެސް، އެމެރިކާގެ އެހީތެރިކަމާ އެކު ޔަހޫދީން ނިއުކްލިޔަރ ހަތިޔާރު ހޯދާފައިވާ ކަމަކީ މުޅި ދުނިޔެ ވެސް ގަބޫލުކުރާ ކަމެކެވެ.
ރޭޑިޔޯ ޕުރޮގުރާމަކަށް ދާދި ފަހުން ދިން އިންޓަރވިއުއެއްގައި ޙަމާސް ޖަމާޢަތް ނައްތައިލުމުގެ ބޭނުމުގައި ޣައްޒާގެ މުސްލިމުންނާ ދެކޮޅަށް 'ނިއުކްލިޔަރ' ހަމަލައެއް ދިނުމުގެ އިޚުތިޔާރު ޒަޔަނިސްޓު އިސްރާޢީލަށް ލިބިގެންވޭތޯ ސުވާލު ކުރުމުން އެލިޔާހޫ ބުނީ، "އެއީ [އެ ކަން ކުރެވިދާނެ] އެއް ގޮތް،" ކަމުގައެވެ. މި ކަމަށް ދުނިޔޭގެ އެކި ކަންކޮޅުތަކުގެ ފާޑު ކިޔުންތައް އަމާޒުވިއެވެ.
މި ކަމާ ގުޅިގެން ދުނިޔޭގެ އެކި ކަންކޮޅުތަކުގެ ފާޑުކިޔުންތައް ވަނީ ޒަޔަނިސްޓު އިސްރާޢީލާއި ބޮޑުވަޒީރު ބެންޖަމިން ނަތަންޔާހޫއަށް އަމާޒު ވެފައެވެ. އަދި، ފާޑުކިޔުންތަކުން ރެކެން ނަތަންޔާހޫގެ ސަރުކާރުން ވަނީ ވަޒީރު ކަމުގެ މަޤާމުން އެލިޔާހޫ ވަގުތީ ގޮތުން ދުރު ކޮށްފައިވާ ކަމަށް ބުނެފައެވެ. "އެލިޔާހޫ ދައްކާފައިވާ ވާހަކައަކީ ހަޤީޤަތެއްގެ މައްޗަށް ބިނާ ކޮށްފައިވާ ވާހަކައެއް ނޫން. އިސްރާޢީލާއި ޔަހޫދީ ފައުޖުން އަމަލު ކުރަމުން މި ދަނީ ބައިނަލްއަޤުވާމީ ޤާނޫނުތަކާއި ހުދޫދުތަކުގެ ތެރެއިން،" އެލިޔާހޫ ބުނި ބަސްތަކުން ބަރީޢަވާން ނަތަންޔާހޫގެ ސަރުކާރުން ބުންޏެވެ.
އަލް-މާލިކީ ވިދާޅުވީ، ޒަޔަނިސްޓު އިސްރާޢީލުން ފަނާކުރަނިވި ހަތިޔާރު އުފައްދަމުންދާ ކަމުގައެވެ. އަދި، ނިއުކްލިޔަރ ހަތިޔާރު ގެންގުޅުން މަނާކުރާ ބައިނަލްއަޤުވާމީ މުޢާހަދާއާ ގުޅެން ޔަހޫދީން ބޭނުންނުވާ ސަބަބަކީ، އެ ޤައުމުގައި ނިއުކްލިޔަރ ހަތިޔާރު ހުރުން ކަމުގައި ވެސް އޭނާ ވިދާޅުވިއެވެ. އަދި، ފަލަސްޠީނުގެ މުސްލިމުންނާ ދެކޮޅަށް ނިއުކްލިޔަރ ހަމަލައެއް ދޭނެ ކަމަށް ބުނެ އިންޒާރު ދިނުމަކީ، ހުރިހާ އިންސާނުންނަށް އަމާޒުކޮށް ދީފައިވާ އިންޒާރެއްގެ ގޮތުގައި ދެކޭ ކަމުގައި ވެސް އޭނާ ވިދާޅުވިއެވެ.
އެލިޔާހޫގެ މައްސަލަ އައި.އޭ.އީ.އޭއަށް ރަސްމީކޮށް ހުށަހަޅާފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޔަހޫދީން ޣައްޒާއަށް ދެމުންދާ ހަމަލަތަކުގައި ޝަހީދު ކޮށްލާފައިވާ މީހުންގެ ޢަދަދު ވަނީ 10,812 އަށް އުފުލިފައެވެ. އޭގެ ތެރޭގައި 4,300 އަށްވުރެ ގިނަ ޢަދަދެއްގެ ކުޑަކުދިން ހިމެނޭއިރު، ޒަޚަމު ކޮށްލާފައިވާ މީހުންގެ ޢަދަދު މިހާރު ވަނީ 24,000 އަށް އުފުލިފައެވެ.