ހދ. ކުޅުދުއްފުށި ސިޓީގައި ކުރިއަށްދާ އެސްޓީއޯ ޒިގްޒެގް އިންޓަރ އޮފީސް ނުވަވަނަ ފުޓްސަލް މުބާރާތުގައި ފުރަތަމަ މެޗުން ބަލިވި ނަމަވެސް ރޭ ކުޅުނު މެޗުން ކްލަބް ކޭސީޕީ އަތުން 1-0 އިން މޮޅުވެ ކުޅުދުއްފުށި ޕޯޓް ރެކްރިއޭޝަން (ކޭޕީއާރުސީ) މުބާރާތުގައި ކުރިއަށްދިއުމުގެ ފުރުސަތު ބޮޑުކުރިއިރު، ބޮޑު ތަފާތަކުން މެޗު ކާމިޔާބުކޮށް މުބާރާތުގެ ކުއާޓާ ފައިނަލުން ޖާގަ ޔަގީންކުރި ފުރަތަމަ ޓީމަކަށް ކޭއާރުއެޗް ވެއްޖެއެވެ.
މާލޭގެ އެންމެ މަތީ ފަންތީގައި ފުޓްސެލް ކުޅޭ ގޯލްކީޕަރު އިސްމާއިލް ފާތިހު (ތާޑޭ) އާއި، އައިހަމް ފަދަ މޮޅެތި ކުޅުންތެރިންނާއިއެކު ޕޯޓުން ރޭގެ މެޗަށް ނުކުތީވެސް މޮޅުވުމުގެ އަޒުމުގައެވެ. މޮޅުވެގެން ނޫން ގޮތަކަށް މުބާރާތުގައި ކުރިއަށް ދިއުމުގެ ފުރުސަތު ހަނިވެފައި އޮތުމުން ރޭގެ މެޗު ވެގެންގޮސްފައިވަނީ ފޯރިގަދަ އަދި ބަލާ ހިތްވާފަދަ ކުޅުމެއް ފެނިގެން ދިޔަ މެޗަކަށެވެ.
ރޭގެ މެޗުގައި ފެނިގެންދިޔަ ހަމައެކަނި ގޯލު ކާމިޔާބުކޮށްދިނީ ޕޯޓުގެ އިބްރާހިމް އަތީގެވެ. ރޭގެ މެޗުގައި ފުލުހުން ފޮނުވާލި ހަމަލާތައް ހުށިޔާރުކަމާއިއެކު ކީއްޕަރު ތާޑޭ ވަނީ ދިފާއުކޮށްފައެވެ. މިމެޗުގައި ފުލުހުންގެ ޓީމުން މޮޅު ކުޅުމެއް ދައްކައި ގިނަ ހަމަލާތަކެއް އުފެއްދި ނަމަވެސް މެޗު ނިމިގެން ދިޔައީ ގޯލެއް ކާމިޔާބު ނުކުރެވިއެވެ. މިމެޗުގެ މޮޅު ކުޅުންތެރިއަކަށް ހޮވިފައިވަނީވެސް މިމެޗުގައި މޮޅު ކުޅުމެއް ދެއްކި ތާޑޭއެވެ.
ރޭގެ މެޗުން ބަލިވި ފުލުހުން ވަނީ މުބާރާތުގައި އެޓީމު ކުޅުނު ފުރަތަމަ މެޗުން ފަސޭހަކަމާއެކު އޭއީސީ ކޮޅަށް 9 ގޯލް ޖަހާ ކާމިޔާބުކޮށްފައެވެ. ފުރަތަަމަ މެޗުގައި ޕޯޓް ވަނީ ކޭއާރުއެޗު އަތުން ބަލިވެފައެވެ.
