އިންޑިއާގައި މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި އިއްޔެ ކުޅުނު މެޗުގައި ނެދަލަންޑްސް ބަލިކޮށް، އަފްޣާނިސްތާނުން ސެމީ ފައިނަލުގެ އުއްމީދު ދަމަހައްޓައިފިއެވެ.
ލަކްނައުގައި ހުންނަ އެކަނަ ސްޕޯޓްސް ސްޓޭޑިއަމުގައި ކުޅުނު މި މެޗުން އަފްޣާނިސްތާން މޮޅުވީ ހަތް ވިކެޓުންނެވެ.
މި މެޗުގެ ގުރު ދިމާވުމުން ނެދަލަންޑްސް އެންމެ ފުރަތަމަ ކުޅެން އަރައި 46.3 ވަނަ އޯވަރުގައި ހުރިހާ ކުޅުންތެރިން ނުބައިވެގެން ހެދުނީ 179 ލަނޑެވެ. އެ ޓީމުން އެންމެ ރަނގަޅަށް ކުޅުނީ 86 ބޯޅައިން 58 ލަނޑު ހެދި ސީބްރަންޑް އެންގެލްބްރެކްޓާއި 40 ބޯޅައިން 42 ލަނޑު އެއްކުރި މެކްސް އޮޑައުޑެވެ.
މި އިނިންގްސްގައި އަފްޣާނިސްތާނުގެ މުޙައްމަދު ނަބީ ވަނީ 9.3 އޯވަރުގައި 28 ލަނޑަށް ތިން ވިކެޓް ނަގާފައެވެ. އަދި އެ ޓީމުގެ ނޫރު އަޙްމަދު ވަނީ ނުވަ އޯވަރުގައި 31 ލަނޑަށް ދެ ވިކެޓް ނަގާފައެވެ.
ޖަވާބުގައި އަފްޣާނިސްތާން ކުޅެން އަރައި އެ ޓީމުން ވަނީ 31.3 ވަނަ އޯވަރުގައި ތިން ކުޅުންތެރިން ނުބައިވެގެން 181 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅުނީ ނުބައިނުވެ 64 ބޯޅައިން 56 ލަނޑު ހެދި ހަޝްމަތުﷲ ޝަހީދީ އާއި 54 ބޯޅައިން 52 ލަނޑު އެއްކުރި ރަޙްމަތު ޝާހެވެ.
މި މޮޅާއެކު 10 ޤައުމު ވާދަކުރާ މި މުބާރާތުގެ ސެމީގެ އުއްމީދު އަފްޣާނިސްތާނުން އައުކުރިއިރު، ސެމީއަށް ދަތުރުކުރާނީ ތާވަލުގެ އެންމެ ކުރީގައި އޮންނަ ހަތަރު ޓީމެވެ. އަފްޣާނިސްތާން މި ވަގުތު އޮތީ ތާވަލުގެ ފަސްވަނައިގައި ކުޅުނު ހަތް މެޗުން ލިބުނު އަށް ޕޮއިންޓާއެކުއެވެ. އަދި ނެދަލަންޑްސް އޮތީ ތާވަލުގެ އަށްވަނައިގައި ހަތް މެޗުން ހަތަރު ޕޮއިންޓާއެކުއެވެ.