މަސް ގަންނަމުންދާ އަގު ކުޑަކުރުމަށް ނިންމާފައި ނުވޭ: މިފްކޯ

މިފްކޯއިން މަސް ގަންނަމުންދާ އަގު ކުޑަކުރުމަށް ނިންމާފައި ނުވާ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ، މިފްކޯއިން ހާމަކޮށްފިއެވެ.

މިފްކޯއިން މިގޮތަށް ހާމަކޮށްފައި މިވަނީ މިފްކޯއިން މަސް ގަންނަ އަގު ރިވިއު ކުރަމުން އަންނަ ކަމަށް މިފްކޯގެ މެނޭޖިން ޑިރެކްޓަރ އިސްމާޢީލް ފައުޒީއާ ހަވާލާދީ ރާއްޖޭގެ ނޫހެއްގައި ޝާއިޢުކޮށްފައިވަނިކޮށެވެ.

މިފްކޯއިން ހާމަކުރި ގޮތުގައި މިދިޔަ ސެޕްޓެމްބަރު މަހު މަސްކިލޯއެއްގެ އަގު 17 ރުފިޔާއިން 25 ރުފިޔާއަށް ބޮޑު ކުރިފަހުން އެކުންފުނިން މަސްގަންނަމުން އަންނަނީ ކިލޯއެއް 25 ރުފިޔާގެ މަގުންނެވެ. މިއަގު ކުޑަކުރަން އެއްވެސް ވަރަކަށް ވިސްނުން ނުގެންގުޅޭ ކަމަށް މިފްކޯއިން ހާމަކޮށްފައިވެއެވެ.

އަދި މަހުގެ އަގު ރިވިއު ކުރުމަށްވެސް ފިނޭންސް މިނިސްޓްރީއާއި ސަރުކާރުގެ އިދާރާތަކާއެކު މިފްކޯއިން ސީދާ މަޝްވަރާކުރަމުން ނުދާ ކަމަށް އެކުންފުނިންވަނީ ހާމަކޮށްފައެވެ.

މިފްކޯއިން އިތުރަށް ހާމަކުރި ގޮތުގައި މަސް ކިރުމަށްފަހު އަގު ނުދެވި ހުރި ހުރިހާ ފައިސާއެއް މަސްވެރިންނަށް ދައްކާ ޚަލާސް ކުރުމަށް ކުރަންޖެހޭ މަސައްކަތް ކަމާ ގުޅުން ހުރި ފަރާތްތަކާއެކު ކުރަމުން އަންނަކަމަށެވެ. އަދި މަސްވެރިން އަތުން ގަނެފައިވާ މަހަށް ބަރާބަރަށް ފައިސާ ދައްކަމުން ގެންދާނެ ކަމުގެ ޔަގީންކަން މަސްވެރިންނަށް ދޭ ކަމަށްވެސް މިފްކޯއިންވަނީ ހާމަކޮށްފައެވެ.

ރާއްޖޭގެ ހުރިހާ ހިސާބަކަށްވެސް މިހާރު ވިއްސާރަ ކުރަމުން ދިޔަނަމަވެސް އުތުރާއި ދެކުނާއި މެދު ރާއްޖެތެރޭގައި މަސްވެރިކަން ރަނގަޅުކަމަށް މިފްކޯއިން ހާމަކުރެއެވެ. އެގޮތުން ކޮންމެ ދުވަހަކުވެސް މިފްކޯގެ ސެންޓަރުތަކާއި ބޯޓުތަކަށް އެވްރެޖްކޮށް ދުވާލަކަށް 450 ޓަނަށްވުރެ ގިނަމަސް ގަންނަމުން އަންނަ ކަމަށް މިފްކޯއިން ބުނެއެވެ.