ޔަހޫދީ ފައުޖުން ޣައްޒާގެ ޖަބާލިޔާ ރެފިއުޖީ ކޭމްޕަށް ދިން ރަޙުމު ކުޑަ ވައިގެ ހަމަލަތަކެއްގައި ފަލަސްޠީނުގެ 50 އަށްވުރެ ގިނަ މީހުން ޝަހީދު ކޮށްލައިފިއެވެ. ޖަބާލިޔާ ރެފިއުޖީ ކޭމްޕަކީ ޣައްޒާގެ އުތުރުގައި އޮންނަ ކޭމްޕެކެވެ. އެ ތަނަށް ދިން މިސައިލް ހަމަލަތަކުގައި 150 އަށްވުރެ ގިނަ މީހުން ޒަޚަމުވެފައިވާ ކަމުގައި ޣައްޒާގެ ޞިއްޙަތާ ބެހޭ ވުޒާރާއިން ބުނެއެވެ.
ޣައްޒާގެ ކުށެއް ނެތް މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު 8,525 އަށް އަރާފައިވާއިރު، އޭގެ ތެރޭގައި 3,500 އަށްވުރެ ގިނަ ޢަދަދެއްގެ ކުޑަކުދިން ހިމެނެއެވެ. 2,000 އަށްވުރެ ގިނަ އަންހެނުން ހިމެނެއެވެ. އަދި، 460 އަށްވުރެ ގިނަ އުމުރުން ދުވަސްވީ މީހުން ހިމެނެއެވެ.
ޖަބާލިޔާ ކޭމްޕުގައި ހުންނަ އިންޑޮނީޝިޔާ ހޮސްޕިޓަލުގެ ޑިރެކްޓަރ ޑރ އާޠިފް އަލް-ކަޙްލޫތް ވިދާޅުވީ އެ ކޭމްޕަށް ދިން ހަމަލަތަކުގައި މަރުވެފައިވާ މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ ހަމަލަތައް އަމާޒު ކޮށްފައި ވަނީ ޢާންމުން ދިރިއުޅޭ ގެދޮރަށް ކަމުގައެވެ.
މި ހަމަލާގައި ޝަހީދު ކޮށްލާފައިވާ މީހުންގެ ތެރެއިން 19 މީހުންނަކީ ޣައްޒާގައި ހަރަކާތްތެރިވާ އަލް ޖަޒީރާގެ އިންޖިނޭރެއް ކަމުގައިވާ މުޙައްމަދު އަބޫ އަލް-ޤުސްމާންގެ ޢާއިލާގެ މެމްބަރުންނެވެ. ޝަހީދު ކޮށްލާފައިވާ މީހުންގެ ތެރޭގައި މުޙައްމަދުގެ ބައްޕައާއި ދެ އަންހެން ކޮއްކޮ ހިމެނެއެވެ. އަލް ޖަޒީރާއިން ވަނީ މި ހަމަލާ އެންމެ ހަރުކަށި އިބާރާތުން ކުށްވެރި ކޮށްފައެވެ.
ޒަޔަނިސްޓު އިސްރާޢީލުން ވެސް ވަނީ ޖަބާލިޔާ ކޭމްޕަށް ހަމަލަތަކެއް ދީފައިވާ ކަން ކަށަވަރު ކޮށްދީފައެވެ. ޔަހޫދީ ފައުޖުތަކުގެ ތަރުޖަމާނު ރިޗަރޑް ހެޚްތް ބުނީ، އެ ކޭމްޕަށް ހަމަލަދީ، ގިނަ ޢަދަދެއްގެ މުސްލިމުންތަކެއް ޝަހީދު ކޮށްލާފައި ވަނީ އެ ތަނުގައި ފިލައިގެން އުޅުނު ޙަމާސް ޖަމާޢަތުގެ އެންމެ މުޖާހިދެއް ޝަހީދު ކޮށްލުމުގެ ބޭނުމުގައި ކަމުގައެވެ. އެއީ، ޙަމާސްގެ އިސް ކޮމާންޑަރެއް ކަމުގައިވާ އޭނާ ބުންޏެވެ.
ޢައްޒާގައި ޒަޚަމު ކޮށްލާފައިވާ މީހުންގެ ޢަދަދު 20,200 އަރާއިރު އޭގެ ތެރޭގައި 2,000 އަށްވުރެ ގިނަ ކުޑަކުދިންނާއި 1,400 އަށްވުރެ ގިނަ އަންހެނުން ހިމެނެއެވެ. ޣައްޒާގެ މުސްލިމުން ދިރިއުޅޭ ގެދޮރުގެ 45 އިންސައްތަ މިހާރު ވަނީ ސުންނާފަތި ކޮށްލާފައެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.