ޣައްޒާގެ ކުށެއް ނެތް މުސްލިމުންނާ ދެކޮޅަށް ޔަހޫދީ ފައުޖުތަކުން ހިންގަމުންދާ ލާއިންސާނީ ޖަރީމާތަކާއި ގަތުލުއާންމު ހުއްޓައިނުލާނެ ކަމުގައި ޒަޔަނިސްޓު އިސްރާޢީލުގެ ބޮޑުވަޒީރު ބެންޖަމިން ނަތަންޔާހޫ ބުނެފިއެވެ. ޣައްޒާގައި ދިރިއުޅޭ 2.3 މިލިޔަން މުސްލިމުންނާ ދެކޮޅަށް ޔަހޫދީ ފައުޖުތަކުން ލާއިންސާނީ އުދުވާންތައް ހިންގަމުން ދަނީ އެމެރިކާގެ އެހީތެރިކަމާ އެކުގައެވެ.
ޣައްޒާގެ ކުށެއް ނެތް މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު 8,525 އަށް އަރާފައިވާއިރު، އޭގެ ތެރޭގައި 3,500 އަށްވުރެ ގިނަ ޢަދަދެއްގެ ކުޑަކުދިން ހިމެނެއެވެ. 2,000 އަށްވުރެ ގިނަ އަންހެނުން ހިމެނެއެވެ. އަދި، 460 އަށްވުރެ ގިނަ އުމުރުން ދުވަސްވީ މީހުން ހިމެނެއެވެ.
ޢައްޒާގައި ޒަޚަމު ކޮށްލާފައިވާ މީހުންގެ ޢަދަދު 20,200 އަރާއިރު އޭގެ ތެރޭގައި 2,000 އަށްވުރެ ގިނަ ކުޑަކުދިންނާއި 1,400 އަށްވުރެ ގިނަ އަންހެނުން ހިމެނެއެވެ. ޣައްޒާގެ މުސްލިމުން ދިރިއުޅޭ ގެދޮރުގެ 45 އިންސައްތަ މިހާރު ވަނީ ސުންނާފަތި ކޮށްލާފައެވެ.
އުދުވާންތަކުގެ އިތުރުން ޔަހޫދީން ވަނީ ޣައްޒާގެ ފުރަބަންދު ހަރުކަށިކޮށް، އެ ސަހަރަށް ކާބޯތަކެއްޗާއި، ފެނާއި، ބޭސްފަރުވާގެ ސާމާނާއި ތެޔޮ އެތެރެ ކުރުމަށް ހުރަސް އަޅާފައެވެ. މި އުދުވާންތަކާއި ފުރަބަންދު ހުއްޓައިލުމަށް މުޅި ދުނިޔެއިން ދަނީ އެއް އަޑަކުން ގޮވަމުންނެވެ. ނަމަވެސް، އެ ކަން ހުއްޓުވަން ކުރަމުންދާ ހުރިހާ މަސައްކަތަކަށް އެމެރިކާއިން ދަނީ ހުރަސް އަޅަމުންނެވެ. ޔަހޫދީންނާ ދެކޮޅަށް އ.ދގެ ސަލާމަތީ މަޖިލީހަށް ހުށަހަޅާ ކޮންމެ ޤަރާރެއް އެމެރިކާއިން ދަނީ ފޭލުކޮށްލަމުންނެވެ.
ޔަހޫދީންގެ ޖައްބާރު ބޮޑުވަޒީރު ނަތަންޔާހޫ ބުނީ، ޣައްޒާގެ މުސްލިމުންނާ ދެކޮޅަށް ފަށާފައިވާ ލާއިންސާނީ ޖަރީމާތައް ހުއްޓައިލުމަކީ ޙަމާސް ޖަމާޢަތުގެ ކުރިމަތީގައި ޔަހޫދީން ކުޑަކަކޫ ޖެހުން ފަދަ ކަމެއް ކަމުގައެވެ. އަދި، ޙަމާސް ޖަމާޢަތަށް އަމާންދިނުން ފަދަ ކަމެއް ކަމުގައެވެ. ޙަމާސް ޖަމާޢަތުން ރަހީނު ކޮށްފައިވާ ޔަހޫދީންގެ 230 އަސީރުން މިނިވަން ކުރުމަށް އެ ޖަމާޢަތަށް ބާރުއެޅުމަށް ވެސް އޭނާ ވަނީ ބައިނަލްއަޤުވާމީ މުޖުތަމަޢަށް ގޮވައިލާފައެވެ.
އެމެރިކާގެ އެހީތެރިކަމާ އެކު، ނަތަންޔާހޫގެ އަމުރަށް ޔަހޫދީ ފައުޖުން ޣައްޒާގެ ކުށެއް ނެތް ޢާންމުންގެ ލޭއޮހޮރުވައިލަމުން ދަނީ ޔަހޫދީންނަށް މިނިވަންކަން ހޯދައިދިނުމުގެ ނަމުގައެވެ. މި އުދުވާނުގެ ދަށުން ޔަހޫދީ ފައުޖުން ދަނީ ޣައްޒާގެ މުސްލިމުން ދިރިއުޅޭ ގެދޮރާއި، ހޮސްޕިޓަލްތަކާއި، ޞިއްޙީ މަރުކަޒުތަކާއި ސްކޫލްތަކަށް ބޮން އަޅަމުންނެވެ. ނަތަންޔާހޫ ބުނީ މުސްލިމުންނާ ދެކޮޅަށް ހިންގަމުންދާ ގަތުލުއާންމު ހުއްޓައިލާނީ ޙަމާސް ޖަމާޢަތް ނައްތައިލުމަށް ފަހު ކަމުގައެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.