އަންހެނަކު ދެއަތް އުފުލާލައިގެން އިނދެ ދުޢާ ކުރާ މަންޒަރު ފެންނަ ފޮޓޯއެއް ފޭސްބުކް ޕްރޮފައިލް ފޮޓޯއަކަށް ލައިގެން އުޅޭތާ އެތައް ދުވަހެއްވީއެވެ. ފޮޓޯގައި ލިޔެފައިވާ ލިޔުންކޮޅުގައި ވަނީ "ހައްދަވާ ބޮޑުކުރެއްވި ރަސްކަލާކޯއޭ، އަހަރެން ބޭނުންވާ އެއްޗެއް އަހަންނަށް ދެއްވާނދޭ" މިހެންނެވެ.
މިއީ ޣައްޒާއަށް އުފަން ވަފާއާއި ފާދީ އަލް ބާބާގެ ވާހަކައެވެ. ކައިވެނިކޮށްގެން އުޅޭތާ 15 އަހަރުވީއިރުވެސް، ދެމަފިރިން ދަރިއަކަށް ކުރި އުންމީދު ފުރިހަމައެއްނުވިއެވެ. އެމީހުން އަބަދުވެސް ދުޢާކޮށްކޮށް ތިބީ ކުއްޖަކުލިބޭނެ ދުވަހަކަށެވެ. ދުޢާކޮށްކޮށް ތިއްބާ ﷲގެ ތަނަވަސް ރަޙުމަތުން ސެޕްޓެމްބަރު މަހުގެ 9ވަނަ ދުވަހު ވަފާއާއި ފާދީއަށް ލިބުނީ އެއްމާބަނޑު ހަތަރު ކުދިންނެވެ. އެއީ މަހާ، ޚާލިދު، ޢަބްދުލްޚާލިޤް، އަދި މަޙްމޫދެވެ. އަންހެން ކުއްޖަކާ ތިން ފިރިހެން ކުދިންނެވެ.
ވަފާއާއި ފާދީގެ ވާހަކަ ޣައްޒާގެ ވަރަށް ގިނަ ބަޔަކު ދަނެއެވެ. ކުދިން ލިބުމާއެކު ގިނަ ބަޔަކު ވަނީ އެ ދެމަފިރިންނަށް މަރުޙަބާވެސް ކިޔާފައެވެ. ނަމަވެސް އޭގެ އެއް މަސް ފަހުން ވަފާއާއި ހަތަރު ކުދިންވެސް މިވަނީ މި ދުނިޔެއާ ވަކިވެފައެވެ. އިސްރާއީލްގެ އަސްކަރިއްޔާއިން ފަލަސްތީނުގެ ޣައްޒާއަށް އަމާޒުކޮށް މި މަހުގެ 7 ވަނަ ދުވަހުން ފެށިގެން ދެމުންގެންދާ ހަމަލާތަކުގައި ފާދީ ފިޔަވައި އޭނާގެ އާއިލާގެ އެންމެން ޝަހީދުވީއެވެ.
ފާދީ އާއި ވަފާއަށް ލިބުނު ހަތަރު ކުދިންގެ ތެރެއިން ދެ ކުދިންނަށް ނަން ދީފައި ވަނީ ދެ މަފަރިންގެ ބައްޕަގެ ނަމާއި ގުޅުވައިގެންނެވެ. ޚާލިޤް އަލް ބާބާއާއި ޢަބްދުލްޚާލިޤ އަލް ސްވާކީއެވެ.
ވަފާއާއި އޭނާގެ ހަތަރު ކުދިން ޝަހީދުވުމާ ގުޅިގެން ގިނަ ބަޔަކު އަންނަނީ ސޯޝަލް މީޑިއާގެ ހިތާމައިގެ މެސްޖުތައްވެސް ލިޔަމުންނެވެ. އެ ދެމަފަރިން މުޅި އުމުރު ދުވަހު ކުރި އުންމީދު އެންމެ ދުވަހަކުން އަޅިއަށްވީއެވެ.
އިސްރާއީލުން ފަލަސްތީނުގެ ޣައްޒާއަށް އަމާޒުކޮށް މި މަހުގެ 7 ވަނަ ދުވަހުން ފެށިގެން ދެމުންގެންދާ ހަމަލާތަކުގައި މިހާތަނަށް 5،000އަށް ވުރެ ގިނަ މީހުން ޝަހީދުވެފައިވާ ކަމަށް ޣައްޒާގެ ސިއްހީ ވުޒާރާއިން ވަނީ ހާމަކޮށްފައެވެ. އޭގެތެރޭގައި 2،000އަށް ވުރެ ގިނަ ކުޑަކުދިން ހިމެނެއެވެ.