ކުޅުދުއްފުށި ސިޓީގައި ބޭއްވި އެސްޓީއޯ މަކިޓާ ޖޫނިއަރ އެތުލެޓިކްސް ޗެމްޕިއަންޝިޕް 2023 ގެ އެންމެ މޮޅު އެތުލީޓުންގެ މަޤާމު އިބްރާހީމް ނާހިލް ނިޒާރާއި އަހުނާ ނިޒާރު ހޯދައިފިއެވެ.
މިއީ ރާއްޖޭގެ ރަށެއްގައި މިހާތަނަށް ބޭއްވި އެންމެ ބޮޑު އެތުލެޓިކްސްގެ އިވެންޓެވެ. މި މަހުގެ 15 އިން އިއްޔެގެ ނިޔަލަށް ކުރިއަށްދިޔަ މުބާރާތުގެ އެންމެ މޮޅު އެތްލީޓުންނަށް ޓްރެކް އެންޑް ފީލްޑް އެސޯސިއޭޝަންގެ އިބްރާހިމް ނާހިލް ނިޒާރާއި ޖަލާލުއްދީން ސްކޫލްގެ އަހުނާ ނިޒާރު ހޮވުނުއިރު، މި މުބާރާތުގައި 1124 އެތްލީޓުން ވަނީ ރާއްޖޭގެ އެކި ކަންކޮޅުތަކުން ވާދަކޮށްފައެވެ.
އެންމެ މޮޅު ފިރިހެން އެތުލީޓުގެ މަގާމް ހޯދި ނާހިލް ވަނީ 20 އަހަރުން ދަށުގެ ފިރިހެން ކުދިންގެ 100 މީޓަރު ދުވުމާއި 200 މީޓަރު ދުވުން އަދި ލޯންގް ޖަމްޕްގެ ރަން މެޑަލް ހޯދާފައެވެ. މުބާރާތުގެ ފިރިހެން އެންމެ މޮޅު އެތުލީޓުގެ އިތުރުން 20 އަހަރުން ދަށުގެ އެންމެ މޮޅު ފިރިހެން އެތުލީޓަކަށް ހޮވުނީވެސް ނާހިލެވެ.
އަހުނާ ވަނީ މި މުބާރާތުގެ 17 އަހަރުން ދަށުގެ އަންހެން ކުދިންގެ 100 މީޓަރު ދުވުމާއި، 200 މީޓަރު ދުވުމުގެ އިތުރުން އަންހެން ކުދިންގެ ޓްރިޕަލް ޖަމްޕުގެ ރަން މެޑަލް ހޯދާފައެވެ. އަދި މުޅި މުބާރާތުގެ މޮޅު އެތުލީޓުގެ މަގާމާއޮ 17 އަހަރުން ދަށުގެ އަންހެން އެންމެ މޮޅު އެތުލީޓަކަށް ހޮވުނީވެސް އަހުނާ އެވެ.
މުބާރާތުގެ 15 އަހަރުން ދަށުގެ ފިރިހެން އެންމެ މޮޅު އެތުލީޓަކަށް ކުލަބު ކާމް ސްޕޯޓްސްގެ އިޒާން ހަސަން ހޮވުނުއިރު، އޭނާ ވަނީ 100 މީޓަރު ދުވުމާއި 200 މީޓަރު ދުވުމުން ރަން މެޑަލް އަދި ލޯންގް ޖަމްޕްގެ ރިހި މެޑަލް ހޯދާފައެވެ. މި އުމުރުފުރާގެ އެންމެ މޮޅު އަންހެން އެތުލީޓަކީ ކުލަބު ރާވެރިޔާގެ އައިޝަތު ހަމްދާ ސަލާމް އެވެ. އޭނާ ވަނީ އަންހެން ކުދިންގެ 100 މީޓަރު ދުވުމާއި 200 މީޓަރު ދުވުން އަދި ލޯންގް ޖަމްޕްގެ ރަން މެޑަލް ހޯދައިފަ އެވެ.
17 އަހަރުން ދަށުގެ އެންމެ މޮޅު ފިރިހެން އެތުލީޓަކީ ޓްރެކް އެންޑް ފީލްޑްގެ ޒުއިޒް މުހައްމަދު ސުއާދެވެ. އޭނާ ވަނީ 200 މީޓަރު ދުވުމާއި 400 މީޓަރު ދުވުމުން ރަން މެޑަލް ހޯދައިފަ އެވެ. 20 އަހަރުން ދަށުގެ އެންމެ މޮޅު އަންހެން އެތުލީޓަކީ ޝަރީފް ސްޕޯޓްސްގެ އީމާ އަލީ ޝިޔާމް އެވެ. އީމާ ވަނީ އަންހެން ކުދިންގެ ޝޮޓްޕުޓް، ޑިސްކަސް ތުރޯ އަދި ޖެވެލިން ތުރޯ އިން ރަން މެޑަލް ހޯދައިފަ އެވެ.
މުބާރާތުގެ 13 އަހަރުން ދަށުގެ ފިރިހެން ޗެމްޕިއަން ޓީމަކަށް މިލަންދޫ ސްކޫލު ހޮވުނުއިރު މި އުމުރުފުރާގެ އަންހެން މޮޅު ޓީމަކީ އަފީފުއްދީން ސްކޫލެވެ. 15 އަހަރުން ދަށުގެ ފިރިހެން އެންމެ މޮޅު ޓީމަކަށް ހދ. އަތޮޅު ތައުލީމީ މަރުކަޒު ހޮވުނުއިރު، އަންހެން އެންމެ މޮޅު ޓީމަކަށް ހޮވުނީ ކުލަބު ރައިވެރިޔާ އެވެ. 17 އަހަރުން ދަށުގެ ފިރިހެން ޗެމްޕިއަން ޓީމަކަށް ނަސީރު ސްޕޯޓްސް އެކަޑެމީ ހޮވުނުއިރު، އަންހެން ޗެމްޕިއަން ޓީމަކީ ޝަރަފުއްދީން ސްކޫލެވެ. މީގެއިތުރުން 20 އަހަރުންދަށުގެ ފިރިހެން އަދި އަންހެން ބައިންވެސް އެއްވަނަ ހޯދީ ޝަރީފް ސްޕޯޓްސް އެވެ.
އެސްޓީއޯ މަކިޓާ ޖޫނިއާ އެެތުލެޓިކްސް ޗެމްޕިއަންޝިޕްގައި މި އަހަރު 28 ސްކޫލަކާއި ހަތް ކްލަބް ވާދަކޮށްފައިވެއެވެ.