ޔަހޫދީ ފައުޖުން ޣައްޒާއަށް ދެމުންދާ ރަޙުމު ކުޑަ ހަމަލަތަކުގައި ޝަހީދު ކޮށްލާފައިވާ މީހުންގެ ޢަދަދަށް ބަލައިލި ނަމަވެސް، ޔަހޫދީންގެ އޮޕަރޭޝަންގައި މައްސަލަތަކެއް ހުރި ކަން ސާފުކޮށް ހާމަވެގެންދާ ކަމުގައި އ.ދގެ ސެކްރެޓަރީ ޖެނެރަލް ވިދާޅުވެއްޖެއެވެ. އޭނާ މިހެން ވިދާޅުވެފައިވާއިރު، އޮކްޓޫބަރު 7 ވަނަ ދުވަހުން ފެށިގެން މެނދުކެނޑުމެއް ނެތި ޣައްޒާއަށް ޔަހޫދީން ދެމުންދާ ހަމަލަތަކުގައި ޝަހީދު ކޮށްލާފައިވާ މީހުންގެ ޢަދަދު ވަނީ 10,569 އަށް އުފުލިފައެވެ.
ރޮއިޓަރސްގެ 'ނެކްސްޓް' ޕުރޮގުރާމުގައި ވާހަކަފުޅު ދައްކަވަމުން ގުތެރޭޝް ވިދާޅުވީ ޙަމާސް ޖަމާޢަތުން ޣައްޒާގެ ޢާންމު ރައްޔިތުން އައްޑަނަތަކެއްގެ ގޮތުގައި ބޭނުން ކުރަމުންދާ ކަމަށް ތުހުމަތު ކުރި ނަމަވެސް، ޣައްޒާގައި ޝަހީދު ކޮށްލާފައިވާ މީހުންގެ ޢަދަދަށް ބަލައިލުމުން ޔަހޫދީންގެ އޮޕަރޭޝަންގައި ހުރި ގޯސްތައް ހާމަވެގެންދާ ކަމުގައެވެ. އޭނާ ވަނީ، ހަނގުރާމައިގެ ކުރީ ސަފަށް ޢާންމު ނުނެރުމަށް ޙަމާސް ޖަމާޢަތަށް ވެސް ގޮވައިލައްވާފައެވެ.
"އިސްރާޢީލުން ވިސްނަންޖެހޭ ކަމަކީ، ޣައްޒާގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށް ހުރަސްއަޅާ ކޮންމެ ދުވަހަކީ އިސްރާޢީލުގެ މަސްލަޙަތަށް ގެއްލުންވާނެ ދުވަހެއް ކަން. އަދި، ބައިނަލްއަޤުވާމީ މައިދާނުގައި އިސްރާޢީލުގެ އަގު ވެއްޓެމުންދާ ދުވަހެއް ކަން،" ގުތެރޭޝް ވިދާޅުވިއެވެ. ނަމަވެސް، ފާހަގަ ކޮށްލަން ޖެހޭ ކަމަކީ ޒަޔަނިސްޓު އިސްރާޢީލަކީ އެ މީހުންގެ މޫނުމަތި ރީތިކުރަން ބޭނުން ބަޔެއް ނޫން ކަމެވެ. އަދި، އެ މީހުންގެ ހަމައެކަނި އަޒުމަކީ ފަލަސްޠީނުގެ ވީހާވެސް ގިނަ ޢަދަދެއްގެ މުސްލިމުންގެ ލޭއޮހޮރުވައިލުން ކަމެވެ.
"ދުނިޔޭގެ އެހެން ކަންކޮޅުތަކުގައި ހިނގަމުންދާ ހަމަނުޖެހުންތަކުގައި ޝިކާރައަކަށްވާ ކުޑަކުދިންގެ ޢަދަދު ނިސްބަތުން މަދު. އެންމެ ގިނަވެގެން ވެސް އުޅެނީ ސަތޭކައިގެ ތެރޭގައި. ނަމަވެސް، ޣައްޒާއިން ފެންނަނީ ގަބޫލުކުރަން ދަތި މަންޒަރެއް. ފެނިގެން މި ދަނީ މަދު ދުވަސް ކޮޅެއްގެ ތެރޭގައި އެތަކެއް ހާސް މައުސޫމް ކުޑަކުދިންނެއް ޝަހީދު ކޮށްލާފައިވާ މަންޒަރު،" ގުތެރޭޝް ވިދާޅުވިއެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާގައި ޔަހޫދީ ފައުޖުން ހިންގަމުންދާ ލާއިންސާނީ ޖާރީމާތަކުގައި ޝަހީދު ކޮށްލާފައިވާ މީހުންގެ ޢަދަދު 10,569 އަށް އުފުލިފައިވާއިރު، އޭގެ ތެރޭގައި 4,300 އަށްވުރެ ގިނަ ޢަދަދެއްގެ މައުސޫމް ކުޑަކުދިން ވެސް ހިމެނެއެވެ. އަދި، ޒަޚަމު ކޮށްލާފައިވާ މުސްލިމުންގެ ޢަދަދު ވަނީ 24,000 އަށްވުރެ މައްޗަށް އުފުލިފައެވެ.