ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކުގައި ބައިވެރިވުމުގެ ގޮތުން 320 މިލިޔަން އެމެރިކާ ޑޮލަރުގެ އަގުހުރި ހަތިޔާރު ޔަހޫދީންނަށް ފޯރުކޮށްދޭން އެމެރިކާއިން ނިންމާފައިވާ ކަން ހާމަވެއްޖެއެވެ. މި ކަން ފުރަތަމަ ރިޕޯޓު ކޮށްފައި ވަނީ އެމެރިކާގެ ނޫހެއް ކަމުގައިވާ ވޯލް ސްޓްރީޓް ޖަރނަލް (ޑަބްލިޔު.އެސް.ޖޭ)ންނެވެ. އެމެރިކާއިން ޔަހޫދީންނަށް ފޯރުކޮށްދޭން ނިންމާފައިވާ ހަތިޔާރުގެ ތެރޭގައި 'ހައި-ޕްރިސިޝަން' ބޮމާއި މިސައިލް ފަދަ ހަތިޔާރު ހިމެނެއެވެ.
އެމެރިކާއިން ޔަހޫދީންނަށް އިތުރު ހަތިޔާރު ފޯރުކޮށްދޭން ނިންމާފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު ވަނީ 10,328 އަރާފައެވެ. އޭގެ ތެރޭގައި 4,000 އަށްވުރެ ގިނަ ޢަދަދެއްގެ މައުސޫމު ކުޑަކުދިން ހިމެނޭއިރު، ޒަޚަމު ކޮށްލާފައިވާ މީހުންގެ ޢަދަދު ވަނީ 24,000 އަށްވުރެ އިތުރުވެފައެވެ.
ޑަބްލިޔު.އެސް.ޖޭން ބުނީ، ޔަހޫދީންނަށް ފޯރުކޮށްދޭން އެމެރިކާއިން ނިންމާފައިވާ ހަތިޔާރުގެ ތެރޭގައި 'ސްޕައިސް ފެމިލީ ގްލައިޑިންގ ބޮމް އެސެމްބްލީސް' މަރުކާރުގެ ހަތިޔާރު ހިމެނޭ ކަމުގައެވެ. އެއީ، އަސްކަރީ މަތިންދާބޯޓު ބޭނުން ކޮށްގެން ހަމަލަދޭން ބޭނުން ކުރާ ބާވަތުގެ ނުރައްކާތެރި ބޮމެކެވެ. އަދި، އެ ތަކެތި ޔަހޫދީންނަށް ފޯރުކޮށްދިނުމުގެ ހުއްދަ ހޯދުމަށް އޮކްޓޫބަރު 31 ވަނަ ދުވަހު ޤާނޫނު ހަދާ މަޖިލިސް – ކޮންގްރެސްއަށް ހުށަހަޅާފައިވާ ކަމުގައި ވެސް އެ ނޫހުން ރިޕޯޓު ކުރެއެވެ.
މި ކަމާ ގުޅޭ އެއްބަސްވުމެއް އެކުލަވައިލާފައިވާއިރު، އެ ހަތިޔާރުތައް ޔަހޫދީންނަށް ފޯރުކޮށްދޭނީ ރަފަޔަލް ޔޫ.އެސް.އޭ ކިޔާ ކުންފުންޏަކުންނެވެ. ރަފަޔަލް ޔޫ.އެސް.އޭގެ މައި ކުންފުންޏަކީ ޒަޔަނިސްޓު އިސްރާޢީލުގެ ކުންފުންޏެއް ކަމުގައިވާ ރަފަޔަލް އެޑްވާންސްޑް ޑިފެންސް ސިސްޓަމްސްއެވެ. އެއީ، ހަތިޔާރު އުފައްދާ ކުންފުންޏެކެވެ.
"ސްޕައިސް ފެމިލީ ގްލައިޑިންގ ބޮމް އެސެމްބްލީސް މަރުކާރުގެ ހަތިޔާރު ހޯދަން ޒަޔަނިސްޓު އިސްރާޢީލުން ވަނީ އޮކްޓޫބަރު 7 ވަނަ ދުވަހުގެ ކުރިން އެމެރިކާގައި އެދިފައި. އަދި، އޭރުވެސް ކޮންގްރެސްއަށް ނުރަސްމީ ކޮށް އެ ކަން ހުށަހަޅާފައިވޭ،" ޑަބްލިޔު.އެސް.ޖޭގެ ރިޕޯޓުގައި ބުންޏެވެ. މިކަމުން ދޭހަވަނީ، އޮކްޓޫބަރު 7 ގެ ކުރިން ވެސް ޔަހޫދީން ޣައްޒާގައި ގަތުލުއާންމު ހިންގަން ތައްޔާރުވަމުން ގޮސްފައިވާ ކަމެވެ.
ޔަހޫދީންނަށް އެމެރިކާއިން ނުރައްކާތެރި ހަތިޔާރުތަކެއް ފޯރުކޮށްދޭން ނިންމާފައި މި ވަނީ ޢައްޒާގައި ޔަހޫދީން ހިންގަމުންދާ ލާއިންސާނީ ޖަރީމާތަކަށް މުޅި ދުނިޔޭގެ ފާޑުކިޔުން އަމާޒުވެފައިވާ ދަނޑިވަޅެއްގައެވެ. އ.ދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވިދާޅުވީ ޣައްޒާއަކީ ކުޑަކުދިން ވަޅުލާ ގަބުރުސްތާނަކަށް ޔަހޫދީން ބަދަލު ކޮށްލާފައިވާ ކަމުގައެވެ. އަދި، ޣައްޒާގެ 2.3 މިލިޔަން މުސްލިމުންނަށް އިންސާނީ މުސީބާތެއް ކުރިމަތި ކުރުވާފައިވާ ކަމުގައެވެ.
"ޔަހޫދީ ފައުޖުން ދަނީ އެއްގަމު މަގުންނާއި ވައިގެ މަގުން ޣައްޒާގެ ޢާންމުންގެ ގެދޮރާއި، ހޮސްޕިޓަލްތަކާއި، ރެފިއުޖީ ކޭމްޕުތަކާއި، މިސްކިތްތަކާއި އ.ދގެ އޮފީސްތަކާއި ޢިމާރާތްތަކަށް ވެސް ހަމަލަ ދެމުން. އެއްވެސް މީހަކަށް ސަލާމަތެއް ނެތް،" ގުތެރޭޝް ވިދާޅުވިއެވެ.
ޔަހޫދީން ޣައްޒާއަށް ބޮން އަޅަމުން މި ދަނީ އެމެރިކާގެ ރުހުމާއި، ފުރިހަމަ އެއްބާރުލުމާއި އެހީތެރިކަމާ އެކުގައި ކަން މުޅި ދުނިޔެ ވެސް ދަނެއެވެ. ގަބޫލުކުރެއެވެ. ހަތިޔާރު ފޯރުކޮށްދިނުމުގެ އިތުރުން އެމެރިކާއިން ދަނީ ޣައްޒާގެ ގަތުލުއާންމު ހުއްޓުވަން ކުރަމުންދާ މަސައްކަތްތަކަށް ހުރަސް އަޅަމުންނެވެ. ގަތުލުއާންމު ހުއްޓުވަން އ.ދގެ ސަލާމަތީ މަޖިލީހުން ކުރަމުންދާ މަސައްކަތްތަކަށް ވެސް ހުރަސް އަޅާފައި ވަނީ އެމެރިކާއިންނެވެ.