ޔަހޫދީ އިސްރާޢީލުގެ ޖާސޫސީ އިދާރާއަށް ފާޑުކިޔައި މީސްމީޑިޔާގެ މަންސައެއް ކަމުގައިވާ އެކްސް (ކުރީގައި ޓްވިޓަރ)ގައި ޝާއިޢު ކުރި ޕޯސްޓަކާ ގުޅިގެން ޒަޔަނިސްޓު އިސްރާޢީލުގެ ބޮޑުވަޒީރު ބެންޖަމިން ނަތަންޔާހޫ ހޫނުފެނަށް ވެއްޓިއްޖެއެވެ. ފަލަސްޠީނުގެ މިނިވަން ކަމަށް ޖިހާދު ކުރާ ޙަމާސް ޖަމާޢަތުން އޮކްޓޫބަރު 7 ވަނަ ދުވަހު ޔަހޫދީންނަށް ދިން ހަމަލައާ ގުޅޭ ގޮތުން ނަތަންހޫ ބުނީ، އެ ފަދަ ހަމަލައެއް ދޭން އުޅޭ ކަމުގެ މަޢުލޫމާތު ޖާސޫސީ އިދާރާގެ އިސްވެރިން އޭނާއާ ހިއްސާކޮށްފައި ނުވާ ކަމުގައެވެ.
"ޙަމާސްއިން ހަނގުރާމައެއް ފަށަން އުޅޭ ކަމުގެ މަޢުލޫމާތު އެއްވެސް ފުރުޞަތެއްގައި ބޮޑުވަޒީރު ނަތަންޔާހޫއާ ހިއްސާކޮށްފައެއް ނެތް. އެ ކަމާ ގުޅޭ ގޮތުން އިންޒާރު ދީފައެއް ނެތް. ކަން ހިނގާފައި ވަނީ ދިމާ އިދިކޮޅަށް. އަސްކަރިއްޔާއާއި ޖާސޫސީ އިދާރާގެ އިސްވެރިން ބުނަމުން ދިޔައީ ޙަމާސްއިން ހަނގުރާމައެއް ފަށަން ނޫޅޭ ކަމަށް،" އެކްސްގައި ޝާއިޢު ކުރި ޕޯސްޓެއްގައި ނަތަންޔާހޫ ބުންޏެވެ.
އަމިއްލަ ޤައުމުގެ ޖާސޫސީ އިދާރާއަށް ފާޑުކިޔައި ޓްވީޓު ކުރުމާ ގުޅިގެން ފާޑުކިޔުންތައް އަމާޒުވެ، ހޫނުފެނަށް ވެއްޓުމާ އެކު ނަތަންޔާހޫ ވަނީ އޭނާ ކުރި ޓްވީޓް ފުހެލާފައެވެ. އަދި، އެ ކަމަށް މަޢާފަށް އެދިފައެވެ. ނަތަންޔާހޫގެ ޓްވީޓަށް ގިނަ ބަޔެއްގެ ނުރުހުމާއި ފާޑުކިޔުންތައް އަމާޒުވިއެވެ. އަދި، އޭނާގެ ކެބިނެޓުގެ ބައެއް މެންބަރުންގެ ތާޢީދު ގެއްލި، ނުރުހުން އަމާޒުވިއެވެ.
ޙަމާސްއިން ޔަހޫދީންނާ ދެކޮޅަށް ވަރުގަދަ އޮޕަރޭޝަނެއް ހިންގުމަކީ އިސްރާޢީލުގެ ގިނަ އިދާރާތަކެއްގެ ފޭލުވުމެއްގެ ގޮތުގައި ގިނަ ބަޔަކު ސިފަ ކުރެއެވެ. އަދި، އެ ކަން ގަބޫލުކުރާ ކަމުގައި ޔަހޫދީ އަސްކަރިއްޔާއާއި، ޖާސޫސީ އިދާރާގެ އިތުރުން ޒަޔަނިސްޓު ސަރުކާރުގެ ފިނޭންސް މިނިސްޓަރު ވެސް ވަނީ ބުނެފައެވެ. ނަމަވެސް، އެ ކަމުގެ ޒިންމާ އުފުލަން ނަތަންޔާހޫ ދަނީ ދެކޮޅު ހަދަމުންނެވެ. މިއީ ވެސް އޭނާއަށް ފާޑުކިޔުންތައް އަމާޒުވެފައިވާ އެއް ސަބަބެވެ.
