އެމެރިކާ ސިފައިން ތިބޭ އިރާޤުގައި ދެ އަސްކަރީ މަރުކަޒަކަށް ރޮކެޓާއި ޑްރޯން ހަމަލަތަކެއް ދީފިއެވެ. ހަނަލަތައް އަމާޒު ކޮށްފައި ވަނީ އިރާޤުގެ ހުޅަނގުގައި ހުންނަ ޢައިން އަލް-އަސަދް އަސްކަރީ މަރުކަޒަށާއި، ވެރިރަށް ބަޣްދާދުގެ މައި ވައިގެ ބަނދަރު ކައިރީގައި އޮންނަ އަސްކަރީ މަރުކަޒަކަށެވެ. ޢައިން އަލް-އަސަދް އަސްކަރީ މަޒުކަޒުގައި އެމެރިކާ ސިފައިންގެ އިތުރުން އެހެން ޤައުމުތަކުގެ ސިފައިން ވެސް ތިބެއެވެ.
އެމެރިކާ ސިފައިން އިރާޤުގައި ތިބޭ އަސްކަރީ މަރުކަޒުތަކަށް ހަމަލަ ދީފައި މި ވަނީ، ޔަހޫދީން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ އުދުވާންތަކުގައި އެމެރިކާއިން ޒަޔަނިސްޓު އިސްރާޢީލަށް އެހީތެރިކަމާއި އެއްބާރުލުން ފޯރުކޮށްދިނުމާ ގުޅިގެންނެވެ. އިރާޤުގައި ހަރަކާތްތެރިވާ ހަތިޔާރުއެޅި ގުރޫޕުތަކުން ވަނީ މި ކަމާ ދެކޮޅަށް އިންޒާރު ދީފައެވެ.
އެ ގުރޫޕުތަކުން ރޮކެޓާއި ޑްރޯން ބޭނުންކޮށްގެން ދިން ހަމަލަތަކުގައި އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައެއް ނެތެވެ. އެމެރިކާގެ އަސްކަރިއްޔާގެ އިސް އޮފިޝަލަކު ވިދާޅުވީ، ވައިގެ ބަނދަރު ކައިރީގައި އޮންނަ އަސްކަރީ މަރުކަޒަށް ދެ ރޮކެޓް ހަމަލަ ދީފައިވާ ކަމުގައެވެ. އެއް ހަމަލަ ދިފާޢުކޮށްފައިވާއިރު، ދެވަނަ ހަމަލަ އަރާފައި ވަނީ ގުދަނަކަށް ކަމުގައި އޭނާ ވިދާޅުވިއެވެ. އޭގެ ކުރިން، އެމެރިކާ ސިފައިން ތިބޭ އިތުރު ދެ އަސްކަރީ މަރުކަޒަކަށް ވެސް ހަނގުރާމަވެރިން ހަމަލަ ދީފައިވެއެވެ.
އިރާޤުގެ އެކި ކަންކޮޅުތަކުގައި ތިބޭ އެމެރިކާ ސިފައިންގެ ޢަދަދު އަދިވެސް 2,500 އަށްވުރެ ގިނައެވެ. އަދި، އަވައްޓެރި ސޫރިޔާގައި ވެސް 900 އެއްހާ އެމެރިކާ ސިފައިން ހަރަކާތްތެރިވެއެވެ. އެ މީހުންގެ މައިގަނޑު މަޤުޞަދަކީ، ޓެރެރިސްޓުންގެ ޖަމާޢަތެއް ކަމުގައިވާ އިސްލާމިކް ސްޓޭޓް (އައި.އެސް)އާ ދެކޮޅަށް އެ ދެ ޤައުމުގެ ފައުޖުތަކުން ކުރަމުންދާ ހަނގުރާމައިގައި އަސްކަރީ ގޮތުން އެހީތެރިކަން ފޯރުކޮށްދިނުމެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ ސިފައިން ޣައްޒާގައި ހިންގަމުންދާ ލާއިންސާނީ އުދުވާންތަކުގައި މިހާތަނަށް 4,385 މީހުން ވަނީ ޝަހީދު ކޮށްލާފައެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 13,000 އަށްވުރެ އިތުރެވެ. މީގެ އިތުރުން، ރަޙުމު ކުޑަ ހަމަލަތަކުގައި ސުންނާފަތި ކޮށްލާފައިވާ ޢިމާރާތްތަކުގެ ދަށުގައި ތާށިވެފައިވާ ކަމަށް ބެލެވޭ މީހުންގެ ޢަދަދު 1,000 އަކަށްވުރެ މައްޗަށް އަރާ ކަމުގައި ޣައްޒާގެ އޮފިޝަލުން ވިދާޅުވެއެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. މި ކެމްޕޭންގެ ދަށުން 1,400 އަށްވުރެ ގިނަ މީހުން މަރައިލާފައިވެއެވެ.
ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.