ޢައްޒާގައި އުރުދުނުން ހިންގާ ފީލްޑް ހޮސްޕިޓަލަކަށް ބޭސްފަރުވާގެ ސާމާނު ފޯރުކޮށްދީފިއެވެ. އުރުދުނުން އެ ތަކެތި ފޯރުކޮށްދީފައި ވަނީ އެ ޤައުމުގެ އަސްކަރީ މަތިންދާބޯޓެއް ބޭނުން ކޮށްގެން ވައިގެ މަގުންނެވެ. އުރުދުންގެ ރަސްގެފާނު ޢަބްދުالله ބިން އަލް-ޙުސައިން ދެވަނަ ވިދާޅުވީ، ފީލްޑް ހޮސްޕިޓަލަށް ކޮންމެހެން ބޭނުންވާ ބޭސްފަރުވާގެ ސާމާޞު 'އެއަރ-ޑްރޮޕް' ކޮށްފައިވާ ކަމުގައެވެ.
"އަޅުގަނޑުމެންގެ ހިތްވަރު ގަދަ ސިފައިން ވަނީ ދަންވަރުގެ ވަގުތުގައި ޣައްޒާ މަތިން ދަތުރުކޮށް، އެ ސަހަރުގައި ހުންނަ އުރުދުންގެ ފީލްޑް ހޮސްޕިޓަލަށް ބޭސްފަރުވާގެ ސާމާނު 'އެއަރ-ޑްރޮޕް' ކޮށް ފޯރުކޮށްދީފައި. ޣައްޒާގައި ދިރިއުޅޭ އަޅުގަނޑުމެންގެ އަޚުންނާއި އުޚްތުންނަށް އެ ތަކެތި ފޯރުކޮށްދިނުމަކީ އަޅުގަނޑުމެންގެ ޒިންމާއެއް. ފަލަސްޠީނުގެ މުސްލިމުންނާ އެކު އަޅުގަނޑުމެން ދެމި ތިބޭނަން،" ޢަބްދުالله ރަސްގެފާނު އެކްސް (ކުރީގައި ޓްވިޓަރ)ގައި ޝާއިޢު ކުރެއްވި ޕޯސްޓެއްގައި ވިދާޅުވިއެވެ.
ޢައްޒާގައި ހުންނަ އުރުދުންގެ ފީލްޑް ހޮސްޕިޓަލަށް އެ ޤައުމުން ބޭސްފަރުވާގެ ސާމާނު ފޯރުކޮށްދީފައި މި ވަނީ، އެމެރިކާގެ ޚަރިޖީ ވަޒީރު އެންތަނީ ބްލިންކަން މެދުއިރުމަތީގެ ބައެއް ޤައުމުތަކަށް ދަތުރުފުޅެއް ކުރައްވަމުން ގެންދެވި ދަނޑިވަޅެއްގައެވެ. އޭނާ ގެންދަވަނީ، ޣައްޒާއަށް ޔަހޫދީ ފައުޖުން ދެމުންދާ ހަމަލަތައް ހުއްޓުވަން ދެކޮޅު ހައްދަވަމުންނެވެ. އަދި، ޣައްޒާގައި ހާލުގައި ޖެހިފައިވާ އެތަކެއް މިލިޔަން މުސްލިމުންނަށް އިންސާނީ އެހީތެރިކަން ފޯރުކޮށްދޭން ވެސް ދެކޮޅު ހައްދަވަމުންނެވެ.
އުރުދުނުން ޣައްޒާއަށް ބޭސްފަރުވާގެ ސާމާނު ފޯރުކޮށްދީފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކުގައި ޝަހީދު ކޮށްލާފައިވާ މީހުންގެ ޢަދަދު ވަނީ 10,022 އަށް އުފުލިފައެވެ. އޭގެ ތެރޭގައި 4,000 އަށްވުރެ ގިނަ ކުޑަކުދިން ހިމެނެއެވެ.
އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 24,000 އަށް އަރާފައެވެ. ޔަހޫދީންގެ ހަމަލަތަކުގައި ސުންނާފަތި ކޮށްލާފައިވާ ޢިމާރާތްތަކުގެ ދަށުގައި ތާށިވެފައިވާ ކަމަށް ބެލެވޭ މީހުންގެ ޢަދަދު 2,600 އަށް އަރާއިރު، އޭގެ ތެރޭގައި ވެސް 1,270 އެއްހާ ކުޑަކުދިން ހިމެނޭ ކަމުގައި ޣައްޒާގެ އޮފިޝަލުން ވިދާޅުވެއެވެ.