އެމެރިކާގެ ވާގިވެރިވެރިކަމާއެކު ޔަހޫދީ އިސްރާއީލުން ފަލަސްތީނުގެ ޣައްޒާއަށް އަމާޒުކޮށް ދެމުންގެންދާ ރަހުމެއްނެތް ހަމަލާތަކުގައި ނިކަމެތިވެ، ކާބޯތަކެއްޗަށް ޖެހިފައިވާ ޣައްޒާގެ އާންމުން އދ.ގެ ފަލަސްތީނު ރިލީފް އެންޑް ވޯކްސް އޭޖެންސީ، ޔޫ.އެން.އާރް.ޑަބްލިޔު.އޭ ގެ ގުދަންތަކަށް ވަދެ ކާބޯތަކެއްޗާއި އެނޫންވެސް އަސާސީ ބޭނުންތަކަށް ބޭނުންވާ ތަކެތި ގެންދަން ފަށައިފިއެވެ.
"މިއީ ތިން ހަފްތާގެ ހަނގުރާމައަށްފަހު، މަދަނީ އަމުރު ރޫޅެން ފަށާފައިވާ ކަމުގެ ކަންބޮޑުވާ ނިޝާނެއް." ރިލީފް އޭޖެންސީ އާންމުކޮށްފައިވާ ބަޔާނެއްގައި ބުނެފައިވެއެވެ. މިސްރުން ޣައްޒާއަށް ފޯރުކޮށްދެމުންދާ ބައެއް އެހީ ރައްކާކުރަމުން އަންނީ ޣައްޒާގެ ދީރް އަލް ބަލާހުގައި ހުންނަ ގުދަނެއްގައެވެ.
ރިލީފް އޭޖެންސީގެ ތަރުޖަމާނު ޖޫލިއަޓް ތޮއުމާ ވިދާޅުވި ގޮތުގައި ޣައްޒާގެ އާންމުން ވަނީ އެ އޭޖެންސީގެ ހަތަރު ގުދަނަކަށް ހޮނިހިރު ދުވަހު ވަދެފައެވެ. ނަމަވެސް ޣައްޒާއަށް އެންމެ ބޭނުން ޖެހިފައިވާ ތެޔޮ އެ ގުދަންތަކުގައި ނުހުންނާނެ ކަމަށް ޖޫލިއަޓް ވިދާޅުވިއެވެ. ރިލީފް އޭޖެންސީގެ ވެރިޔާ ތޯމަސް ވައިޓް ވިދާޅުވި ގޮތުގައި ގެދޮރު ގެއްލިފައިވާ މީހުންގެ އަދަދު އިތުރުވަމުންދާތީ، އެހީ ފޯރުކޮށްދޭ ޖަމާއަތްތަކަށްވެސް ވަނީ ދަތިވެފައެވެ. ބައެއް އާއިލާތަކުން ތިބީ 50 މީހުން އެއް ގެ އެއްގައިކަންވެސް ތޯމަސް ފާހަގަކުރެއްވިއެވެ. ތޯމަސް އިތުރަށް ވިދާޅުވި ގޮތުގައި ޣައްޒާއަށް މިހާރު އެހީ ފޯރުކޮށްދެމުންދާލެއް ވަރަށް ލަހެވެ. އަދި އެހީ ހިފައިގެން އަންނަ ގާފިލާތައް ޔަހޫދީން ވަރަށް ރަނގަޅަށް ބަލާ ފާސްކުރާ ކަމަށާއި، ތެޔޮ ނުލިބުމަކީވެސް އެހީ ފޯރޮކޮށްދޭ މުޅި ނިޒާމް ފެއިލްވެފައިވާ ކަމުގެ ހެއްކެއް ކަމަށް އޭނާ އިތުރަށް ވިދާޅުވިއެވެ.
ޔަހޫދީ އިސްރާއީލުން ދެމުންގެންދާ ވައިގެ ހަމަލާތަކުގެ ސަބަބުން ޣައްޒާގެ އާންމުންނަށް އެހީތެރިވުމަށް ދަތިވެފައިވާ ކަމަށްވެސް ރިލީފް އޭޖެންސީން ބުނެއެވެ. ހަމަލާތަކުގައި އެ އޭޖެންސީގެ 50 ށް ވުރެ ގިނަ މުވައްޒަފުން މަރުވެފައިވާ ކަމަށް އޭޖެންސީ ހާމަކުރެއެވެ.
