އޮކްޓޫބަރު 7 ވަނަ ދުވަހުން ފެށިގެން ޒަޔަނިސްޓު އިސްރާޢީލުން ބަންދުކޮށްފައި އޮތް ރަފަޙް ހުރަސް ވަގުތީ ގޮތުން ހުޅުވައިލައިފިއެވެ. ރަފަޙް ސަރަޙައްދީ ހުރަހަކީ ޣައްޒާއާއި މިޞްރު ގުޅޭ ސަރަޙައްދުގައި އޮންނަ މަގެވެ. ސަރަޙައްދީ ހުރަސް ހުޅުވައިލުމަށް ފަހު، ބޭރު ޤައުމުތަކުގެ ރައްޔިތުންއި، ދެ ޤައުމުގެ ޕާސްޕޯޓު ގެންގުޅޭ ފަލަސްޠީނުގެ ރައްޔިތުންގެ އިތުރުން ޒަޚަމުވެފައިވާ ގިނަ ޢަދަދެއްގެ ބަޔަކު މިޞްރަށް ވަނުމުގެ ފުރުޞަތު ވަނީ ދީފައެވެ. ބަލި މީހުންނާއި ޒަޚަމުވެފައިވާ މީހުން މިޞްރަށް ގެންދަން ހަމަޖެހިފައި ވަނީ އެމްބިޔުލާންސްތަކުގައެވެ.
ރަފަޙް ހުރަސް ހުޅުވައިލާފައި މި ވަނީ، ޣައްޒާގެ ކުށެއް ނެތް މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު 8,525 އަށް އުފުލިފައި ވަނިކޮށެވެ. އޭގެ ތެރޭގައި 3,500 އަށްވުރެ ގިނަ ޢަދަދެއްގެ ކުޑަކުދިން ހިމެނެއެވެ. 2,000 އަށްވުރެ ގިނަ އަންހެނުން ހިމެނެއެވެ. އަދި، 460 އަށްވުރެ ގިނަ އުމުރުން ދުވަސްވީ މީހުން ހިމެނެއެވެ.
ޣައްޒާގެ ސަރަޙައްދީ ރޮނގު ބަލަހައްޓާ އިދާރާއިން ބުނީ 500 އަށްވުރެ ގިނަ މީހުންނަށް މިޞްރަށް އެތެރެވުމުގެ ފުރުޞަތު ދޭނެ ކަމުގައެވެ. މިއީ، އޮކްޓޫބަރު 7 ވަނަ ދުވަހަށް ފަހު އެ ހުރަސް ހުޅުވައިލާ، ޢާންމު ރައްޔިތުންނަށް މިޞްރަށް ދަތުރު ކުރުމުގެ ފުރުޞަތު ހުޅުވައިލާފައިވާ ފުރަތަމަ ފަހަރެވެ. މިޞްރަށް ވަނުމުގެ ހުއްދަ ދީފައިވާ މީހުންގެ ލިސްޓެއް އެ އިދާރާއިން ވަނީ ކުރިން ޢާންމު ކޮށްފައެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީން ވަނީ ޣައްޒާގެ ފުރަބަންދު ވެސް އިތުރަށް ހަރުކަށި ކޮށްފައެވެ. އަދި، ފެނާއި، ކާބޯތަކެއްޗާއި، ބޭސް ފަރުވާގެ ސާމާނުގެ އިތުރުން ތެޔޮ ވެސް އެތެރެ ކުރުން ހުއްޓުވާފައެވެ. މިއާ އެކު، ޣައްޒާގައި އިންސާނީ އެހީތެރިކަމަށް ޖެހިފައިވާ މުސްލިމުންގެ ޢަދަދު 1.4 މިލިޔަނަށް އަރާ ކަމުގައި އ.ދ ފަދަ ބައިނަލްއަޤުވާމީ އިދާރާތަކުން ވަނީ ބުނެފައެވެ. ޢައްޒާއަކީ 2.3 މިލިޔަން މީހުންގެ އާބާދީއެއް ދިރިއުޅޭ ސަހަރެކެވެ.
ޣައްޒާގައި ހާލުގައި ޖެހިފައިވާ މީހުންނަށް އިންސާނީ އެހީތެރިކަން ފޯރުކޮށްދޭން ބޭރު ޤައުމުތަކުންނާއި ބައިނަލްއަޤުވާމީ ޖަމުޢިއްޔާތަކުން ކުރަމުންދާ މަސައްކަތްތަކަށް ވެސް ޔަހޫދީން ދަނީ ހުރަސް އަޅަމުންނެވެ. ޣައްޒާގެ ރައްޔިތުންނަށް ބޭނުންވާ އެހީގެ ސާމާނު ހިފައިގެން ދަތުރުކުރާ ގިނަ ޢަދަދެއްގެ އުޅަނދުތަކެއް މިޞްރުގައި އޮތީ ތާށިވެފައެވެ. ރަފަޙް ހުރަހުން އެ އުޅަނދުތައް އެތެރެވުމަށް ޔަހޫދީން ދަނީ ހުރަސް އަޅަމުންނެވެ.
ޢައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ގަތުލުއާންމުގައި ޒަޚަމު ކޮށްލާފައިވާ މީހުންގެ ޢަދަދު 20,200 އަރާއިރު އޭގެ ތެރޭގައި 2,000 އަށްވުރެ ގިނަ ކުޑަކުދިންނާއި 1,400 އަށްވުރެ ގިނަ އަންހެނުން ހިމެނެއެވެ. ޣައްޒާގެ މުސްލިމުން ދިރިއުޅޭ ގެދޮރުގެ 45 އިންސައްތަ މިހާރު ވަނީ ސުންނާފަތި ކޮށްލާފައެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.