ޔަހޫދީ ފައުޖުތަކުން ޣައްޒާގެ މައި އެއް ރަށް ކަމުގައިވާ ޢައްޒާ ސިޓީ ވަށައިލައި، އެއްގަމު މަގުން އެ ރަށަށް ވަދެ ގަތުލުއާންމު ފުޅާކުރަން ތައްޔާރު ވެއްޖެއެވެ. ޣައްޒާ ސިޓީ ވަށައިލާފައިވާނެ ކަމުގައި ބުނުމުން، ޣައްޒާގައި ވެރިކަން ކުރާ ޙަމާސް ޖަމާޢަތުން ވަނީ ޒަޔަނިސްޓު އިސްރާޢީލަށް ވަރުގަދަ އިންޒާރެއް ދީފައެވެ. އެ ޖަމާޢަތުގެ ހަތިޔާރު އެޅި ގޮފި – ޢިއްޒުއްދީން އަލް-ޤައްސާމް ބްރިގޭޑްސްއިން ބުނީ ޣައްޒާ ސިޓީއަށް ވަންނަ ޔަހޫދީ ފައުޖުގެ ހުރިހާ ސިފައިން މަރައިލާނެ ކަމުގައެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީން ޣައްޒާގައި ހިންގަމުންދާ އުދުވާންތަކުގައި ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ޢަދަދު ވަނީ 9,061 އަށް އުފުލިފައެވެ. އޭގެ ތެރޭގައި ކުށެއް ނެތް 3,760 ކުޑަކުދިންނާއި 2,326 އަންހެނުންގެ އިތުރުން އުމުރުން ދުވަސްވީ އެތަކެއް ސަތޭކަ ބަޔަކު ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 32,000 އަށް އުފުލިފައެވެ. ޔަހޫދީންގެ މި ގަތުލުއާންމު ހިންގަމުން ދަނީ އެމެރިކާގެ އެއްބާރުލުމާއި އެހީތެރިކަމާ އެކުގައެވެ.
ޙަމާސްގެ ތަރުޖަމާނު އަބޫ ޢުބައިދާ ވިދާޅުވީ، "ޣައްޒާއަކީ ޔަހޫދީންގެ މުޅި ތާރީޚުގައި ވެސް ކުރިމަތިވި އެންމެ ބޮޑު ލަޢުނަތަށް ވެގެންދާނެ،" ކަމުގައެވެ. އޭނާ ޒަޔަނިސްޓު އިސްރާޢީލަށް އިންޒާރު ދެއްވާފައި މި ވަނީ، ޙަމާސްގެ މުޖާހިދުންގެ މައި މަރުކަޒު ކަމުގައިވާ ޣައްޒާ ސިޓީ ވަށައިލާ، އެ ރަށް ހިފުމަށް ތައްޔާރުވެފައިވާ ކަމުގައި ޔަހޫދީ ފައުޖުގެ ތަރުޖަމާނު ޑަނިއެލް ހަގަރީ ބުނެފައިވާ ދަނޑިވަޅެއްގައެވެ. ގަތުލުއާންމު ހުއްޓައިލުމުގެ އެއްވެސް ނިޔަތެއް ނެތް ކަމުގައި ވެސް އޭނާ ބުންޏެވެ.
ޣައްޒާގައި ހިންގަމުންދާ ގަތުލުއާންމު ފުޅާ ކުރަން ޔަހޫދީން މަސައްކަތް ކުރަމުންދާއިރު، މިޞްރާއި ޣައްޒާ ގުޅޭ ރަފަޙް ހުރަސް ވަނީ ދެވަނަ ދުވަހަކަށް ހުޅުވައިލާފައެވެ. ޣައްޒާގެ ޞިއްޙަތާ ބެހޭ ވުޒާރާއިން ބުނީ ޔަހޫދީންގެ ހަމަލަތަކުގައި ޒަޚަމު ކޮށްލާފައިވާ 21 މީހުންނަށް އިތުރު ފަރުވާ ދިނުމަށް މިޞްރަށް ގެންގޮސްފައިވާ ކަމުގައެވެ. އަދި، ބޭރު ޤައުމުތަކުގެ ޕާސްޕޯޓު ގެންގުޅޭ އިތުރު 344 މީހުން ވަނީ މިޞްރަށް ވަދެފައެވެ. އޭގެ ތެރޭގައި 72 ކުޑަކުދިން ހިމެނެއެވެ.
މިޞްރުން ބުނީ 7,000 ވަރަކަށް މީހުންނަށް ޣައްޒާ ދޫކޮށް އެ ޤައުމަށް ދަތުރު ކުރުމުގެ ފުރުޞަތު ދޭނެ ކަމުގައެވެ. ހާލުގައި ޖެހިފައިވާ މީހުން މިޞްރަށް ވަނުމުގެ ފުރުޞަތު ދީފައިވީ ނަމަވެސް ޣައްޒާއަށް އެހީ ވައްދަން ޔަހޫދީން އަދިވެސް ދަނީ ހުރަސް އަޅަމުންނެވެ. ކޮންމެ ދުވަހަކު ވެސް ޢައްޒާއަށް އެތެރެވުމަށް ހުއްދަ ދެނީ މަދު ޢަދަދެއްގެ އުޅަނދުތަކަކަށެވެ. ޣައްޒާއަށް އެހީގެ ސާމާނު އެތެރެކުރުން އަވަސް ކުރުމަށް އެހީތެރިވުމުގެ ގޮތުން 30 ޓަނުގެ ސާމާނު ފޮނުވާނެ ކަމަށް އިނގިރޭސިވިލާތުން ވަނީ ބުނެފައެވެ. އޭގެ ތެރޭގައި ހިމެނެނީ ފޯކްލިފްޓުތަކާއި، ކޮންވޭޔަރ ބެލްޓު ފަދަ ތަކެއްޗެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.