އދ.ގެ ރިލީފް އޭޖެންސީން އަންނަނީ ޣައްޒާއަށް ބޭނުންވާ އިންސާނީ އެހީ ފޯރުކޮށްދެމުންނެވެ. ގެދޮރު ގެއްލިފައިވާ ޣައްޒާގެ އެތައް ސަތޭކަ ބަޔަކު ވަނީ ރިލީފް އޭޖެންސީން ހިންގާ ސްކޫލްތަކުގެ ހިޔާވަހިކަން ހޯދާފައެވެ. އެގޮތުން ޣައްޒާގެ ގެދޮރު ގެއްލިފައިވާ 1.4 މިލިއަން މީހުންގެ ތެރެއިން 613،000 އަށް ވުރެ ގިނަ މީހުން ދަނީ ރިލީފް އޭޖެންސީގެ 150 ފެސިލިޓީއެއްގައި ހިޔާވަހިކަން ހޯދަމުންނެވެ. ނަމަވެސް ވަރަށް ބޮޑަށް ތޮއްޖެހުމާއި، އެކަށީގެންވާ ސާފުތާހިރުކަން ނެތުމުން އާންމު ސިއްހަތުގެ ނުރައްކާތެރިކަން މިތަންތަނަށް ވަނީ އިތުރުވެފައެވެ. އެޖެންސީން ބުނާގޮތުން ބައެއް ހިޔާތަކުގައި މިހާރު އެތަންތަނުގެ ކެޕޭސިޓީއަށް ވުރެ 10 އާއި 12 ގުނަ އިތުރަށް މީހުން އެބަތިއްބެވެ. ހަމައެކަނި މިސްރުން ޣައްޒާއަށް ފޯރުކޮށްދެމުން އަންނަ އެހީއިން އާންމު ރައްޔިތުންނަށް ނުފުދޭ ކަމަށްވެސް ރިލީފް އޭޖެންސީން ވަނީ ފާހަގަކޮށްފައެވެ.
ޔަހޫދީ އިސްރާއީލުން ޣައްޒާއަށް ދެމުންގެންދަ ލާއިންސާނީ އަމަލުތަކުގައި މިހާތަނަށް ޝަހީދުވި މީހުންގެ އަދަދު 8000 ން މަތިވެފައިވާއިރު، ހަނގުރާމައިގެ ދެވަނަ މަރުހަލާއަށް ތައްޔާރު ވުމަށް ޔަހޫދީ ދައުލަތުގެ ވެރިޔާ ބެންޖަމިން ނަތަންޔާހޫ ވަނީ ވިދާޅުވެފައެވެ.
ޣައްޒާއަށް ކާބޯތަކެއްޗާއި، ފެނާއި، ބޭސްފަރުވާއަށް ބޭނުންވާ ސާމާނުގެ އިތުރުން ތެޔޮ އެތެރެކުރަން ޔަހޫދީން ހުރަސް އަޅަމުންދާއިރު، ޣައްޒާގައި ދިރިއުޅޭ 2.3މިލިޔަނެއްހާ މުސްލިމުންނާ ދެކޮޅަށް ލާއިންސާނީ ޖަރީމާތައް ހިންގަމުން ދަނީ އެމެރިކާގެ ވާގިވެރިކަމާއި އެހީތެރިކަމާ އެކުގައެވެ.
އޮކްޓޫބަރު 27 ވަނަ ދުވަހު ޔަހޫދީ ފައުޖުތަކުން ވަނީ ޣައްޒާއިން މުވާސަލާތީ ޚިދުމަތްތައް ވެސް ކަނޑައިލާފައެވެ. އަދި، ޔަހޫދީ ފައުޖުތަކުން މިހާރު ވަނީ އަސްކަރީ ޓޭންކުފަހަރުގައި އެއްގަމު މަގުން ޣައްޒާއަށް އަރާފައެވެ. އެއްގަމު މަގުން ހިންގަމުންދާ މި އޮޕަރޭޝަނުގެ މައިގަނޑު މަޤުޞަދަކީ، ވީހާވެސް ގިނަ ޢަދަދެއްގެ މުސްލިމުން ގަތުލު ކުރުމެވެ. ޝަހީދު ކޮށްލުމެވެ. ކުށެއް ނެތް އަންހެނުންނާއި ކުޑަކުދިންގެ ލޭއޮހޮރުވައިލުމެވެ.