ޔުއެފާ ޗެމްޕިއަންސް ލީގުގެ ގްރޫޕް ބީގައި ރޭ ސެވިއްޔާ ބަލިކޮށް އާސެނަލުން ގަދަ 16 ބުރުގެ ފުރުސަތު ބޮޑުކޮށްފިއެވެ.
އަމިއްލަ ދަނޑުގައި ކުޅުނު މެޗުން އާސެނަލް މޮޅުވީ 2-0 ގެ ނަތީޖާއަކުންނެވެ.
މި މެޗުގައި އާސެނަލުން ގިނައިރު ބޯޅަ ގެންގުޅެ ގިނަ ހަމަލާތަކެއް އުފެއްދިއިރު، އެ ޓީމުން ލީޑު ނަގާފައިވަނީ ފުރަތަމަ ހާފުގެ 29 ވަނަ މިނެޓުގައެވެ. ބުކާޔޯ ސަކާގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ ލެއާންޑްރޯ ޓްރޮސާޑެވެ. އަދި މެޗުގެ 64 ވަނަ މިނެޓުގައި އާސެނަލުން ލީޑު ފުޅާކުރިއިރު، ގަބްރިއެލް މާޓިނެއްލީގެ އެހީއާއެކު މި ލަނޑު ޖަހައިދިނީ މެޗުގައި މޮޅު ކުޅުމެއް ދެއްކި ސަކާއެވެ.
މި މޮޅާއެކު އާސެނަލުން ގަދަ 16 ބުރުގެ ފުރުސަތު ބޮޑުކުރިއިރު، އެ ބުރުގެ ޖާގައެއް ޔަގީންކުރަން ކުރިއަށް އޮތް ދެ މެޗުން އާސެނަލަށް ބޭނުންވަނީ އެންމެ ޕޮއިންޓެކެވެ. މި ވަގުތު ތާވަލުގެ އެއްވަނައިގައި އާސެނަލް އޮތީ ކުޅުނު ހަތަރު މެޗުން ލިބުނު ނުވަ ޕޮއިންޓާއެކުއެވެ. ދެވަނައިގައި އޮތް ޕީއެސްވީ އެއިންދޯވެން އާއި ތިންވަނައިގައި އޮތް ލެންސްއަށް ހަތަރު މެޗުން ލިބިފައިވަނީ ފަސް ޕޮއިންޓެވެ.
މި ގްރޫޕުގެ އަނެއް މެޗުގައި ޕީއެސްވީން ވަނީ އަމިއްލަ ދަނޑުގައި 1-0 ގެ ނަތީޖާއަކުން ލެންސް ބަލިކޮށްފައެވެ.