ޖާސޫސީ އިދާރާއަށް ފާޑުކިޔައި ޕޯސްޓެއް ޝާއިޢު ކުރިތާ 10 ވަރަކަށް ގަޑިއިރު ފަހުން ނަތަންޔާހޫ ވަނީ އެ ޕޯސްޓުގައި ބުނެވުނު އެއްޗަކަށް މަޢާފަށް އެދޭ ކަމުގައި ބުނެފައެވެ. އަދި، ޒަޔަނިސްޓު އިސްރާޢީލުގެ ޖާސޫސީ އިދާރާއަށް އޭނާގެ ފުރިހަމަ އިތުބާރު އޮތް ކަމުގައި ބުނެފައެވެ.
ނަތަންޔާހޫގެ ޕޯސްޓަށް ފާޑުކިޔާފައިވާ ބައެއް މީހުންގެ ތެރޭގައި އިސްރާޢީލުގެ ކުރީގެ ދިފާޢީ ވަޒީރު ބެނީ ގަންޓްޒް ހިމެނެއެވެ. އޭނާއަކީ މިހާރު ނަތަންޔާހޫގެ ހަނގުރާމައިގެ ކެބިނެޓުގެ މެންބަރެއް ވެސް މެއެވެ. އޭނާ ބުނީ، ޖާސޫސީ އިދާރާއަށް ފާޑުކިޔައި ނަތަންޔާހު ޝާއިޢު ކުރި ޕޯސްޓު ފޮހެން ޖެހޭ ކަމުގައެވެ. އަދި، އެއަށްވުރެ ޒިންމާދާރުވާން ގެންޓްޒް ވަނީ ނަތަންޔާހޫއަށް ގޮވައިލާފައެވެ.
އިދިކޮޅު ލީޑަރު އަދި ކުރީގެ ބޮޑުވަޒީރު ޔައިރް ލަޕީދް ބުނީ ހުރަސްކުރަން ނުޖެހޭ 'ރަތް ރޮނގެއް' ނަތަންޔާހޫ ހުރަސް ކޮށްފައިވާ ކަމުގައެވެ. އަދި، ނަތަންޔާހޫ ޒިންމާއިން ރެކެން މަސައްކަތް ކުރަމުންދާ ކަމަށް ލަޕީދް ތުހުމަތު ކުރިއެވެ. އަދި، ޖާސޫސީ އިދާރާގެ ކޮނޑުގައި ޒިންމާ އަޅުވައި، އެ އިދާރާ ބަދުނާމު ކުރަން އޭނާ މަސައްކަތް ކުރަމުންދާ ކަމުގައި ވެސް ލަޕީދް ބުންޏެވެ.
"އެ ޕޯސްޓުން ހާމަވަނީ އެންމެ ކަމެއް: ނަތަންޔާހޫ އަކީ ޔަހޫދީންގެ ސަލާމަތާއި ރައްކާތެރި ކަމަށް އެއްވެސް ވަރަކަށް އިސްކަންދޭ މީހެއް ނޫން ކަން. ޙަމާސްއިން ރަހީނު ކޮށްފައިވާ އަސީރުން މިނިވަން ކުރަން އިސްކަންދޭ މީހެއް ނޫން ކަން. އޭނާގެ ހަމައެކަނި ބޭނުމަކީ އޭނާގެ ސިޔާސީ ހަޔާތް ކުރިއެރުވުން ކަން،" ނަތަންޔާހޫއަށް ފާޑުކިޔައި ލަޕީދް ބުންޏެވެ. އޭނާގެ އިތުރުން ވެސް، ނަތަންޔާހޫގެ ކެބިނެޓުގެ އެހެން މެންބަރުންނާއި، ސަރުކާރާއި ވެރިކަން ކުރާ ޕާޓީގެ މެންބަރުންގެ އިތުރުން، އިދިކޮޅު ޕާޓީތަކާއި އިސްރާޢީލުގެ ޢާންމު ރައްޔިތުން ވެސް ދަނީ އޭނާއަށް ފާޑު ކިޔުންތައް އަމާޒު ކުރަމުންނެވެ.
އޮކްޓޫބަރު 7 ވަނަ ދުވަހު 'އޮޕަރޭޝަން އަޤްޞާ ފްލަޑް'ގެ ނަމުގައި ޙަމާސް ޖަމާޢަތުން ހިންގާފައި ވަނީ ތަޢުރީފު ހައްޤު އޮޕަރޭޝަނެކެވެ. ޔަހޫދީ ފައުޖުތަކަށް ސިހުން ގެނުވި އެ އޮޕަރޭޝަނުގައި ޙަމާސްއިން ވަނީ ޔަހޫދީންގެ 1,400 އަށްވުރެ ގިނަ މީހުން މަރައިލާފައެވެ. އަދި، 5,400 އަށްވުރެ ގިނަ މީހުން ޒަޚަމު ކޮށްލާފައެވެ. އަދި، އަސީރުންގެ ގޮތުގައި ގެންގޮސްފައިވާ މީހުންގެ ޢަދަދު 200 އަށްވުރެ މައްޗަށް އަރައެވެ.