ދެވަނަ ޑިވިޝަން ފުޓްބޯޅަ މުބާރާތް އަންނަ ޑިސެމްބަރު މަހަށް ފަސްކުރަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފިއެވެ.
އެފްއޭއެމުން ކުރިން އެ އިދާރާގެ ކަލަންޑަރުގައި މުބާރާތް ފަށާގޮތަށް ނިންމާފައި އޮތީ މި މަހުގެ 20 ވަނަ ދުވަހެވެ. މި ތާރީހަށް ކުލަބުތަކުން ދުރާލާ ކުޅުންތެރިން ހޯދައި ތައްޔާރީތައް ފެށި ނަމަވެސް މުބާރާތް ބޭއްވޭނެކަމާމެދު އޮތީ ސުވާލު އުފެދިފައެވެ. އެއީ މިހާރު ކުރިއަށްދާ ދިވެހި ޕްރިމިއާ ލީގުގެ ކުޅުންވެސް އަލުން ނުފެށި ދުގުލައިގެންދާތީ އެވެ.
އެއާއެކު އެފްއޭއެމުން ވަނީ ދެވަނަ ޑިވިޝަން އަންނަ ޑިސެމްބަރު 10 އަށް ފަސްކޮށްފައިވާކަން އިއުލާންކޮށްފައެވެ. އެފްއޭއެމުން މުބާރާތުގެ އައު ތާރީޚު އިއުލާންކުރީ އެ އިދާރާގެ ފޭސްބުކް ޕޭޖުގައި ހިއްސާކުރި ޕޯސްޓެއްގައެވެ.
މުބާރާަތް ލަސްކުރުމާއެކު ދެވަނަ ޑިވިޝަންގައި ވާދަކުރާ ގިނަ ކުލަބުތަކަށް ބޮޑު ގެއްލުމެއް ލިބޭނެއެވެ. ދެވަނަ ޑިވިޝަނަށް އެންމެ ވަރުގަދައަށް ތައްޔާރުވާ ޓީމުތަކުގެ ތެރޭގައި ވިކްޓްރީ ސްޕޯޓްސް ކުލަބާއި ނިއުރޭޑިއަންޓް ސްޕޯޓްސް ކުލަބު ހިމެނެވެ. ދެ ކުލަބުންވެސް ވަނީ މީގެ މަހެއްހާ ދުވަސް ކުރިން ފަރިތަކުރުންތައް ފަށާފައިވާއިރު، ދެ ޓީމުންވެސް ވަނީ ބިދޭސީ ކުޅުންތެރިން ގެނެސްފައެވެ.
މި ކުލަބުތަކުގެ އިތުރުން ތިންވަނަ ޑިވިޝަންގެ ތަށި ހޯދައިގެން ދެވަނަ ޑިވިޝަނަށް އެރި ބިސްބުރު ސްޕޯޓްސް ކުލަބާއި، މަސްއޮޑި ސްޕޯޓްސް ކުލަބުންވެސް އަންނަނީ ދެވަނަ ޑިވިޝަނަށް ދުރާލާ ތައްޔާރުވަމުންނެވެ. ދެވަނަ ޑިވިޝަނުގެ އެންމެ ފަހުގެ ޗެމްޕިއަން ޓީމަކީ ބުރު ސްޕޯޓްސް ކުލަބެވެ.