އައިޕީޔޫގެ ޑިމޮކްރަސީ އަދި ހިއުމަން ރައިޓްސް ކޮމެޓީގެ ރައީސްކަމަށް މެންބަރު ޖީހާން

އިންޓަރ-ޕާލިމެންޓަރީ ޔޫނިއަން، އައި.ޕީ.ޔޫގެ ޑިމޮކްރަސީ އަދި ހިއުމަން ރައިޓްސް ކޮމެޓީގެ ރައީސްކަމަށް ރައްޔިތުންގެ މަޖިލީހުގެ ހިންނަވަރު ދާއިރާގެ މެންބަރު ޖީހާން މަޙްމޫދު ހޮވިއްޖެއެވެ.

އިންޓަރ ޕާލިމެންޓަރީ ޔޫނިއަނަކީ 1889 ވަނަ އަހަރުން ފެށިގެން އުފައްދާފައިވާ ބައިނަލްއަޤުވާމީ ޖަމްޢިއްޔާއެކެވެ. މި ޖަމްޢިއްޔާގެ ބޭނުމަކީ ޑިމޮކްރެޓިކް ގަވަނަންސްގެ ތެރެއިން ޤައުމުތަކުގައި ޤާނޫނު ހަދާ މަޖިލިސްތައް ކުރިއަށް ގެންދިއުމާއި، މަޖިލީހުގެ ތެރެއިން އަންހެން މެންބަރުންނަށް ގޮނޑި ލިބޭ ފުރުޞަތު އިތުރުކޮށް، ޒުވާނުން ސިޔާސީ މައިދާނަށް ނިކުތުމަށް ބާރުއެޅުމެވެ.

މި ޔޫނިއަންގެ ޑިމޮކްރަސީ އެންޑް ހިއުމަން ރައިޓްސް ކޮމެޓީއަކީ އެ ޖަމްޢިއްޔާގެ ދާއިމީ ކޮމެޓީތަކުގެ ތެރެއިން މުހިންމު އެއް ކޮމެޓީއެވެ. މިއީ ޑިމޮކްރެސީއާއި ހިއުމަން ރައިޓްސް ކުރިއެރުވުމުގެ މަސައްކަތްކުރުމަށް އައިޕީޔޫގައި އެކުލަވާލާފައިވާ ކޮމެޓީއެވެ.

Hon. MP Jeehan Mahmood, has been elected as the Chair of the Committee on Democracy and Human Rights of Inter-Parliamentary Union. Congratulations Hon. MP Jeehan Mahmood.

?https://t.co/LvNTfUiZIG @JeehanJMS pic.twitter.com/tySoKty2Az

— People's Majlis (@mvpeoplesmajlis) November 9, 2023

ޖީހާން މި މަޤާމަށް އިންތިޚާބުވުމާއި ގުޅިގެން ރައްޔިތުންގެ މަޖިލީހުގެ އިދާރާއިން ވަނީ އެކަމަނާއަށް މަރުޙަބާ ދަންނަވާފައެވެ.

މިކޮމެޓީގެ މެންބަރަކަށް ޖީހާން ވެވަޑައިގެންފައިވަނީ 2021 ވަނަ އަހަރުގެ ތެރޭގައެވެ. ޖީހާނަކީ ރާއްޖެއިން މި ކޮމެޓީއަށް އިންތިޚާބުވި އެންމެ ފުރަތަމަ މެންބަރެވެ. އަދި ކޮމެޓީގެ ރައީސްއަކަށް ހޮވިވަޑައިގަތުމާއެކު، އެކަމަނާ ވެފައިވަނީ ކޮމެޓީގެ ރައީސްކަން ކުރައްވާ އެންމެ ފުރަތަމަ ދިވެއްސަށެވެ.

ދުނިޔޭގެ ޤާނޫނު ހަދާ މަޖިލިސްތައް ހިމެނޭ އައި.ޕީ.ޔޫގައި 150 ވުރެ ގިނަ ޤައުމުގެ މަޖިލިސްތައް ތަމްޞީލުކުރެއެވެ.