ޣައްޒާގެ ޖަބާލިޔާ ރެފިއުޖީ ކޭމްޕަށް ޔަހޫދީ އިސްރާޢީލުގެ ފައުޖުން ދިން ހަމަލަތަކުގައި ޝަހީދުކޮށްލާފައިވާ މީހުންގެ ޢަދަދު 195 އަށް އަރައިފިއެވެ. އެމެރިކާގެ އެހީތެރިކަމާ އެކު މެދުކެނޑުމެއް ނެތި ޣައްޒާއަށް ބޮން އަޅަމުންދާ ޔަހޫދީ ފައުޖުން ދެ ފަހަރަކު ޖަބާލިޔާއަށް މިސައިލް ހަމަލަތަކެއް ދިނެވެ. މި ހަމަލަތަކުގައި ސުންނާފަތި ކޮށްލާފައިވާ ޢިމާރާތްތަކުގެ ދަށުގައި އަދިވެސް 120 އަށްވުރެ ގިނަ މީހުން ތާށިވެފައިވާ ކަމަށް ބެލެވޭ ކަމުގައި ޣައްޒާގައި ވެރިކަން ކުރާ ޙަމާސް ޖަމާޢަތުން ބުނެއެވެ.
ޣައްޒާގެ ކުށެއް ނެތް މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު 8,805 އަށް އަރާފައިވާއިރު، އޭގެ ތެރޭގައި 3,500 އަށްވުރެ ގިނަ ޢަދަދެއްގެ ކުޑަކުދިން ހިމެނެއެވެ. 2,000 އަށްވުރެ ގިނަ އަންހެނުން ހިމެނެއެވެ. އަދި، 460 އަށްވުރެ ގިނަ އުމުރުން ދުވަސްވީ މީހުން ހިމެނެއެވެ.
ޖަބާލިޔާ ރެފިއުޖީ ކޭމްޕުގައި ސުންނާފަތި ކޮށްލާފައިވާ ޢިމާރާތްތަކުގެ ދަށުގައި ތާށިވެފައިވާ ކަމަށް ބެލެވޭ މީހުން ހޯދައި، ސަލާމަތް ކުރަން މެދުކެނޑުމެއް ނެތި ދަނީ މަސައްކަތް ކުރަމުންނެވެ. އެ ކޭމްޕަށް ރަޙުމު ކުޑަ ހަމަލަތަކެއްދީ، ކުށެއް ނެތް ގިނަ ޢަދަދެއްގެ މުސްލިމުންތަކެއް ގަތުލު ކޮށްލާފައި ވަނީ އެ ތަނުގައި ފިލައިގެން އުޅުނު ޙަމާސް ޖަމާޢަތުގެ ދެ ކޮމާންޑަރެއް ޝަހީދު ކޮށްލުމުގެ ބޭނުމުގައި ކަމުގައި ޔަހޫދީ ފައުޖުން ބުނެއެވެ.
އޮކްޓޫބަރު 7 އިން ފެށިގެން ޔަހޫދީ ފައުޖުން ހިންގަމުންދާ ގަތުލުއާންމުގައި ޒަޚަމު ކޮށްލާފައިވާ މީހުންގެ ޢަދަދު 21,048 އަރާއިރު އޭގެ ތެރޭގައި 6,380 އަށްވުރެ ގިނަ ކުޑަކުދިންނާއި 4,891 އަށްވުރެ ގިނަ އަންހެނުން ހިމެނެއެވެ. ޣައްޒާގެ މުސްލިމުން ދިރިއުޅޭ ގެދޮރުގެ 45 އިންސައްތަ މިހާރު ވަނީ ސުންނާފަތި ކޮށްލާފައެވެ.
އެ ދުވަހުން ފެށިގެން ޣައްޒާއަށް ވަދެނިކުމެވާން އޮތް ހުރިހާ ދޮރެއް ޒަޔަނިސްޓުން ވަނީ ބަންދުކޮށްފައެވެ. އޭގެ ތެރޭގައި މިޞްރާއި ޣައްޒާގެ ރަފަޙް ހުރަސް ވެސް ހިމެނެއެވެ. ނަމަވެސް، ނޮވެންބަރު 1 ވަނަ ދުވަހު ރަފަޙް ހުރަސް ހުޅުވައިލާ، ބައެއް މީހުންނަށް މިޞްރަށް ދަތުރު ކުރުމުގެ ފުރުޞަތު މިހާރު ވަނީ ހުޅުވައިލާފައެވެ.
ޣައްޒާގެ ސަރަޙައްދީ ރޮނގު ބަލަހައްޓާ އިދާރާއިން ވަނީ މިޞްރަށް ދަތުރު ކުރުމުގެ ހުއްދަ ދީފައިވާ 500 އެއްހާ މީހުންގެ ލިސްޓެއް ޢާންމު ކޮށްފައެވެ. އޭގެ ތެރޭގައި ހިމެނެނީ އެހެން ޤައުމުތަކުގެ ޕާސްޕޯޓް އޮންނަ ރައްޔިތުންނާއި ބޮޑެތި ޒަޚަމުތައް ލިބި، ފަރުވާއަށް ބޭނުންވެފައިވާ މީހުންނެވެ. އޭގެ ތެރޭގައި ބޭރުގެ ޕާސްޕޯޓް އޮތް 320 މީހުން ހިމެނެއެވެ.
ޢައްޒާއިން ބޭރުވުމުގެ ފުރުޞަތު ދީފައިވާ މީހުންގެ ތެރޭގައި ހިމެނެނީ އޮސްޓްރޭލިޔާ، އޮސްޓްރިޔާ، ބުލްގޭރިޔާ، ޗެކް ރިޕަބްލިކް، ފިންލެންޑް، އިންޑޮނީޝިޔާ، އިޓަލީވިލާތް، އުރުދުން، އެކުވެރި ޢަރަބި ޢިމާރާތް، އިނގިރޭސިވިލާތް އަދި އެމެރިކާގެ ރައްޔިތުންނަށެވެ. ރަފަޙް ހުރަސް ވަގުތީ ގޮތުން ހުޅުވައިލާފައި ވަނީ މިޞްރުން އިސްނަގައިގެން ޒަޔަނިސްޓު އިސްރާޢީލާއި ޙަމާސް ޖަމާޢަތާ ދެމެދު ކުރި މަޝްވަރާތަކަށް ފަހުއެވެ.
ނޮވެންބަރު 2 ވަނަ ދުވަހު ވެސް ރަފަޙް ހުރަސް ހުޅުވައިލާނެ ކަމަށާއި، ކުރިއަށް އޮތް ދެ ހަފުތާއެއްހާ ދުވަހުގެ ތެރޭގައި ބޭރު ޤައުމުތަކުގެ ޕާސްޕޯޓް ގެންގުޅޭ 7,500 އެއްހާ މީހުންނަށް ޣައްޒާ ދޫކޮށް މިޞްރަށް ދަތުރު ކުރުމުގެ ފުރުޞަތު ދޭނެ ކަމުގައި ޣައްޒާގެ ސަރަޙައްދީ ރޮނގު ބަލަހައްޓާ އިދާރާއިން ބުނެއެވެ.