އިންޑިއާގައި މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި މިއަދު ކުޅުނު މެޗުން ޕާކިސްތާން އަތުން އޮސްޓްރޭލިއާ މޮޅުވެއްޖެއެވެ.
ބެންގަލޫރުގައި ހުންނަ ކަރްނާޓަކާ ސްޓޭޓް ކްރިކެޓް އެސޯސިއޭޝަން ސްޓޭޑިއަމުގައި ކުޅުނު މި މެޗުން އޮސްޓްރޭލިއާ މޮޅުވީ 62 ލަނޑުންނެވެ.
މިއަދު ކުޅުނު މެޗުގެ ގުރު ދިމާވުމުން ޕާކިސްތާނުން ނިންމީ ހޮވުމަށެވެ. އެއާއެކު އޮސްޓްރޭލިއާ އެންމެ ފުރަތަމަ ކުޅެން އަރައި 50 އޯވަރު ހަމަވިއިރު ނުވަ ކުޅުންތެރިން ނުބައިވެގެން ވަނީ 367 ލަނޑު ހަދާފައެވެ. އެ ޓީމުން އެންމެ ރަނގަޅަށް ކުޅުނީ 124 ބޯޅައިން 163 ލަނޑު ހެދި ޑޭވިޑް ވާނާއެވެ. އަދ އެ ޓީމުގެ މިޗެލް މާޝް ވަނީ 108 ބޯޅައިން 121 ލަނޑު ހަމަކޮށްފައެވެ.
މި އިނިންގްސްގައި ޕާކިސްތާނުގެ ޝާހީން އަފްރީދީ ވަނީ 10 އޯވަރުގައި 54 ލަނޑަށް ފަސް ވިކެޓް ނަގާފައެވެ. އަދި އެ ޓީމުގެ ހާރިސް ރައޫފް ވަނީ އަށް އޯވަރުގައި 83 ލަނޑަށް ތިން ވިކެޓް ނަގާފައެވެ.
ޖަވާބުގައި ޕާކިސްތާން ކުޅެން އަރައި 45.3 ވަނަ އޯވަރުގައި ހުރިހާ ކުޅުންތެރިން ނުބައިވެގެން ހެދުނީ 305 ލަނޑެވެ. އެ ޓީމުން އެންމެ ރަނގަޅަށް ކުޅުނީ 71 ބޯޅައިން 70 ލަނޑު ހެދި އިމާމުލް ހައްގު އާއި 61 ބޯޅައިން 64 ލަނޑު އެއްކުރި އަބްދުﷲ ޝަފީގެވެ. މި އިނިންގްސްގައި އޮސްޓްރޭލިއާގެ އެޑަމް ޒަމްޕާ ވަނީ 10 އޯވަރުގައި 53 ލަނޑަށް ހަތަރު ވިކެޓް ނަގާފައެވެ.
މި މޮޅާއެކު 10 ޤައުމު ވާދަކުރާ މި މުބާރާތުގެ ތާވަލުގެ ހަތަރުވަނައިގައި އޮސްޓްރޭލިއާ އޮތީ ކުޅުނު ހަތަރު މެޗުން ލިބުނު ހަތަރު ޕޮއިންޓާއެކުއެވެ. އަދި ތާވަލުގެ ފަސްވަނައިގައި އޮތް ޕާކިސްތާނަށްވެސް ވަނީ ހަތަރު މެޗުން ހަތަރު ޕޮއިންޓް ލިބިފައެވެ.