ހދ. ކުޅުދުއްފުށި ސިޓީގައި ކުރިއަށްދާ އެސްޓީއޯ ޒިގްޒެގް އިންޓަރ އޮފީސް ނުވަވަނަ ފުޓްސަލް މުބާރާތުގެ ސެމީ ފައިނަލަށް ކުލަބު ކޭއާރްއެޗް އާއި ކުލަބު ކޭސީޕީ ދަތުރުކޮށްފިއެވެ.
މުބާރާތުގެ ސެމީ ފައިނަލަށް ކުލަބް ކޭއާރުއެޗް ދަތުރުކުރީ ކުއާޓާ ފައިނަލުގެ ފުރަތަމަ މެޗުގައި ރޭ ކޭސީސީއާރުސީ 3-0 ގެ ނަތީޖާއަކުން ބަލިކޮށްގެންނެވެ.
ކޭއާރުއެޗުގެ ފަރާތުން މޮޅު ކުޅުމެއް ފެނިގެންދިޔަ މި މެޗުގައި އެ ޓީމުން ކާމިޔާބުކުރި ތިން ލަނޑުގެ ތެރެއިން ފުރަތަމަ ގޯލު ކާމިޔާބުކޮށްފައިވަނީ ފުރަތަމަ ހާފުގެ އެންމެ ފަހު ވަގުތުކޮޅުގައެވެ. މި ގޯލު އެ ޓީމަށް ކާމިޔާބުކޮށްދިނީ އަބްދުﷲ ޖުނެއިދު (ޖެންނޭ) އެވެ. އެ ޓީމުގެ ދެވަނަ ލަނޑު ދެވަނަ ހާފު ފަށައިގެން މާގިނައިރުތަކެއް ނުވަނީސް ކާމިޔާބުކޮށްދިނީ ޓީމުގެ ކެޕްޓަން އަދި މެޗުގެ މޮޅު ކުޅުންތެރިއަކަށް ހޮވުނު އަހްމަދު ދާވޫދު (ޑޭވިޑް) އެވެ. އަދި ތިންވަނަ ލަނޑު މެޗުގެ އެންމެ އެންމެ ފަހު މިނެޓުތަކުގެ ތެރޭގައި ކާމިޔާބުކޮށްދިނީ މުހައްމަދު އާލިމެވެ.
ސެމީ ފައިނަލުގެ ދެވަނަ ޖާގަ ކުލަބް ކޭސީޕީން ހޯދީ ކުއާޓާ ފައިނަލުގެ ދެވަނަ މެޗުގައި ރޭ އެމްއެންޑީއެފާއި ވާދަކޮށް ޕެނަލްޓީން ކުރިހޯދައިގެންނެވެ.
މެޗުގެ ފުރިހަމަ ވަގުތު ހަމަވިއިރު ނަތީޖާ އޮތީ 4-4 އިންނެވެ. މެޗުގައި އެންމެ ފުރަތަމަ ލީޑު ނެގީ އެމްއެންޑީއެފުންނެވެ. މެޗުގެ ތިންވަނަ މިނެޓުގައި ފެނިގެންދިޔަ މި ލަނޑަކީ ޕޮލިހުގެ އަހުމަދު ޝަރުވާން އަތުން ބައިކޮޅަށް ވަން ލަނޑެކެވެ. މި ލަނޑު ޖެހިތާ ފަސް މިނެޓުފަހުން އެމްއެންޑީއެފުން ލީޑު ފުޅާކުރިއެވެ. މި ލަނޑު ކާމިޔާބުކޮށްދިނީ ހުސެއިން ހާފިޒެވެ. އޭގެ ދެ މިނެޓުފަހުން ޕޮލިހުގެ ހަސަން މޫސާ ވަނީ އެ ޓީމުގެ ފުރަތަމަ ލަނޑު ކާމިޔާބުކޮށްފައެވެ. މި ލަނޑަށްފަހު ޕޮލިހަށް ހަމަނޭވާ ނުލެވެނީސް އެމްއެންޑީއެފްގެ ހުސެއިން ހާފިޒް ވަނީ ތިންވަނަ ލަނޑު ކާމިޔާބުކޮށްފައެވެ.
ދެ ލަނޑުގެ ތަފާތެއްގައި ވަނިކޮށް ޕޮލިހުން ވަނީ ގާތްގާތުގައި ދެ ލަނޑު ޖަހާ ނަތީޖާ 3-3 އަށް ބަދަލުކޮށްފައެވެ. އަހްމަދު ގާސިމް ދެވަނަ ލަނޑު ކާމިޔާބުކޮށްދިން އިރު، ޕޮލިހުގެ ތިންވަނަ ލަނޑަކީ ލިބުނު ޕެނަލްޓީއެއްގައި އަހްމަދު ހުޝާމް ކާމިޔާބުކޮށްދިން ލަނޑެކެވެ.
