ޔަހޫދީ އިސްރާޢީލުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާގެ ތެރެއިން ޣައްޒާގެ ހޮސްޕިޓަލްތަކަށް އަނެއްކާ ވެސް ވަރުގަދަ ހަމަލަތަކެއް ދީފިއެވެ. ޣައްޒާގައި ވެރިކަން ކުރާ ޙަމާސް ޖަމާޢަތުން ބުނީ، އެ ސަހަރުގެ ހޮސްޕިޓަލްތައް ވަށައިގެންވާ ސަރަޙައްދުތަކާއި، ހޮސްޕިޓަލްތަކަށް ވެސް ޔަހޫދީ ފައުޖުން ހަމަލަތައް އަމާޒު ކުރަމުންދާ ކަމުގައެވެ.
ޣައްޒާގައި ހުންނަ ޞިއްޙީ ފަރުވާދޭ މަރުކަޒުތަކަށް ޔަހޫދީންގެ ހަމަލަތައް އަމާޒު ކޮށްފައި މި ވަނީ، އަލް-ޝިފާ ހޮސްޕިޓަލް ކައިރީގައި އޮތް އެމްބިޔުލާންސްތަކަކަށް ރަޙުމު ކުޑަ ހަމަލަތަކެއްދީ، 15 އަށްވުރެ ގިނަ މީހުން ޝަހީދު ކޮށްލުމަށް ފަހުއެވެ. އެ ހަމަލަތައް މުޅި ދުނިޔެއިން ވަނީ ކުށްވެރިކޮށްފައެވެ. އެ ހާދިސާގައި 60 އަށްވުރެ ގިނަ މީހުން ޒަޚަމު ކޮށްލިއެވެ.
ޢައްޒާގެ ހޮސްޕިޓަލްތަކަށް ޔަހޫދީންގެ ހަމަލަތައް އަމާޒު ކުރަން ފަށާފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ އުދުވާންތަކުގައި ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ޢަދަދު ވަނީ 9,922 އަށް އުފުލިފައެވެ. އަދި، ޒަޙަމު ކޮށްލާފައިވާ މީހުންގެ ޢަދަދު ވަނީ 32,000 އަށް އަރާފައެވެ.
ޔަހޫދީންގެ ހަމަލަތައް މިހާރު އަމާޒު ކުރަމުން ދަނީ ޣައްޒާގެ އުތުރުގައި އޮންނަ ހޮސްޕިޓަލްތަކަށް ކަމުގައި ޙަމާސް ޖަމާޢަތުން ބުންޏެވެ. "އެތައް ގަޑިއިރެއް ވަންދެން ޔަހޫދީ ފައުޖުން ވަނީ ހޮސްޕިޓަލްތައް ހުންނަ ސަރަޙައްދުތަކަށް ހަމަލަދީފައި،" ޙަމާސްގެ އޮފިޝަލެއް ކަމުގައިވާ ސަލާމާ މަޢުރޫފް ވިދާޅުވިއެވެ.
ޔަހޫދީން ވަނީ ޣައްޒާގެ މުވާސަލާތީ ޚިދުމަތްތައް ވެސް ކަނޑައިލާފައެވެ. ޢައްޒާގައި މުވާސަލާތީ ޚިދުމަތްތައް ފޯރުކޮށްދޭ ކުންފުނިން ބުނީ، އެ ސަހަރުގެ ހޮސްޕިޓަލްތަކަށް ހަމަލަ ދޭން ފެށުމުގެ ކުރިން އެ ސަހަރުން އިންޓަރނެޓާއި މޮބައިލް ފޯނުގެ ޚިދުމަތްތައް ޔަހޫދީން ކަނޑައިލާފައިވާ ކަމުގައެވެ. މިއީ، އެ ހަމަލަތަކުގެ މަންޒަރުތަކާއި ޚަބަރުތައް ދުނިޔެއަށް ހާމަ ކުރަން ހުރަސް އެޅުމުގެ ގޮތުން ޔަހޫދީން ހިންގާފައިވާ އަމަލެއް ކަމަށް ބެލެވެއެވެ.