ސޫރިޔާއާއި ލުބުނާނުގެ ހަނގުރާމަވެރި ޖަމާޢަތްތަކުން ދެމުންދާ މިސައިލް އަދި ޑްރޯން ޙަމަލާތަކުގެ ރައްދުގައި ޔަހޫދީ ފައުޖުތަކުން ވަރުގަދަ ވައިގެ ޙަމަލާތަކެއް ދީފިއެވެ.
ފަލަސްޠީނުގެ ޣައްޒާއަށް ޔަހޫދީ ފައުޖުތަކުން ދެމުންދާ ޙަމަލާތަކުގެ ސަބަބުން ލިބެމުންދާ ބޮޑެތި ގެއްލުންތަކުގެ ބަދަލުގައި ސޫރިޔާއާއި ލުބުނާނުގެ ހަނގުރާމަވެރި ޖަމާޢަތްތަކުންވަނީ ޔަހޫދީންނާ ދެކޮޅަށް ވަރުގަދަ ޙަމަލާތަކެއް ދީފައެވެ. އޭގެ އިތުރުން ސޫރިޔާއާއި ޢިރާޤުގައި ހުންނަ އެމެރިކާގެ އަސްކަރީ މަރުކަޒުތަކަށްވެސް ހަނގުރާމަވެރިންވަނީ މިސައިލާއި ޑްރޯން ބޭނުންކޮށްގެން ޙަމަލާ ދީފައެވެ. އެއާއެކު ފަލަސްޠީނުގައި ކުރަމުންދާ ހަނގުރާމަ ފުޅޭވެ އިތުރު ޤައުމުތަކަށް ފެތުރުމުގެ ބިރުވަނީ ބޮޑުވެފައެވެ.
ފާއިތުވި ދުވަސްތަކުގައި ސޫރިޔާގެ ސަރަޙައްދުތަކުންވަނީ ޔަހޫދީން އިސްތިޢުމާރުކޮށްފައިވާ ޖައުލާންގެ އުސްބިންތަކަށް ޙަމަލާތައް ޢަމާޒުކޮށްފައެވެ. އަދި ލުބުނާނުގައު ޙަރަކާތްތެރިވާ ޙިޒްބުﷲ ޖަމާޢަތުންވެސްވަނީ އިސްތިޢުމާރުކޮށްފައިވާ ފަލަސްޠީނުގެ ބިންތަކުގައި ޙަރަކާތްތެރިވަމުންދާ ޔަހޫދީ ފައުޖުތަކަށް ވަރުގަދަ ޙަމަލާތަކެއް ދީފައެވެ. ރައްދުގައި ޙަމަލާތަކެއް ދިން ނަމަވެސް ޔަހޫދީ ފައުޖުތަކުން ބުނެފައިވަނީ އިތުރަށް ހަނގުރާމަ ފުޅާކުރަން ބޭނުންނުވާކަމަށާއި އެންމެ ބޮޑު އިސްކަމެއް ދެނީ ފަލަސްޠީނުގެ ޣައްޒާގައި ވެރިކަންކުރާ ޙަމާސް ޖަމާޢަތް ބަލިކުރަންކަމަށެވެ.