ޤައުމީ ފުޓްބޯޅަ ޓީމުގެ ތައްޔާރީތަކަށާއި އޭއެފްސީ ކަޕުގައި ކުޅޭ މާޒިޔާ ސްޕޯޓްސް އެންޑް ރެކްރިއޭޝަނުގެ ތައްޔާރީތަކަށް މެދުކަނޑާލާފައި އޮތް ދިވެހި ޕްރިމިއަރ ލީގުގެ ކުޅުން ފެށުން ފަސްކޮށްފިއެވެ.
މީގެ ކުރިން ލީގުގެ ކުޅުން އިއްޔެ އަލުން ފެށުމަށް ހަމަޖެހިފަ އޮތް ނަމަވެސް މިހާރު ވަނީ ފަސްކޮށްފައެވެ. ލީގުގެ ކުޅުން ފެށުމާ ގުޅޭގޮތުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާ ސުވާލުކުރުމުން އެކަމަށް ޖަވާބެއް ދީފައެއް ނުވެއެވެ. މައުލޫމާރތު ލިބޭ ގޮތުގައި ލީގުގެ ކުޅުން ވަނީ 10 ދުވަހަށް ފަސްކޮށްފައެވެ.
އެންމެ ފަހުން ލީގު މެޗެއް ކުޅެފައި ވަނީ މިދިޔަ އޯގަސްޓް މަހުގެ 29 ވަނަ ދުވަހުގެރެއެވެ. އޭގެ ފަހުން ލީގުގެ ކުޅުން މެދުކަނޑާލީ އޭއެފްސީ ކަޕުގައި މާޒިޔާ ކުޅޭ މެޗުތަކަށާއި، ފީފާ ވޯލްޑް ކަޕް އަދި އޭއެފްސީ އޭޝިއަން ކަޕުގެ ކޮލިފައިންގައި ބަންގްލަދޭޝްއާ ދެކޮޅަށް ރާއްޖެ ކުޅޭ ދެ މެޗަށެވެ.
އެފްއޭއެމަށް ފީފާ އާއި އޭއެފްސީން އަދި އެނޫން ވެސް ގޮތްގޮތުން ދޭ ފައިސާ، އެތަނުގެ ވެރިން ނަހަމަ ގޮތުގެ ބޭނުންކުރާ ކަމުގެ ތުހުމަތުގައި މިދިޔަ ހަފުތާގެ އާދިއްތަ ދުވަހު ފުލުހުން ވަނީ އެ އިދާރާއަށް ވަދެ ތަހުގީގުގެ ބޭނުމަށް ބައެއް ތަކެތި ގެންގޮސްފައެވެ. އެއާއެކު މިދިޔަ ބުރާސްފަތު ދުވަހު އެފްއޭއެމުން ނެރުނު ބަޔާނުގައި ވަނީ އެފްއޭއެމްގެ އިދާރާ ފުލުހުން ރެއިޑްކޮށް ތަހުގީގަށް ބައެއް ސާމާނު ގެންދިއުމުން ދުވަހުން ދުވަހަށް ކުރަން ޖެހޭ މަސައްކަތް ހުއްޓިފައިވާ ކަމަށާއި، ލީގާއި ރޭވިފައި ހުރި އެހެން މުބާރާތްތައްވެސް ކުރިއަށް ނުގެންދެވޭނެ ކަމަށް ބުނެފައެވެ.
ލީގުގެ ޝެޑިއުލް އެންމެ ފަހުން އެފްއޭއެމުން އާންމުކުރީ އޯގަސްޓް މަހުގެ 19 ވަނަ ދުވަހެވެ. އެ ޝެޑިއުލްގައިވާ ގޮތުން، އިންޓަނޭޝަނަލް ބްރޭކަށް ފަހު އިއްޔެ ހަވީރު ލީގު އަލުން ފަށަން ހަމަޖެހިފައި އޮތީ ކްލަބް އީގަލްސް އާއި ޔުނައިޓެޑް ވިކްޓަރީ ކުޅޭ މެޗުންނެވެ.