ޖަބާލިޔާ ރެފިއުޖީ ކޭމްޕަށް ޔަހޫދީން ދިން ހަމަލާގެ ސަބަބުން ހާލުގައި ޖެހިފައިވާ މީހުން ތިބި ވަގުތީ ހިޔާއަކަށް އިސްރާއީލުގެ ފައުޖުތަކުން އަނެއްކާވެސް ޙަމަލަދީފިއެވެ.
އަލް ޝިފާ ހޮސްޕިޓަލްގެ އިސްވެރިޔާ މުޙައްމަދު އަބޫ ސަލްމާޔާ ވިދާޅުވީ، އދ އިން ހިންގަމުންދާ ސްކޫލުގައި ޖަބާލިޔާ ރެފިއުޖީ ކޭމްޕަށް ދިން ހަމަލާގައި ގެދޮރު ފަނާވި މީހުން ވަގުތީ ހިޔާވަހިކަމުގައި ތިއްބާ ޔަހޫދީ އަސްކަރިއްޔާއިން ދިން ވައިގެ ހަމަލާތަކެއްގައި 15 މީހުން ޝަހީދުކޮށް އެތައް ބަޔަކު ޒަޚަމްކޮށްލާފައިވާކަމަށެވެ. ޝަހީދުވި މީހުންގެ އަދަދު ކުރިޔަށް އޮތް ތަނުގައި އިތުރުވާނެކަމަށް ލަފާކުރެވޭކަމަށްވެސް އޭނާ ވިދާޅުވިއެވެ.
ހުކުރު ދުވަހު ޔަހޫދީން ދިން ހަމަލާ އަމާޒުކޮށްފައިވަނީ ފަލަސްޠީނުގެ ރެޑް ކްރެސެންޓުގެ އެމްބިޔުލާންސްއަކަށެވެ. މި ހަމަލާގައި 15 މީހުން ޝަހީދުކޮށއްލާފައިވާއިރު، އިތުރު 60 އެއްހާ މީހުން ވަނީ ޒަޚަމުކޮށްލާފައެވެ. ޔަހޫދީން އެމްބިޔުލާންސްތަކަށް މިސައިލް ހަމަލަތައް ދީފައި ވަނީ ފަލަސްޠީނުގެ ޢާންމުންގެ ގިނަ ޢަދަދެއްގެ ބަޔަކު އެ ސަރަޙައްދުގައި ހަރަކާތްތެރިވަމުން ދިޔަ ވަގުތެއްގައެވެ.
ޒަޔަނިސްޓު އިސްރާޢީލުގެ އަސްކަރިއްޔާއިން ވަނީ އަލް-ޝިފާ ހޮސްޕިޓަލް ކައިރީގައި އޮތް އެމްބިޔުލާންސަކަށް މިސައިލް ހަމަލަތަކެއް ދިފައިވާ ކަމަށް އެއްބަސްވެފައެވެ. ޔަހޫދީ ފައުޖުން ބުނީ، އެމްބިޔުލާންސްތަކަށް ހަމަލަ ދީފައި ވަނީ، އެއިން އުޅަނދެއްގައި ހުރި ޙަމާސް ޖަމާޢަތުގެ މެންބަރެއް ޝަހީދު ކޮށްލުމުގެ ބޭނުމުގައި ކަމުގައެވެ.
އެހެންނަމަވެސް ހަމާސްގެ އޮފިޝަލް އިއްޒަތު އަލް ރަޝިގް ވިދާޅުވީ އެ ޖަމިއްޔާގެ ހަނގުރާމަވެރިން ތިބި ކަމަށް ކުރެވޭ ތުހުމަތުތަކަކީ "އަސާސެއް ނެތް" ތުހުމަތުތަކެއް ކަމަށެވެ.
މިކަމާ ގުޅޭ ބަޔާނެއްގައި އިސްރާއީލުގެ އަސްކަރިއްޔާއިން އެމްބިއުލާންސާ ހަމާސްއާ ގުޅުން ހުރި ކަމަށް ބުނާ ބުނުމަށް ތާއީދުކުރާ އެއްވެސް ހެއްކެއް ދީފައި ނުވި ނަމަވެސް އިތުރު މަޢުލޫމާތު އާންމު ކުރަން ގަސްތުކުރާ ކަމަށް ބުނެފައިވެއެވެ.
އ.ދގެ ސެކްރެޓަރީ ޖެނެރަލް އެންތޯނިޔޯ ގުތެރޭޝް ވަނީ ޔަހޫދީންގެ މި ޢަމަލުތައް ކުށްވެރިކުރައްވާފައެވެ.