ޔަހޫދީ ފައުޖުން ލުބުނާނަށް ދިން ރަޙުމު ކުޑަ ހަމަލައެއްގައި ނޫސްވެރިއެއްގެ ޢާއިލާގެ ހަތަރު މެންބަރުން ޝަހީދުކޮށްލައިފިއެވެ. ލުބުނާނުގެ ރޭޑިޔޯއެއްގައި މަސައްކަތް ކުރާ ނޫސްވެރިއެއް ކަމުގައިވާ ސަމީރު އައްޔޫބުގެ ޢާއިލާގެ މެންބަރުންތަކެއް ޝަހީދުކޮށްލާފައި ވަނީ، އެ ޤައުމުގެ ދެކުނުގައި އޮންނަ ރަށެއްގައި އެ މީހުން ދަތުރު ކުރަމުން ދިޔަ ކާރަށް ޔަހޫދީ ފައުޖުން ދިން މިސައިލް ހަމަލައެއްގައެވެ.
ލުބުނާނުގެ ނޭޝަނަލް ނިއުސް އޭޖެންސީ (އެން.އެން.އޭ)ން ބުނީ، ޝަހީދު ކޮށްލާފައި ވަނީ ސަމީރުގެ ދައްތައާއި، ދައްތަގެ މާމަދަރިންތަކެއް ކަމުގައެވެ. އެއީ 10 އަހަރާއި، 12 އަހަރާއި، 14 އަހަރުގެ ތިން ކުދިން ކަމުގައި ވެސް އެން.އެން.އޭން ބުނެއެވެ. އެ މީހުން ދަތުރު ކުރަމުން ދިޔަ ކާރަށް ޔަހޫދީން މިސައިލް ހަމަލަ ދިން ވަގުތު ސަމީރު އިނީ އެހެން ކާރެއްގައެވެ. މި ހަމަލާގައި އޭނާއަށް ވެސް ޒަޚަމުތަކެއް ލިބުނެވެ.
ސަމީރުގެ ޢާއިލާގެ މެންބަރުންތަކެއް ޝަހީދު ކޮށްލުމުން، އެ ކަމުގެ ބަދަލު ހިފުމަށް ލުބުނާނުގެ ޙިޒްބުالله ޖަމާޢަތުން ވަނީ ޒަޔަނިސްޓު އިސްރާޢީލުގެ ރަށެއް ކަމުގައިވާ ކިރިޔަތް ޝްމޯނާއަށް އަމާޒުކޮށް ރޮކެޓް ހަމަލަތަކެއް ދީފައެވެ. އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީން ލާއިންސާނީ އުދުވާންތަކެއް ފެށުމާ ގުޅިގެން ލުބުނާނުގައި ހަރަކާތްތެރިވާ މުޖާހިދުންގެ ޖަމާޢަތްތަކުން ވެސް ވަނީ ޒަޔަނިސްޓު އިސްރާޢީލަށް ހަމަލަދޭން ފަށާފައެވެ.
ސަމީރުގެ ޢާއިލާ ދަތުރު ކުރި ކާރުގެ އިތުރުން އެ ސަރަޙައްދުގައި ހަރަކާތްތެރިވަމުން ދިޔަ ދެ އެމްބިޔުލާންސަކަށް ވެސް ޔަހޫދީ ފައުޖުން ވަނީ ހަމަލަ ދީފައެވެ. މި ހަމަލަތަކުގައި ޞިއްޙީ ޚިދުމަތްތެރިންގެ ހަތަރު މީހަކު ޒަޚަމުވެފައިވާ ކަމުގައި ރިޕޯޓުތައް ބުނެއެވެ. ޔަހޫދީންގެ ހަމަލަތައް އަމާޒު ކޮށްފައި ވަނީ ރިސާލާ ސްކައުޓް އެސޯސިއޭޝަންގެ ދެ އެމްބިޔުލާންސަކަށެވެ.
އެ ޖަމުޢިއްޔާއިން ބުނީ، އެމްބިޔުލާންސްތަކަށް ހަމަލަ ދީފައި ވަނީ އިސްރާޢީލުގެ އަސްކަރީ ޑްރޯނަކުން ކަމުގައެވެ. އަދި، އެ ވަގުތު އެމްބިޔުލާންސްތައް ދަތުރު ކުރަމުން ގޮސްފައި ވަނީ، ޔަހޫދީންގެ ހަމަލައެއްގައި ޒަޚަމު ކޮށްލާފައިވާ ބަޔަކަށް ޞިއްޙީ ފަރުވާ ދޭން ހޮސްޕިޓަލަށް ގެންދިޔުމަށް ކަމުގައި ވެސް އެ ޖަމުޢިއްޔާއިން ބުންޏެވެ. މިކަމާ ގުޅިގެން ޔަހޫދީން ބުނީ، ހަމަލަތައް އަމާޒު ކޮށްފައި ވަނީ ހަތިޔާރު އެޅި ޖަމާޢަތްތަކުގެ މެންބަރުންނަށް އަމާޒުކޮށް ކަމުގައެވެ. ނަމަވެސް، ލުބުނުގެ ޞިއްޙަތާ ބެހޭ ވުޒާރާއިން ވަނީ އެ ކަން ދޮގުކޮށް، ޔަހޫދީން ހިންގާފައި ވަނީ "ނުލަފާ އަދި ޖައްބާރު" އަމަލެއް ކަމުގައި ބުނެ، އެ ކަން ކުށްވެރި ކޮށްފައެވެ.
އޮކްޓޫބަރު 7 ވަނަ ދުވަހަށް ފަހު ޔަހޫދީ ފައުޖުން ލުބުނާނަށް ދީފައިވާ ތަފާތު އެކި ހަމަލަތަކުގައި ޝަހީދު ކޮށްލާފައިވާ މީހުންގެ ޢަދަދު 81 އަށް އަރައެވެ. އޭގެ ތެރެއިން 59 މީހުންނަކީ ޙިޒްބުالله ޖަމާޢަތުގެ މެންބަރުންނެވެ. އެ ޖަމާޢަތުގެ ހަމަލަތަކުގައި ޔަހޫދީ ސިފައިންގެ ހަ މީހުންނާއި ޢާންމުންގެ އެކަކު ވަނީ މަރައިލާފައެވެ.