ޔަހޫދީ ފައުޖުތަކުން ޣައްޒާގައި ހިންގަމުންދާ ލާއިންސާނީ ޖަރީމާގައި ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ޢަދަދު 9,061 އަށް އަރައިފިއެވެ. ޣައްޒާގެ ޞިއްޙަތާ ބެހޭ ވުޒާރާއިން ބުނީ، އޮކްޓޫބަރު 7 ވަނަ ދުވަހުން ފެށިގެން މެދުކެނޑުމެއްނެތި ޔަހޫދީ ފައުޖުން ޣައްޒާއަށް ދެމުންދާ ހަމަލަތަކުގައި ޝަހީދު ކޮށްލާފައިވާ މީހުންގެ ތެރޭގައި 3,760 ކުޑަކުދިން ހިމެނޭ ކަމުގައެވެ.
ޣައްޒާގެ ޞިއްޙަތާ ބެހޭ ވުޒާރާގެ ތަރުޖަމާނު ވިދާޅުވީ، ޝަހީދުންގެ ތެރޭގައި 2,326 އަންހެނުންގެ އިތުރުން އުމުރުން ދުވަސްވީ އެތަކެއް ސަތޭކަ ބަޔަކު ހިމެނޭ ކަމުގައެވެ. އެމެރިކާގެ އެއްބާރުލުމާއި އެހީތެރިކަމާ އެކު ޔަހޫދީ ފައުޖުން ހިންގަމުންދާ މި އުދުވާންތަކުގައި ޒަޚަމު ކޮށްލާފައިވާ މީހުންގެ ޢަދަދު ވަނީ 32,000 އަށްވުރެ މައްޗަށް އަރާފައެވެ.
ނޮވެންބަރު 2 ވަނަ ދުވަހު ޔަހޫދީ ފައުޖުން ވަނީ ޣައްޒާގައި ހުންނަ ސްކޫލެއް ކައިރިއަށް ވެސް ބޮން އަޅައި، 27 މީހުން ޝަހީދު ކޮށްލާފައެވެ. ޖަބާލިޔާ ރެފިއުޖީ ކޭމްޕުގައި ހުންނަ އެ ސްކޫލަކީ އ.ދއިން ހިންގާ ސްކޫލެކެވެ. ހަމަލަ ދިން ވަގުތު އެ ތަނުގައި އެތަކެއް ސަތޭކަ ބަޔަކު ތިބިއިރު، އޭގެ ތެރޭގައި ގިނައީ ކުށެއް ނެތް ޢާންމުންނާއި ކުޑަކުދިންނެވެ.
ޔަހުދީންގެ ހަމަލަތަކުގައި ސުންނާފަތި ކޮށްލާފައިވާ ޢިމާރާތުގެ ދަށުގައި ގިނަ ޢަދަދެއްގެ ބަޔަކު ތާށިވެފައިވާ ކަމަށް ބެލެވޭއިރު، އެ މީހުން ސަލާމަތް ކުރަން އޮފިޝަލުންނާއި ޢާންމުން ދަނީ މަސައްކަތް ކުރަމުންނެވެ. މި ހަމަލާގައި ޝަހީދުވެފައިވާ މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައި ރިޕޯޓުތައް ބުނެއެވެ. އ.ދގެ ސްކޫލް ކައިރިއަށް ދިން ހަމަލާގައި ގިނަ ޢަދަދެއްގެ ބަޔަކު ޒަޚަމުވި ކަމުގައި ވެސް އޮފިޝަލުން ވިދާޅުވެއެވެ.
އެ ސްކޫލް ހިންގާ، ޔުނައިޓެޑް ނޭޝަންސް ރިލީފް އެންޑް ވަރކްސް އޭޖެންސީ (ޔޫ.އެން.އާރް.ޑަބްލިޔު.އޭ)ން މި ހަމަލައާ ގުޅިގެން އަދި ވަކި އެއްޗެއް ހާމަކޮށްފައެއް ނުވެއެވެ. ޖަބާލިޔާ ރެފިއުޖީ ކޭމްޕަށް އޮކްޓޫބަރު 31 ވަނަ ދުވަހު ވެސް ޔަހޫދީން ވަނީ ވަރުގަދަ ހަމަލަތަކެއް ދީފައެވެ. އެ ހަމަލަތަކުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 195 އަށްވުރެ މައްޗަށް އުފުލިފައެވެ. ޖަބާލިޔާގެ އިތުރުން ޣައްޒާގެ ދެކުނުގައި އޮންނަ ބުރައިޖް ރެފިއުޖީ ކޭމްޕަށް ވެސް ހަމަލަތަކެއްދީ 15 މީހުން ޝަހީދު ކޮށްލާފައިވާ ކަމުގައި ޣައްޒާގެ އޮފިޝަލުން ވިދާޅުވެއެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.