މީގެއިތުރުން ކޭއާރުއެޗް ކުޅުނު މެޗު ކާމިޔާބުކޮށް ކުއާޓާއިން ޖާގަ ހޯދީ އޭއީސީ އާއި ވާދަކޮށް 19-0 އިން މެޗު ކާމިޔާބުކޮށްގެންނެވެ. މިއީ މިހާތަނަށް މިމުބާރާތުގައި ފެނުނު އެންމެ ތަފާތުބޮޑު ނަތީޖާއެވެ. މެޗުގައި ކޭއާރުއެޗްގެ ޖުނައިދު ވަނީ 5 ގޯލް ކާމިޔާބޮށްދީފައެވެ. އަބޫބަކުރު އާދަމް 4 ގޯލް ޖެހިއިރު، އަސްޖައު މޫސާ ވަނީ ހެޓްރިކް ހަދާފައެވެ.
ކެޕްޓަން ދާއޫދާއި، ޖަމްޝާދު މިއިން ކޮންމެ ކުޅުންތެރިޔަކު ދެގޯލް ކާމިޔާބުކޮށްދިން އިރު، އަލީ އަހުމަދާއި، ރައިހާނާއި، އާލިމް މިއިން ކޮންމެ ކުޅުންތެރިއަކު ވަނީ އެއްގޯލް ކާމިޔާބުކޮށްދީފައެވެ. މެޗުން ބަލިވުމުން އޭއީސީއަށް ވަނީ މުބާރާތުގައި ކުރިއަށްދެވޭނެ މަގު ބަންދުވެފައެވެ. ކުޅުނު ދެ މެޗުވެސް ކާމިޔާބުކޮށްގެން ކުއާޓާގެ ޖާގަ ޔަގީންކުރި ފުރަތަމަ ޓީމަކީ ކޭއާރުއެޗެވެ. ދެމެޗުން ބައިކޮޅަށް ވަން 28 ގޯލާއިއެކު އޭއީސީ ވަނީ މުބާރާތުން ކަޓާފައެވެ.
މިމެޗުގެ މޮޅު ކުޅުންތެރިޔަކަށް ހޮވިފައިވަނީ ކޭއާރުއެޗަށް ކުޅޭ ޖުނައިދެވެ. އޭނާ ވަނީ މިމެޗުގައި 5 ގޯލް ކާމިޔާބު ކޮށްދީފައެވެ.
މުބާރާތުގައި ޗެމްޕިއަން ޓީމާ ރަނަރަޕް އަދި ފެއާރ ޕްލޭ ޓީމާއި ކިންގް އޮފް ދަ ޓޯނަމެންޓްގެ އިތުރުން ކޮންމެ މެޗެއްގެ މޭން އޮފް ދަ މެޗާއި އެންމެ ގިނަ ގޯލްޖެހި ކުޅުންތެރިޔާ އަދި އެންމެ މޮޅު 5 ކުޅުންތެރިން ހޮވުމަށް ހަމަޖެހިފައިވެއެވެ. މިމުބާރާތުގެ ޗެމްޕިއަން ޓީމަށް 20 ހާސް ރުފިޔާގެ ފައިސާގެ އިނާމެއް ވެސް ދިނުމަށް ހަމަޖެހިފައިވެއެވެ.
މުބާރާތުގެ އެކްސްކްލޫސިވް ޕާޓްނަރަކީ އެސްޓީއޯއެވެ. ބޭންކިން ޕާޓްނަރަކީ ބީއެމްއެލްއެވެ. ޑިޖިޓަންލް ޕާޓްނަރަކީ ދިރާގެވެ. މުބާރާތުގެ ބްރޯޑްކާސްޓިން ޕާޓްނަރަކީ ޔެސްޓީވީއެވެ. އަދި އޮންލައިން ޕާޓްނަރުންނަކީ ޚަބަރު އޮންލައިނާއި ވަގުތެވެ. ޕްރިންޓިން ޕާޓްނަރަކަށް ޑަބްލިއު ކްރާފްޓް ސެންޓަރ ހަމަޖައްސާފައިވާއިރު، ކޭޓްރިން ޕާޓްނަރުންނަކީ އޮރެންޖް ޑެކް އަދި ކަނިވަލް އެވެ. މުބާރާތުގެ އެޑް ބޯޑަރުންގެ ގޮތުގައި ހަމަޖައްސާފައިވަނީ އިންކްވެލް، ޗާންލަދަލިޔާ ބުކްޝޮކް އަދި ސީންއެވެ.