މެޗުގެ ދެވަނަ ހާފުގެ ހަތްވަނަ މިނެޓުގައި އެމްއެންޑީއެފްގެ ތައުމީން ނޫހް ވަނީ ހަތަރުވަނަ ލަނޑު ޖަހާފައެވެ. މިއީ މުބާރާތުގައި އޭނާ ޖެހި 10 ވަނަ ލަނޑެވެ. އަދި ޕޮލިހުގެ ހަތަރުވަނަ ލަނޑު ކާމިޔާބުކޮށްދިނީ އަހްމަދު ގާސިމެވެ.
ޕެނަލްޓީން ކޭސީޕީ ކުރިހޯދިއިރު، ކޮންމެ ޓީމަކުން ވަނީ ހަ ޕެނަލްޓީ ޖަހާފައެވެ. އެމްއެންޑީއެފުން ހަތަރު ޕެނަލްޓީ ނާކާމިޔާބުވިއިރު ޕޮލިހުގެ ތިން ޕެނަލްޓީ ވަނީ ނާކާމިޔާބުވެފައެވެ.
ސެމީ ފައިނަލުގައި ކޭއާރުއެޗް ބައްދަލުކުރާނީ މިރޭ ކުޅޭ ކުއާޓާގެ ތިންވަނަ މެޗުގައި އެސްޓީއޯ އާއި ދިރާގު ބައްދަލުކުރާ މެޗުން މޮޅުވާ ޓީމަކާއެވެ. އަދި ސެމީގެ ދެވަނަ މެޗުގައި ކުލަބް ކޭސީޕީ ބައްދަލުކުރާނީ މިރޭ ކުޅޭ ކުއާޓާގެ ފަހު މެޗުގައި ކޭޕީއާރުސީ އުރީދޫ ބައްދަލުކުރާ މެޗުން މޮޅުވާ ޓީމަކާއެވެ. މިރޭ ކުޅޭ ކުއާޓާ ފައިނަލުގެ ފަހު ދެ މެޗުވެސް ޔެސް ޓީވީން ވަގުތުން ގެނެސްދިނުމަށް ވަނީ ހަމަޖެހިފައެވެ.
މުބާރާތުގައި ޗެމްޕިއަން ޓީމާއި، ރަނަރަޕް އަދި ފެއާޕްލޭ ޓީމާއި، ކިންގް އޮފް ދަ ޓޯނަމެންޓުގެ އިތުރުން އެންމެ ގިނަ ލަނޑު ޖެހި ކުޅުންތެރިޔާ އަދި އެންމެ މޮޅު ފަސް ކުޅުންތެރިން ހޮވުމަށް ވަނީ ހަމަޖެހިފައެވެ. މި މުބާރާތުގެ ޗެމްޕިއަން ޓީމަށް 20000 ރުފިޔާގެ ފައިސާގެ އިނާމެއްވެސް ދިނުމަށް ވަނީ ހަމަޖެހިފައެވެ.
މުބާރާތުގެ އެކްސްކްލޫސިވް ޕާޓްނަރަކީ އެސްޓީއޯއެވެ. ބޭންކިން ޕާޓްނަރަކީ ބީއެމްއެލްއެވެ. ޑިޖިޓަންލް ޕާޓްނަރަކީ ދިރާގެވެ. މުބާރާތުގެ ބްރޯޑްކާސްޓިން ޕާޓްނަރަކީ ޔެސްޓީވީއެވެ. އަދި އޮންލައިން ޕާޓްނަރުންނަކީ ޚަބަރު އޮންލައިނާއި ވަގުތެވެ. ޕްރިންޓިން ޕާޓްނަރަކަށް ޑަބްލިއު ކްރާފްޓް ސެންޓަރ ހަމަޖައްސާފައިވާއިރު، ކޭޓްރިން ޕާޓްނަރުންނަކީ އޮރެންޖް ޑެކް އަދި ކާނިވަލް އެވެ. މުބާރާތުގެ އެޑް ބޯޑަރުންގެ ގޮތުގައި ހަމަޖައްސާފައިވަނީ އިންކްވެލް، ޗާންލަދަލިޔާ ބުކްޝޮކް އަދި ސީންއެވެ.
ޒިގްޒެގް ކުލަބަކީ ކުޅުދުއްފުށި ސިޓީގައި ކުޅިވަރު މުބާރާތްތަކާއި، ރަށުގެ ތަރައްޤީއާއި ކުރިއެރުމަށް ކުރެވޭ މަސައްކަތްތަކުގައި މުހިންމު ދައުރެއް އަދާކުރާ ޒުވާން ޓީމެއް އެކުލެވޭ ކުލަބެކެވެ.